ඇස් දෙක වගේ හිටිය දෙන්නට මේ මොකද වුණේ?
“ලුණුයි බතුයි හරි කාලා කන්දක් උඩ පුංචිම පුංචි ගෙයක් හදාගෙන අපි දෙන්නා කිරි පැණියි වගේ ඉදිමු සුදෝ”.... කියලා ප්‍රෙමකරන කාලෙදි බොහෝ දෙනෙක් දහසක් සිතින් සිහින මැව්වත් ඒ සිහින ඔක්කොම සුණු විසුණු වෙලායන්නේ බැදගත්ත බෙරේ ගහන්න ගිය වෙලාවට තමයි. මේ ලිපියේ ආරම්භය පිළිබඳ ඔබ තරමක් තැති ගත්තද එහි අදහස ඔබට තේරුම් ගැනීම එතරම් ගැටලුකාරී නම් නොවන්නට ඇති. යමෙකුට එහි තේරුම තවමත් නොතේරුණා නම් මේ උත්සාහය මානසික රෝග පිළිබඳ විශේෂඥ වෛද්‍ය පුෂ්පා රණසිංහ සමඟ එකතු වී ඔබට ඒ බව පැහැදිලි කර දෙන්නටයි.
සදා නොවෙනස් ආදරය විවාහයේ බැඳීමද?
විවාහ වන බොහෝදෙනෙකුගේ බලාපොරොත්තුව ජීවිතයේ ඉදිරි කාලයටත් ඒ ආදරය දිගටම පවත්වා ගෙන යන්නටයි. නමුත් අද වනවිට බොහෝ විදෙස් රටවල විවාහ වන යුවළ වලින් 40% - 50% අතර ප්‍රමාණයක් දික්කසාද වීම සාමාන්‍ය සිදුවීමක් බවට පත්ව ඇත. මේ තත්ත්වය ලංකාව පිළිබඳ කතා කරන විට 2%ක තරම් අඩු ප්‍රතිශතයකින් කතා බහ කළ හැකියි. ලංකාව තුළ මෙම ප්‍රතිශතය අඩු වීමට හේතුවන්නේ බොහෝ සමාජ ආර්ථිකමය හේතුන් වේ. ඒ වගේම දරුවන් නිසා හෝ දරුවාට තාත්තෙක් අම්මෙක් සිටිය යුතුයි යන සමාජ ආකල්ප එකට සිටීමට අසීරු යුවළක් එක්තැන් කර තැබීමට බොහෝදුරට සමත් වන කරුණු වේ.
ඇයි අපි දික්කසාද වුණේ?
දික්කසාද වෙන්නට බොහෝදෙනෙකුට හිතෙන්නේ ඔවුනොවුන් අතරේ යම් නොගැලපීමක් තිබේ යන හැඟීම නිසයි. එසේ නොමැති නම් එකිනෙකාගේ හැඟීම් දුරස්වීම හෝ ආදරයක් නොමැති බව තේරුම් යාම නිසාවෙනි. මීට අමතරව ඔවුනොවුන්ට අනියම් සබඳතා ඇති බව සැකකර ඒ නිසා රණ්ඩු ගැටුම් ඇති කර ගැනීම නිසයි.
අතීත සමාජයේ දික්කසාද ඉඩක් නොතිබුණද?
අතීත සමාජය තුළ පුරුෂයාට තරම් ශක්තිමත් බවක් කාන්තාවට හිමි නොවිණි. එදා තමාගේ ආරක්ෂාව හා දරුවන්ගේ ආරක්ෂාව, සමාජයෙන් ඇතිවන යහපත් නොවන ප්‍රතිචාර, ආර්ථික ස්ථාවර බව ආදිය අහිමි වේ යන බිය නිසා බොහෝවිට කාන්තාවන් දික්කසාද වීමට හේතු තිබුණත් ඒවා ඉවසා සිටියා. නමුත් වර්තමානයේ පුරුෂයන් හා උරෙන් උර ගැටෙන කාන්තාවන්ට එවන් වූ සුළු හේතුවක් නිසා හෝ තම සිතේ යම් සැකයක් ඇති වූවොත් දරා ගැනීමේ හැකියාවක් ඇති නිසා ඉහත ගැටලුකාරී තත්ත්වවලට නොබියව මුහුණ දිය හැකියි.
අද කාලේ හොඳ විවාහයක් යනු,
වර්තමානය වනවිට හොඳ විවාහයක් සඳහා අඹුසැමි යුවළ අතර හොඳ සන්නිවේදනයක් තිබීම අත්‍යවශ්‍ය කරුණක්. ඒ වගේම දෙදෙනා අතර සුළු වශයෙන් ආකල්පමය වෙනස්කම් ඇතිවිය හැකි වුවත් එකිනෙකා අතර සුහදතාව ආරක්ෂා කරගත හැකිවන්නේ එම ආකල්ප අනෙකාටත් ගැලපෙන ආකාරයට හැඩගස්වා ගැනීමෙන් හා එම අදහස්වලට ගරු කිරීමෙනි.
පැය 24ම දින 7ක් නොවෙනස් ආදරයක්...
දවසට පැය 24කි. සතියට එවැනි දින 7කි. මේ මුළු කාලයම තමාගේ බිරිඳ එසේත් නැත්නම් සැමියා සැමවිටම සමාන සිතුවිලිවලින් සිටිනු ඇතැයි බලාපොරොත්තු වීම කිසිසේත් ප්‍රායෝගික නොවේ. මෙවැනි ආකල්ප පිළිබඳ විවාහ පත් යුවළ හොඳින් දැනුවත් වීම ඉතා වැදගත් වේ. එවැනි අයෙක් හැමවිටෙම සුළු සුළු වැරදි අනෙකාට සමීප වීමට යොදා ගත හැකි අවස්ථාවක් ලෙස සලකා කටයුතු කළ යුතුවේ. දෙදෙනා අතර ඉතා හොඳ අවබෝධයක් මේ අත්දැකීම් හරහා ඇතිකර ගත හැකි වේ. නමුත් ඇතැම් අය නිතරම දෙදෙනා අතර ඇති නොගැලපීම් නිතර කතාබහට ලක් කරනු ලැබේ. මේ නිසා ඔවුනොවුන් අතර අයහපත් ආකල්ප නිතර වර්ධනය වී ගැටුම් ඇතිවීම ස්වභාවිකයි.
දෙදෙනා අතර ගැටලු ඇතිවන්නේ ඇයි?
බොහෝ පරීක්ෂණ මඟින් පෙන්වාදෙන්නේ විවාහක යුවළ අතර ප්‍රධාන ගැටලුව බවට පත්ව ඇතිතේ මුදල් වියදම් කරන ආකාරය පිළිබඳ ගැටලු බවයි. එසේ ආර්ථික අපහසුතා ඇතිවන විට කාන්තාව බොහෝදුරට චෝදනාවට ලක්වන්නේ දෑවැද්දක් නොමැතිව පැමිණි නිසා බවට සැමියා පැවසිය හැකියි. (ලංකාවේ විිවාහ සංස්කෘතිය පිළිබඳ සැලකීමේදී) දරුවන්ට අධ්‍යාපනය ලබාදෙන ආකාරය, ඔවුන් ඇතිදැඩි කිරීමේදී ඇතිවන ගැටලුද නෑදෑයන්, දරුවන්ගේ පාසැල් කටයුතු, යහළුවන් ආදී දේ නිසාත් විවිධාකාර ගැටුම් ඇතිකර ගත හැකියි. තවද ලිංගික ජීවිතය බොහෝ යුවළකට ගැටලු ඇති කරවිය හැකියි. යම් යුවළක් විවාහ වී කාලයක් ගත වනවිට විවාහයේ මුල් කාලයේදී එකතු වූ අයුරින් ඊට පසු කාලීනවද එකතු වීම විවිධ හේතු නිසා මඟහැරී යයි. ඒ වගේම එය එතරම් ප්‍රායෝගික ද නොවේ. එහිදී කාන්තාව දරුවන් ලැබීම, ඇතැම් රෝග අවස්ථා නිසා එසේ ලිංගිකව එකතු වීම සීමා කළ හැකියි. තමාගේ පුරුෂයා වෙත තිබෙන අවධානය දරුවන් වෙත යොමු කිරීම නිසාද ගැටලු ඇතිවිය හැකියි. ඒ නිසා තම බිරිඳ තමාව ප්‍රතික්ෂේප කරන බවත් ඇයට වෙන සම්බන්ධයක් ඇති බවත් සැමියා සැක සිතිය හැකියි. එවැනි අදහස් විවාහ සම්බන්ධය බිඳ වැටීමට ප්‍රබලම හේතුවිය හැකියි. ඒ වගේම ඇතැම් කාන්තාවන් සැමියා සමඟ ඇති වූ සිත් රිදීමක් නිසා ඔහු සමඟ ලිංගික එකතුවීමට අකමැති වීමෙන් තව තවත් සැමියාට තම ඇසුරින් ඈත් කර තබයි. නමුත් ඉන් සිදුවන්නේ දෙදෙනා අතර පරතරය තවත් වැඩි වීමයි.
අනියම් ඇසුරක් ඇත්නම් ඊට හේතුව,
සැමියා බිරිඳට හොරෙන් හෝ බිරිඳ සැමියාට හොරෙන් වෙනත් සම්බන්ධයක් පවත්වනවා නම් ඒ පිළිබඳ හේතු සොයා යාමේදී පැහැදිලිවන්නේ එකිනෙකා අතර තිබෙන ආත්මීය බැඳීමෙන් දුරස් වී ඇති බවයි. මේ සඳහා ඇතැම් විට දෙදෙනාට සමීපව කටයුතු කිරීමට ඇති කාලය ප්‍රමාණවත් නොවීම, ගෙදර වැඩ කටයුතු අධික වීම ආදී හේතූන්ට බල පැවැත්විය හැකි වේ.
එකිනෙකා අතර විශ්වාස විවාහයේ පදනමද?
විවාහය යනු එකිනෙකා අතර විශ්වාසය මත ගොඩනැඟුණ බැඳීමකි. එහිදී එම බැඳීම ආරක්ෂා කිරීමට හැමවිටම විවාහ පත් යුවළ සුපරීක්ෂාකාරීව කටයුතු කරයි. මෙය ස්වභාවිකව යහපත් සබඳතාවක් පවත්වා ගෙන යාමට සුදුසු තත්ත්වයක් නොවේ. ඒ නිසා දෙදෙනා අතර පවතින දුරස් භාවය වඩාත් වැඩිවිය හැකියි. ඒ නිසා විවාහපත් වූ යුවළක් කටයුතු කළ යුත්තේ ඉතා හිතවත් මිත්‍රයන් මෙනි.
සතුට යනු ඔබ කරන සහ නොකරන දේ ප්‍රතිඵලයි.
සතුට ඇති කිරීම හෝ නැති කිරීම පිටත සිටින කිසිවෙකුට බලෙන් කළ හැකි දෙයක් නොවේ. එය ඔබ විසින්ම තීරණය කළ යුතු දෙයක්. ඒ නිසා යමෙක් ඔබව රිදවනවා නම් එය තේරුම් ගෙන කටයුතු කරන ආකාරය මත ඔබ විසින් ඔබගේ සතුට හෝ දුක නිර්මාණය කරගනු ලබයි. ඒ නිසා විවාහයේදී ඔබට ඇතිවන ගැටලුවලට මුහුණ දෙන ආකාරය අනුව දුක සතුට මෙන්ම ඔබගේ ජීවිතවල සාර්ථක අසාර්ථක බවද තීරණය කරගත හැකි වේ.
මානසික රෝග පිලිබඳ විශේෂඥ වෛද්‍ය පුෂ්පා රණසිංහ
උපුටා ගැනීම දිනමිණ
