උපකාරක පංති මුවාවෙන් පෙම්වතුන් සමඟ guest house වල
දරුවන්ට නිසි අධ්‍යාපනයක් ලබාදීම දෙමාපියන්ගේ එකම ප්‍රාර්ථනයයි. ඒ නිසාවෙන්ම පාසැලෙන් ලබන අධ්‍යාපනයට අමතරව වෙනත් පෞද්ගලික පන්ති සඳහා දරුවන්ට යොමු කරනු ලැබේ. නමුත් ගැටලුව වන්නේ අත්දැකීම් ලැබීමට නව යොවුන් වියේ පසුවන දරුවන්ගේ තිබෙන දැඩි කැමැත්ත නිසා දෝ ඔවුන්ට ඉඩක් ලැබෙන සුළු හෝ අවස්ථාවකදී වෙනත් අයථා ගමන් බිමන්, සම්බන්ධතා ඇතිකර ගැනීමට පෙළඹෙන සුලු ස්වභාවයයි.
දරුවන් සිතාමතා මෙසේ හැසිරෙනවාද?
Truancy ලෙසින් හැඳින්වෙන මෙම තත්ත්වයේදී ශිෂ්‍ය ශිෂ්‍යාවන් විසින් තම කැමැත්තෙන්ම පාසැල මඟහැර වෙනත් ස්ථානවලට ගොස් ගත කිරීම මේ නමින් හැඳින්වේ. මෙය ඔවුන් විසින් සිතා මතාම පාසැලේ විනය පටිපාටියට විරුද්ධව සිදු කරන ක්‍රියාවක්. ඇත්තෙන්ම මෙය පාසැල සම්බන්ධයෙන් පමණක් නොවේ, අමතර පන්ති සඳහා සහභාගී වන දරුවන් සම්බන්ධව ද කතාබහ කළ හැකි වේ. ඔවුන් මෙම ක්‍රියාව පුරුද්දක් වශයෙන් සතියට කිහිප වතාවක් සිදු කළ හැකි අතර දෙමාපියන් හා ගුරුවරුන්ට රහසේ ඔවුන් මේ ක්‍රියාවල නිරත වීමද විශේෂත්වයකි. නමුත් රටේ පවත්නා නීතිමය තත්ත්වයට අනුව දරුවෙක් නොකඩවා පාසැලට පැමිණිය යුතු අතර අමතර පන්ති සම්බන්ධයෙන් ද එසේවිය යුතු යැයි දෙමාපියන් මෙන්ම ගුරුවරුන් ද බලාපොරොත්තු වේ.
දරුවන් මේ ආකාරයට පාසැල හෝ පන්ති මඟහැරීමට හේතුව කුමක්ද?
ඇතැම්විට මෙම දරුවන්ගේ බුද්ධි මට්ටම පන්තියේ අනෙක් ළමයින්ට වඩා අඩුවිය හැකියි. මේ හේතුවෙන් දරුවා පන්තියේදී කොන්විය හැකියි. නමුත් විනය විරෝධී ක්‍රියාවක නිරතවීම නිසා එසේ නැත්නම් ප්‍රචණ්ඩත්වය නිසා සමවයසේ ළමුන් අතර ජනපි‍්‍රය විය හැකියි. අවසානයේදී කිසිවෙකුට බිය නොමැති වීරයෙක් බවට නිතැනින්ම ඔහු තේරී පත් වේ. ඒ නිසා තමාගේ බලය හා ප්‍රචණ්ඩත්වය, විනය විරෝධි ක්‍රියා මඟින් තව තවත් තහවුරු කර ගැනීමට ඔවුන් පෙළඹේ. මේ නිසා පාසැලේ ගුරුවරුන් අතර අප්‍රසාදයට පත් වූවත් සමවයසේ දරුවන් අතර විශේෂයෙන් ඔවුන්ට කැපී පෙනීමට අවස්ථාව උදා වේ. සමහර අවස්ථාවල දරුණු වරදක් හේතුවෙන් ඉතා තදබල ලෙසින් පන්තිය ඉදිරිපසදී යම් දරුවෙක් විවේචනයට ලක් වීම ද මෙසේ දරුවන් පන්ති මඟහැරීමට හේතු වේ. මේ අවස්ථාවේදී ඔවුන්ට නැවත තමාගේ නිවසට යාමට ද නොහැක්කේ දෙමාපියන්ගේ දෝෂ දර්ශනයට ලක්වන බැවිණි. ඊට අමතරව මව, පියා සමඟ දික්කසාද වී සිටීම, පියා බීමත් වී මව සමඟ නිතර ගැටුම් ඇතිකර ගැනීම, නූගත් පහළ පන්තික මට්ටමේ පවුල්වල දරුවන් බොහෝවිට ප්‍රචණ්ඩත්වයත් සමඟම මෙවැනි විනය විරෝධි ක්‍රියාවලට පෙළඹිය හැකියි. මෙවැනි දරුවන්ගේ පවුල් පසුබිම්වල අධ්‍යාපනයට නැඹුරු වූ පසුබිමක් නොමැති නිසා ඔවුන් යම් සහනයක් මෙම වැරදි සම්බන්ධතා වලට යොමුවීම හෝ වැරදි කණ්ඩායම් සමඟ ඒකරාශී වීමෙන් බලාපොරොත්තු වේ. මේ තත්ත්වය සමහර විට පොහොසත් පවුල්වල දරුවන් සම්බන්ධයෙන් ද සුලබව දැකගත හැකියි. ඔවුන් විසින් තමාගේ දරුවන් සඳහා ලබාදෙන අඩු අවධානය නිසා මෙසේ ඔවුන් අනිසි සම්බන්ධතා ගොඩනඟා ගැනීම සඳහා පෙළඹිය හැකියි. මෙවැනි දරුවන්ට තම දෙමාපියන්ගේ සිත් ද රිදවිය නොහැකි නිසාත් පාසැල් හෝ අමතර පන්තියේ ගත කරන කාලසීමාව ගෙවා දැමීමටත් ඔවුන් විකල්ප අවස්ථා ලෙස මීට පෙළඹිය හැකියි. තවද ආදර සම්බන්ධතා පිළිබඳව සුළු වශයෙන් හෝ දෙමාපියන් දැනගත් අවස්ථාවකදී ඔවුන් පනවන දැඩි නීති රීතිවලින් මිදී තම පෙම්වතා, පෙම්වතිය නිදහසේ හමුවිය හැක්කේ අධ්‍යාපනය සඳහා ලැබෙන සුළු නිදහසේදී පමණි. ඒ නිසා දරුවන් අධ්‍යාපනය මඟහැර හෝටල් කාමරවල තමාගේ නිදහස බුක්ති විඳිය හැකියි. ඒ නිසා තද නීති ක්‍රියාත්මක වීම දරුවන්ගේ මෙම හැසිරීම් සඳහා එක් හේතුවකි.
මේ තත්ත්වය එම දරුවන්ගේ අනාගතයට බලපාන්නේ කෙසේද?
මෙසේ අධ්‍යාපන කටයුතු අඩාල කරගෙන විභාගවලින් අසමත් වීම නිසා උසස් අධ්‍යාපන අවස්ථා අහිමි වී යයි. මෙම විනය විරෝධි හැසිරීම්, අපරාධ කිරීම සඳහා පෙරහුරුවක් බවට පත් වේ. ඒ වගේම නව යොවුන් වියේ පසුවන දරුවන්ට අත්දැකීම් ලැබීමේ ආශාව නිසා මත්ද්‍රව්‍යවලට ඇබ්බැහි වීම හා වැරදි ලිංගික අත්දැකීම් ලබා ගැනීමට ද පහසුවෙන් පෙළඹිය හැකියි. ඒ නිසා අනාගතයේදී විශ්වාසදායක බවින් හා වගකීමෙන් තොර පිරිසක් බවට පත් විය හැකියි. මෙවැනි අනිසි සම්බන්ධතාවලට යොමු වූ ගැහැණු දරුවන් දෙමාපියන්ටත් හොර රහසේ විවාහ වීම හෝ අනාචාරයේ හැසිරීමට පෙළඹිය හැකියි. අවසානයේදී ඔවුන් ගණිකාවන් බවට පත්විය හැකියි. ඒ වගේම අනවශ්‍ය ගැබ් ගැනීම් මෙන්ම සමාජ රෝගවලට ද ගොදුරුවිය හැකියි. තවද පාසැල් නිල ඇඳුමින් මෙසේ හැසිරීමෙන් පොලිස් අත්අඩංගුවට පවා පත්වී තමාගේ ජීවිතයට විශාල කැලලක් ඇති කරගත හැකියි.
දෙමාපියන් වශයෙන් සිදු කළ හැක්කේ කුමක්ද?
නිරතුරුව තම දරුවන්ගේ අධ්‍යාපන කටයුතු මෙන්ම මුහුණ දීමට සිදුවන විිවිධ ගැටලු පිළිබඳ සොයා බැලිය යුතුවේ. දරුවා යම් විෂයකට දුර්වල නම් ඒ සඳහා අමතර පන්ති හරහා අධ්‍යාපනය ලබාදීම හා නිරතුරුව සොයා බැලීම ඉතා වැදගත් වේ. දරුවාගේ දුර්වලතා හඳුනාගෙන ඒවා මඟහරවා ගැනීමට උපකාර කරනවා මෙන්ම සැමවිටම ඔවුන්ගේ සුළු හෝ දක්ෂතාවක් පවා නිරතුරු ඇගයීම මඟින් මෙවැනි ගැටලුවලට දරුවන් යොමුවීමෙන් වළක්වාගත හැකි වේ. දරුවන් අතින් වැරදි සිදුවිය හැකියි. ඒවා සඳහා සමාවදී ඔවුන්ගේ යහපත් ක්‍රියා අගය කිරිමෙන් යහමඟට ඔවුන්ගත හැකියි. දරුවන්ට ඔබගේ කාලය ලබාදීම ඉතා වැදගත්. ඒ නිසා ඔබ දෙමාපියන් ලෙස මුදල් ඉපැයීමට කාලය ගත කරනවා වගේම නැවතත් ජීවිතයේ ඔබට නොලැබෙන දරුවාගේ ළමා කාලය යහපත්ව හා අර්ථවත්ව ගත කිරීමට උපකාර කළ යුතු වේ. ඒ වගේම ඔබගේ දරුවන්ගේ මිතුරන් මිතුරියන් හා ඔවුන්ගේ පවුල් පසුබිම් පිළිබඳ විමසිලිමත් වීම වැදගත් වන අතර මේ හරහා ද ඔබගේ දරුවාගේ ජීවිතයට බලපෑම් ඇතිවිය හැකි වේ. දරුවාගේ පාසැල සම්බන්ධ විිවිධ අවස්ථාවලදී ගුරුවරුන් හා සමඟ සම්බන්ධව කටයුතු කළ හැකි වේ. දරුවාට හොඳින් ඇහුම්කන්දී එම ගැටලුව පාසැල් උපදේශන සේවාවකට හෝ වෙනත් උපදේශන සේවාවකට යොමු කරවිය හැකියි. ඇතැම් මානසික රෝග ද මීට හේතුවිය හැකියි. මෙසේ දැඩි ලිංගික ආකර්ශණයක් ඇති වීමද මානසික රෝග විය හැකි නිසා එවැනි අවස්ථාවක මානසික වෛද්‍යවරුන් වෙත රැගෙන යා යුතුයි. තමාගේ පවුලේ යම් අයෙක් මෙවැනි රෝග අවස්ථාවකින් පෙළුණා නම් නොපමාව වෛද්‍ය ප්‍රතිකාර ලබාගත යුතු වේ. නව යොවුන් වියේ ඇබ්බැහිකම් සඳහා දැඩි නැඹුරුවක් දක්වයි. ඒ නිසා ඒකාකාරී බවින් මිදී නව අත්දැකීම් ලබා ගැනීමට යොමු වේ. ඒ නිසා අධ්‍යාපනය වගේම සමාජීය සම්බන්ධතා සුදුසු නිවැරදි අයුරින් ගොඩනඟා ගැනීමට අවස්ථාව සලසාදිය යුතු වේ. ඒ නිසා ඔවුන්ට අවශ්‍ය අත්දැකීම් ලබාදීම මෙන්ම යහලුවන් තෝරා බේරාදීම පවා දෙමාපියන්ගේ වගකීමක් බවට පත් වේ.
උපුටා ගැනීම සිළුමිණ
