සම්මුඛ පරීක්ෂණයට ගියාට රැකියාව නොලැබෙන්නෙ ඇයි?
රැකියා අයැදුම්පත :
පළමුවෙන්ම ඔබ රැකියාවක් තෝරා ගත් පසුව ඔබේ සුදුසුකම් සහිත අයැදුම්පතක් හා ඒ සමඟම ඛ්ධමඥපඪදඨ තඥබබඥප පතක්ද යවයි. එවිට එහි ආයතන ප්‍රධානීන් ඔබව දකින්නේ ඔබේ බාහිර ස්වරූපයෙන් නොව අයැදුම්පතේ සඳහන් සුදුසුකම් හා එහි පෙළගැස්මෙනි. මේ නිසා ඒ පිළිබඳ නිසි දැනුම්වත් බවක් ඇති පුද්ගලයකුගෙන් විමසා රැකියා අයැදුම්පතක් සකස් කිරීම වඩාත් සුදුසුයි. එය සිත් ගන්නාසුලු ආකාරයට මෙන්ම එම ආයතන ප්‍රධානීන් සෑහීමකට පත්වන ආකාරයට සකස් කර තිබිය යුතුය. ඔබ සම්මුඛ සාකච්ඡාවකට කැඳවීමට සුදුසුද? යන්න ඔවුන් ඉන් තීරණය කරයි.
දුරකතනයෙන් කරන සම්මඛ සාක්ච්ඡා :
අප පෙර සඳහන් කළ ආකාරයට රැකියා අයැදුම්පතක් ඔබ සකස් කළේ නම් ඔබ සම්මුඛ සාකච්ඡාවකට කැඳවන්නේ දුරකතනයෙන් අමතමිනි. මෙම අවස්ථාව ඔබේ සම්මුඛ සාකච්ඡාවේ මීළඟ පියවර බව ඔබ දන්නවාද? ඔබ කතා කරන ශෛලිය මෙන්ම ඉංගී්‍රසි කතා කිරීමේ හැකියාවද මෙහිදී මැන බැලෙයි. ඇතැම් විට මෙහිදී ඔබ අසාර්ථක නම් ඔබ සම්මුඛ සාකච්ඡාවට කැඳවීම ඔවුන් ප්‍රතික්ෂේප කරන අවස්ථාද ඇත. ඔබව මුහුණට මුහුණ සම්මුඛ සාකච්ඡාවකට කැඳවන්නේ මෙම කඩඉමෙන් පසුවය.
පළමු දැක්ම :
සම්මුඛ සාකච්ඡාවකදී පමණක් නොව අපේ සාමාන්‍ය ජීවිතයේදී පවා යම් පුද්ගලයකු දෙස බලන පළමු දැක්මෙන්ම ඒ පුද්ගලයා පිළිබඳ යම් අදහසක් අප සිතේ ඇඳෙයි. මෙය සම්මුඛ සාකච්ඡාවකදී මූලිකවම අවධානය යොමු කරන කාරණයකි. මෙනිසා ඉතා ප්‍රසන්න හා පිළිවෙළට සැරසී සම්මුඛ සාකච්ඡාවකට ඉදිරිපත් විය යුතුමයි.
කාන්තා විලාසිතා :
කාන්තාවක් නම් අවස්ථාවට උචිත ආකාරයට සාරියකින් හෝ office dress එකකින් සැරසී යෑම වඩාත් සුදුසුය. ඇඳුම් ඇඳීමේදී එහි වර්ණ පිළිබඳත් ඔබේ අවධානය යොමු විය යුතුය. බොහෝ විට සම්මුඛ සාකච්ඡා පැවැත්වෙන්නේ උදය වරුවේදීය. එම නිසා මෙවැනි අවස්ථාවකට ළා වර්ණ ( හෙවත් ඇසට හිතකර ඇත්දළ පැහැය, ළා රෝස පැහැය, ළා දම් හෝ පීච් යන වර්ණවලින් සැරසී යා හැකිය. නමුත් කළු වර්ණය නම් මේ සඳහා කිසිසේත්ම සුදුසු නොවන නිසා සාරියක හැට්ටයටවත් මෙවැනි වර්ණ වලින් තෝරා නොගැනීමට වගබලා ගන්න.
අත්බෑග් පාවහන් :
එමෙන්ම ඔබ ගෙනයන අත්බෑගය මෙන්ම පාවහන්වල වර්ණයත් ගළපා ගැනීම වැදගත්ය. එනම් අත් බෑගය දුඹුරු පැහැයක් ගන්නේ ඔබ පාවහන් තෝරා ගත යුතු වන්නේද එම වර්ණයෙනි.
මේකප් :
කාන්තාවන් තමන්ගේ සුන්දර පෙනුම ගැන වැඩි අවධානයකින් පසුවන බව සැබෑය. නමුත් සම්මුඛ සාකච්ඡාවේදී මෙය අදාළ කරගත යුතු වන්නේ අවස්ථාවට උචිත වන ආකාරයටය. මෙහිදී ඔබ කොණ්ඩයට අනවශ්‍ය ලෙස විලාසිතා නොකළ යුතුය. කොණ්ඩය හොඳින් පීරා සරල කොණ්ඩා විලාසිතාවකින් ඔබට සැරසීමට පුළුවන. කොණ්ඩය ලිහිල් කරන්නේ නම් අයන් කරගනිමින් එය අවුල් නොවන ආකාරයට පිළිවෙළකට සකසා ගන්න. තොල් ආලේපන හා පවුඩර් වැනි දෑ අපිළිවෙළට තවරන්න එපා. නිවෙසින් ආපසු නැවැත අදාළ ස්ථානයට යෑමට පෙර කණ්ණාඩියකින් මුහුණ බලා මේකප් නිසි ආකාරයට ආලේප කරන්න.
පිරිමින්ට :
පිරිමි පාර්ශ්වයේ අය නම් අත් දිගට ඇති ළා පැහැති කමිසයකින් සැරසී යෑම වඩාත් සුදුසුයි. බඳ පටියේ වර්ණයට ගැළපෙන අයුරින්ම පාවහන් තෝරා ගැනීමටද සැලකිලිමත් වන්න. කමිසයේ පැහැයට උචිත ආකාරයට ටයි පටියද පැලඳිය යුතුය. කමිසයේ සාක්කුවේ අනවශ්‍ය කිසිවක් නොදමන්න. පෑනක් පමණක් එහි රැඳවීමට හැකිය. සම්මුඛ සාකච්ඡා කාමරයට යෑමට පෙර mouth wash එකක් භාවිත කිරීමට හැකිනම් එය වඩාත් සුදුසුයි. මේ නිසා ඔබේ අත් බෑගයේ සෑම විටම මුඛය සුගන්ධවත් කරන mouth wash එකක් තිබීම වැදගත්ය. ඔබ සම්මුඛ සාකච්ඡාවේදී කතා කරන විට මුඛයෙන් යම් දුගඳක් හැමුවහොත් එය ඔබේ පෞරුෂත්වයටද අහිතකර ලෙස බලපෑමට හැකිය. මෙනිසා මේ පිළිබඳත් ඔබ සැලකිලිමත් විය යුතුය.
ආත්ම විශ්වාසය :
සම්මුඛ පරීක්ෂකවරු සිටින ස්ථානයට ඇතුළු වන විටම එහි සිටින පුද්ගලයන්ට ප්‍රසන්න සිනහවකින් පිළිගනිමින් සුබ උදෑසනක් කියා සුබ පතන්න. එමඟින් ඔබේ මනා පෞරුෂය මෙන්ම ආත්ම විශ්වාසයද තහවුරු කරගැනීමට ඔවුන්ට හැකිය. ඒත් සමඟම ඔවුන් සියල්ලටම අතට අත දෙමින් how do you do i’m shiroshi කියා තමන්ව හඳුන්වා දෙන්න. ඔබ සිංහලෙන් සුබ පතන්නේ නම් සුබ උදෑසනක් කියා ආයුබෝවන් කියා ඔවුන්ව සිනහවකින් පිළිගන්න. අතට අත දෙන්නේ නම් අත වඩාත් තද කර ලිහිල් නොකර සාමාන්‍ය තරමින් අල්ලා පිළිගත යුතුය. තවත් කෙනෙකුගේ අත උඩින් අතට අත දීම සිදු නොකරන්න. දෙදෙනා අතට යම් ඉඩක් (අඩි 3ක පමණ) තිබෙන ආකාරයට අතට අත දීමට සැලකිලිමත් වන්න. අනෙක් පුද්ගලයාට වඩාත් ළං වෙමින් හෝ දුරස් වෙමින් අතට අත දීමත් වැරැදි ක්‍රියාවකි. යම් අවකාශයක් දෙදෙනා අතර තිබෙන ආකාරයට මෙය සිදු කළ යුතුය.
අසුන් ගැනීම :
ඔබ අසුන් ගත යුත්තේ සම්මුඛ පරීක්ෂකවරුන්ගේ අවසරය ලැබීමෙන් අනතුරුය. ඔබ අත තිබෙන ලිපි ගොනුව මේසය මත ඔවුන් ඉල්ලා සිටින තෙක් නොතබන්න. එතෙක් ඔබේ උකුල මත එය තබා ගන්න. ගෙන යන බෑගයද කිසි විටෙකත් මේසය මත නොතැබීමට වගබලා ගත යුතුය. එය ඔබේ පුටුවේ වම් පසේ හෝ දකුණු පසින් තබන්න. එම කාමරයට යෑමට පෙරම ඔබේ දුරකතනය ක්‍රියා විරහිත කර තබන්න. එය නිහඬව නාද වීමටවත් ඉඩ නොහරින්න.
පිළිතුරු දීම :
පරීක්ෂකවරුන් ඔබෙන් ප්‍රශ්න අසන විට එයට කෙටි පිළිතුරු ලබාදීමට වගබලා ගන්න. කිසිදු අපහසුතාවකින් තොරව අසන ප්‍රශ්නවලට පැහැදිලිව පිළිතුරු දෙන්න. මේ සෑම විටම ඔවුන්ගේ දෑස දෙස කෙළින්ම බලා පිළිතුරු සැපයිය යුතුය. එමඟින් ඔබේ ආත්ම විශ්වාසය පිළිබඳ මනා පැහැදීමක් ඔවුනට ඇතිවේ. ප්‍රශ්නවලට හිස වනන්නේ නැතිව සෘජුව පිළිතුරු දීමෙන් ඒ බව තවදුරටත් තහවුරු කරගැනීමට හැකිය. ඔබ ඔවුන් සමඟ කතාබහ කරමින් ගනුදෙනු කරන ආකාරය පිළිබඳ සැලකිලිමත් වීමෙන් ඔබ වෘත්තිකයකු වශයෙන් තෝරා ගැනීම නිගමනය වේ.
සමුගැන්ම :
සම්මුඛ පරීක්ෂකවරු සියලු දෙනාටම අතට අත දෙමින් ප්‍රසන්න සිනහවක් සමඟම ස්තුති කර පිටත්ව යෑමටද අමතක නොකරන්න.
මේ ආකාරයට සාර්ථකව සම්මුඛ පරීක්ෂණයට මුහුණ දෙන ඔබට නම් සිහින රැකියාව ලබාගැනීම සැබෑවක්ම වනු ඇත.
ශිරු විජේමාන්න - සමාජ චාරිත්‍ර හා පෞරුෂ සංවර්ධන උපදේශිකා ශාලිකා රංගනී සමරදිවාකර
උපුටා ගැනීම මව්බිම
