ජීවන සරසවියෙන් පාඩම් 5ක් 5 Lessons from University of Life
ජීවිතය තුළ අත්දකින පාඩම් පොත්පත්වලින් කියවා ඉගෙනගන්න පාඩම්වලට වඩා ගොඩක් වෙනස්. ඇත්තටම ජීවිතය හිතන තරම් සාධාරණ දෙයක් නෙවෙයි. එම නිසා අපි එය දැනගෙන ඊට හුරුවිය යුතුයි. පහත දැක්වෙන්නේ ජීවන සරසවියේදී අමතක නොකළ යුතු පාඩම් පහක්. සමහර පාඩම්වලින් දෙන ආදර්ශය වැරැදි කියලා හිතෙන්න පුළුවන්. නමුත් ප්‍රායෝගිකව ජීවත්වෙද්දී අපට ඒ දේවල් එහෙම කරන්න සිද්ධ වෙනවා.
1. සමාව දෙන්න නමුත් අමතක කරන්න එපා :
සතුරකුට වුණත් සම්පූර්ණයෙන්ම සමාව දෙන්න පුරුදු වෙන්න. මන්දයත් සමාව දීම තමයි ලොකුම පළිගැනීම. සමාව දෙද්දී බොහෝ දෙනෙක් පුංචි වරදක් කරනවා. ඒ කිසියම් පුද්ගලයෙක්ට හෝ පුද්ගලයන් කණ්ඩායමකට සමාව දෙන්නේ කිසියම් වරදක් අඩුපාඩුවක් හෝ අතපසුවීමක් කළාම. කිසියම් කෙනෙක්ට සමාව දීලා අදාළ සිද්ධිය අමතක කළත්, කිසිම අවස්ථාවක එම පුද්ගලයා හෝ කණ්ඩායම කළ වරද, අතපසුවීම හෝ අකටයුත්ත කවදාවත් අමතක කරන්න එපා. එම වරද හෝ අතපසුවීම මතක තියාගෙන එම පුද්ගලයාගෙන් දිගින් දිගටම පළිගන්න අවශ්‍ය නැහැ. නමුත් එකම වරද කිහිපවරක් කිරීමේ වැඩි සම්භාවිතාවක් මිනිසුන් තුළ තියෙන නිසා සමාව දුන්නත් සමාව දෙන්න හේතුවන කාරණය අමතක කරන්න එපා. කිසියම් පුද්ගලයෙක්ට සමාව දෙන්න හේතුවුණු කාරණය ගැන අවබෝධයෙන් සිටීමෙන් ඉදිරියට එවැනි ගැටලු නැවත ඇතිවීම කල් තියාම මනාව වළක්වා ගන්න පුළුවන්.
2. කිසිම කෙනෙක්ට 100%ක් කියන්න එපා :
තම සැලසුම් 100%ක් අනිත් අයට පැවසීමත් ඒ තරම් හොඳ දෙයක් නෙවෙයි. සමාජය ගොඩක් වෙනස්. අපි බොහෝ දෙනා සාමාන්‍යයෙන් මේ මොහොතේ ඉතා විශ්වාසවන්තයි කියලා හිතෙන කෙනෙක්ට ජීවිතයේ කාටවත් නොකිය යුතු රහසක් හිතේ තියෙන පීඩනය නිසා පවසන අවස්ථා ඕනෑ තරම් තියෙනවා. නමුත් එම රහස රහසක් වශයෙන් රකින්න පොරොන්දු වුණ පුද්ගලයා අනාගතයේදී එය ඔබව මෙල්ල කරන ආයුධයක් බවට පත්කර ගන්න පුළුවන්. අන්න ඒ නිසා ජීවිතයේ තම දුර්වලතා, අතපසුවීම් සහ රහස් අනිත් අයට සම්පූර්ණයෙන් පවසද්දී ප්‍රවේශම් වෙන්න අවශ්‍යයි.
3. අඩුවෙන් පොරොන්දු වෙලා වැඩියෙන් දෙන්න :
අතීතයේ අලෙවිකරුවන් සහ වෙළෙඳ ආයතන ලොකු ලොකු පොරොන්දු දීලා පොරොන්දු වුණ දෙයට හාත්පසින්ම අඩු ප්‍රතිලාභයක් පාරිභෝගිකයාට දුන්නා. නමුත් වෙළෙඳපොළ තරගකාරීත්වය වැඩ වීමත් සමඟ පාරිභෝගිකයන් ඉල්ලනවාට වඩා වැඩි දෙයක් සපයන්න ඔවුන්ට සිද්ධ වුණා. වැඩියෙන් පොරොන්දු වෙලා අඩුවෙන් දීම ඉතාම අවදානම්. මන්දයත් එවැනි තත්ත්වයක් තුළ භාණ්ඩය පරිභෝජනය කරන්නන් අතර වැඩි කාලයක් යන්නත් කලින්ම විශ්වාසය වේගයෙන් බිද වැටෙනවා. අන්න ඒ වගේ ලොකු ලොකු පොරොන්දු දීලා එම පොරොන්දු, පොරොන්දු වුණ ආකාරයට ඉෂ්ට කළේ නැත්නම් වටේ ඉන්න අය තවදුරටත් එවැනි පුද්ගලයන් දෙන පොරොන්දු පමණක් නොව කියන දේවල් පවා විශ්වාස නොකරනවා. එම නිසා අඩුවෙන් පොරොන්දු වෙලා වැඩියෙන් දෙන්න පුරුදුවීම ජීවිතයේ දිගු කාලීන සාර්ථකත්වයට ඉතා වටිනවා.
4. කියන්න සුදුසු දෙයක් නැත්නම් මුකුත් නොකියා ඉන්න :
සමහර මිනිස්සු තැනක් නොතැනක් බලලා ඕනෑම දෙයක් කියන්න පුදුම කැමැත්තක් දක්වනවා. කිසියම් පිරිසක් කථා කරන විට කිසිවක් නොකියා පැත්තකට වෙලා සාවධානව ඊට සවන්දීම මදි පුංචිකමක් ලෙස සමහරු හිතනවා. එම නිසා මමත් මොනව හරි කියන්න ඕන කියලා හිතල බලන්නේ නැතුව කථා කරනවා. සාමාන්‍ය ජීවිතයේදී යහළු මිත්‍රයන් සමඟ නම් ඕනෑ දෙයක් සහ එපා දේ කිව්වම ලොකු ගැටලුවක් ඇති වෙන්නේ නැහැ. නමුත් වෘත්තීයමය වශයෙන් ගනුදෙනු කරද්දී සුදුසු තැන සුදුසු දේ නොකියන පුද්ගලයා වැඩි කාලයක් යන්න කලින්ම ඉතා නුසුදුසු පුද්ගලයෙක් බවට පත්වෙනවා. සැම විටම අදහස් පළකිරීම අනිවාර්යය දෙයක් නෙවෙයි. එම නිසා කිසියම් වැදගත් සංවාදයකදී කියන්න විශේෂ දෙයක් නැත්නම් නොදන්නා දේ නොකියා සිටීම වැදගත්. නමුත් ඉදිරිපත් වීම සහ මොනවා හෝ යමක් කීම ඉතා වැදගත් බව සමහරු කියනවා. නමුත් ඒ සංකල්පය සෑම අවස්ථාවකටම ඒ ආකාරයෙන්ම යොදවන්න පුළුවන් සංකල්පයක් නෙවෙයි. වෛවර්ණව පිල් විදහන මොනරා ඉතාම ලස්සන කුරුල්ලෙක්. නමුත් මොනරාගේ කඩහඬ කනට ඉතාම අමිහිරියි. මොනරාගේ ලස්සන පිළිබඳ මනසේ ඇතිවන ප්‍රසන්න හැඟීම මොනරාගේ කටහඬ ඇහුවම නැත්තටම නැතිවෙලා යනවා. අන්න ඒ නිසා ප්‍රායෝගික ජීවිතයේදී ඉදිරිපත් කරන අදහස් තුළින් කෙනෙකුගේ පෞරුෂය මනාව නිරූපණය වෙනවා.
5. කෝපයෙන් ඉන්න අවස්ථාවක තීරණ ගන්න එපා :
කෝපයෙන් ඉන්න අවස්ථාවක ගත්ත තීරණයක පසු ප්‍රතිඵල කොයිතරම් භයානකද, කොයිතරම් කනගාටුදායකද කියලා ඔප්පු කරන්න උදෑසන කියවන පත්තරවල මුල් පිටුවල පළවෙන ප්‍රවෘත්තිම ප්‍රමාණවත්. සැබැවින්ම කෝපයෙන් ඉන්න අවස්ථාවක අපේ හිත තීරණයක් ගන්න ඉක්මනින් සහ බයක් නැතුවම පොලඹවනවා මිසක් එම තීරණයේ වාසි අවාසි සහ පසු ප්‍රතිඵල විශ්ලේෂණය කරන්න යොමු කරන්නේ නැහැ. නිසි විශ්ලේෂණයෙන් තොරව හදිසියේ ගන්න තීරණය හරියට කණා මුට්ටි බිඳිනවා හා සමානයි. සමහර තීරණ වාසි සහිත වෙන්න පුළුවන්. නමුත් කෝපයෙන් ඉන්න අවස්ථාවක ගන්න බොහෝ තීරණවල පසු ප්‍රතිඵල ඉතාම භයානකයි. කිසියම් කෙනෙක් වැරැදි තීරණයක් වෙත යොමු කරන්න අවශ්‍ය නම් එම පුද්ගලයා මුලින්ම කෝප ගැන්වීමත් හොඳ උපක්‍රමයක්. දේශපාලනයේදී සහ ක්‍රීඩාවේදී ක්‍රීඩකයන් බොහෝ වෙලාවට එම උපක්‍රමය භාවිත කරනවා. බොහෝ වෙලාවට ඕස්ට්‍රේලියානු පන්දු යවන්නන් ඉන්දියානු සහ පාකිස්තානු ක්‍රීඩකයන් තරහ ගස්වලා ඔවුන් වැරැදි පහරවල් වෙත යොමු කරන්න උත්සාහ ගන්නවා. මන්දයත් ඉන්දියානු සහ පාකිස්තානු ක්‍රීඩකයන්ට ඉතා ඉක්මනින් තරහ යන බව ඔවුන් දන්නවා. ඒ වගේම දේශපාලනයේදීද සමහර දේශපාලනඥයන් විරුද්ධ පක්‍ෂයේ දේශපාලනඥයන් කෝපයට පත්කරලා ඔවුන්ගේ මුවින්ම වැරැදි මත සමාජයට යවනවා.
කැලුම් වැලිගමඋපුටා ගැනීම මව්බිම
