බැරි දේට බැරිය කියන්න ලැජ්ජ වෙන්න එපා...
යම් වැඩක් සැලකිල්ලෙන් නොකිරීමෙන් සිදුවන හානි විශාලයි. එයින් තමන්ට මෙන්ම අනුන්ටත් හානි සිදුවිය හැකියි. සමහරුන් වැඩ කරන්නේ කරන්නන් වා‍ලේ. ඒ කියන්නේ ඕනෑවට එපාවටයි එය කරන්නේ. යමක් බාරදුන් විට හොඳයි කියලා බාර ගත්තත් එහි නිරතවීමට රුචිවෙන්නේ නැහැ. එවිට එය කළත් නිවැරදිව අංග සම්පූර්ණව කරන්න ලැබෙන්නේ නැහැ.
- “එයා වැඩක් කළොත් මොකක් හරි කොස්සක් තියෙනවා”
- “වැඩේ බාගෙටයි කරන්නේ”
- “කෑල්ලක් ඉතුරු වෙනවා.”
මේ ආදී වශයෙන් ඔවුන් ගේ වැඩවල අඩු පාඩු දකින්නෝ බොහෝයි. තමුන්ට යම් කාර්යයක් කරදෙන ලෙස ඉල්ලූ විට හෝ නියෝගයක් ලද විට තමන්ට කළ හැකිනම් එය ඉටුකිරීමට බාර ගැනීම යහපත්. එහෙත් එය බාරගත්ත නම් නිසි පරිදි සම්පූර්ණ කළ යුතුයි. නමුත් අඩක් කරලා මට මෙය කරන්න බැහැ කියලා ප්‍රතික්ෂේප කිරීම වැරදියි. මුලදිම බාර නොගෙන සිටියාට වඩා කරන්න බැරි හෝ අකමැති දෙයක් බාරගෙන අතරමග අතහැර දැමීම බොහෝ වැරදියි. එයින් ඔබෙන් ඉල්ලීම ඉටුවේ යැයි බලා‍පොරොත්තු වන පුද්ගලයා අමාරුවේ වැටෙනවා. එයින් සිදුවන හානිය විශාලයි. ඔබ එය මුලදීම ප්‍රතික්ෂේප කළා නම් ඒ තැනැත්තාට වෙන කෙනෙකුට හෝ කියලා කර ගන්න තිබුණා. දැන් ඔහුට ඒ අවස්ථාවත් අහිමි වෙලා. ඒ මොකද කොටසක් කරලා නතර කළ වැඩක ඉතිරි කොටස නිම කරන්න බොහෝ අය කැමති නැහැ. ඒ අය මුලින් කළ අයගෙ බොහෝ වැරදි කියමින් එය සම්පූර්ණ කිරීම ප්‍රතික්ෂේප කරනවා. නැතිනම් පමා කරනවා. අපි දැන් මෙහෙම උදාහරණයක් ගනිමු. මෙය සමාජයේ බොහෝ විට සිදුවන දෙයක්. ගෙයක් තනන්නට ගිය එක් පෙදරේරුවෙක් එය සම්පූර්ණ නොකර අඩක් නිමකර ඉවත් වෙනවා. මෙය බැරි නම් ඔහුට මුලදී එය කිව යුතුව තිබුණා. එහෙත් විවිධ හේතු නිසා එය බාර ගන්නා ඔහු පසුව අතරමග නවතා යනවා. ඉතින් එය අවශ්‍ය වන පුද්ගලයා විශාල කරදරයකට වැටෙනවා. ඊළඟට නොයෙක් දෙනා සොයන්නට ඔහුට සිදුවෙනවා. ඉතින් මොකද වෙන්නේ, ඔහුගේ ධනයද, කාලයද නිකරුණේ අපතේ යාමයි. මෙවැනි දුෂ්කරතා ගැන සිතිය යුතු වෙනවා. ඇතැම් අය මෙහෙම බැරි දේවල් තමන්ට බොරු මහන්තත්ත්වයක් ගොඩනගා ගන්න බාර ගන්නවා. අන්තිමටයි තමුන්ට කරන්න බැරි බව වැටහෙන්නේ. එවිට නොකර මග අරිනවා. මේ පිළිබඳ විවිධ හේතු ඉදිරිපත් කරන්න පුළුවන්. මට වැඩ අධිකයි. ඉල්ලපු දවසට නිම කරන්න බැහැ. වැඩියෙන් වැය කරන්න සිදුවෙයි ආදී වශයෙන් කරුණු ඉදිරිපත් කරාවි. කිතුල් ගහට ගිය මිනිහටත් කියන්න හේතු තිබුණයි කියනවනේ. බොහෝ විට නිසි සැලකිල්ලක් නැතුව එම කාර්ය කරන විට එයින් සිදුවන විපත විශාලයි. ඒ නිසා ඔබට බාර දෙන වගකීම නිසි පරිදි ඉටුකිරීම ඔබගේ වගකීමක් බව සිතා කටයුතු කිරීම හොඳයි. එහෙම නැතුව තමන්ට බාරදුන් දේ ඇපයෙන් ගැලවෙන්න වගේ ගසලා දමන එක සුදුසු නැහැ. බැරි බරට කරගහන්න හොඳ නැහැ. එහෙම කරගහලා තුවාල සිදුකර ගන්නවට වැඩිය මුලදිම අත්මිදීම යහපත්. “බැරිබර නොගනිත් අබරෝ” කියන ගැමි වහර මෙයට කදිමට ගැළපෙනවා. එනිසා තමන්ට බාර දුන් දෙයක් නිසි පරිදි ඉටුකර අන් අයගේ විශ්වාසය, ආදරය දිනා ගැනීමට වගේම බැරි දේවල් වලට සෘජුවම බැරි බව කියලා මුලදීම අයින් වීම හොඳයි. එයට හේතුව ඇතැමුන් උකුණන් ලවා ගල් අද්දවා ගැනීමටද උත්සහ ගන්නා නිසා. ඒ හින්දා බැරි දේට බැරියැයි පැවැසීම ලජ්ජාවට කරුණක් නොවන බව සිතන්න. බොහෝ වෙලාවට අධික තන්හාවට හැමදේම බදා ගන්න ගියොත් බිත්තර ගොඩ බදා ගත්ත ගමරාළට වෙච්ච දේ ඔබටත් වෙන්න පුළුවන් බව මතක තබා ගන්න.
යසවර්ධන රුද්රිගු
උපුටා ගැනීම ලක්බිම
