විභාගේ අසමත් වීම කියන්නේ ජීවිතය කඩාවැටීමක් නෙමෙයි
මේ දවස්වල බොහෝ දරුවො දෙමාපියො විභාග ප්‍රතිඵල ගැන කතා කරනව. උසස් පෙළ ප්‍රතිඵල ඇවිත්නෙ සමහරු පාස්වෙලා හිත සතුටින්. තවත් සමහරු අසමත් වෙලා දුකෙන් කලකිරීමෙන් සහ තදබල අපේක්ෂා භංගත්වයකින් කතා කරනව. ඒ අසමත් වූ සිසුන් විතරක් නෙමේ එයාලගෙ මව්පියොත් හරිම වේදනාවෙන් ඉන්න බවකුත් පේන්න තියනව. අන්න ඒ වේදනාවෙන් කලකිරීමෙන් ඉන්න යොවුන් දූ දරුවන්ටත් ඒ අයගෙ මව්පියන්ටත් හිතල බලන්න පුංචි අදහස් කීපයක් ඉදිරිපත් කළා නම් හොඳයි කියල හිතුන. ඇත්ත. ඔබ දැනට ලොකු වේදනාවකින් කලකිරීමකින් ඉන්න බව ඇත්ත. හැමදේම නිෂ්ඵලයි කියල අධෛර්යය වෙලා ඉන්න එක ඇත්ත. ගුරුවරුන්ට, විභාග පැවැත්වූ අයට තදින් දෝෂාරෝපණය කරනව වෙන්නත් පුළුවන්. සමහරවිට තමන්ටම දොස් පවරගන්නව වෙන්න පුළුවන්. මේ විභාග ක්‍රමය අසාධාරණයි කියල හිතෙන්නත් පුළුවන්. ඒක සාමාන්‍ය දෙයක්. හිත වේදනාවෙන් පිරුණු වෙලාවක ඒක සමනය කරන්න මිනිස්සු නොයෙකුත් දේවල් කරනව. සමහර දේවල් කරන්නෙ තමන්ම නොදැනුවත්ව. ඕනෑම තුවාලයක් සනීපවෙන්න දවස් කීපයක් ගතවෙනව වගේ ඔබ මේ විභාගය අසමත්වීම ගැන තියන වේදනාව කලකිරීමත් වියැකෙන්න දින ගණනාවක් වුණත් ගතවෙන්න පුළුවන්. හැබැයි මෙහෙම දේකුත් තියනව. ඔබ ඔය දැන් ඉන්න තත්ත්වය ගැන හොඳට හිතල බලල, හිතේ වේදනාව ටිකෙන් ටික වියැකෙන අතරතුර ඔබට පුළුවන් ඉතා ප්‍රබල තීරණයකට එළඹෙන්න. ඔබේ හෙට දවස ගැන ඉතා වටිනා වැදගත් තීරණක් ගන්න ඔබට පුළුවන්. මොකක්ද ඒ තීරණය? මේ ප්‍රතිඵල නිසාවෙන් ඔබේ අනාගත ජීවිතය නිකම්ම කාලකන්නි වෙලා යන්න දෙනවද, එහෙම නැත්තං අනාගතය ඉතා වාසනාවන්ත සෞභාග්‍යමත් එකක් කරගන්න තීරණය කරනවද? කියන එක ඔබට තීරණය කළ හැකි සන්ධිස්ථානයකයි ඔබ දැන් ඉන්නෙ. විභාගෙ ෆේල් වෙලා ඉන්දැද්දි කොහොමද සෞභාග්‍යයක් ගැන හිතන්නෙ කියල ඔබ අහයි. නෑ. ඒක වැරදි ප්‍රශ්නයක්. විභාගයක් අසමත් වුණා කියල මම කඩාවැටෙන්නෙ ඇයි? ඇයි මට අනාගතය සෞභාග්‍යමත් කරගන්න බැරි? කියන ප්‍රශ්න තමයි ඔබ අහන්න ඕන. හොඳට මතක තියාගන්න. විභාගයක් අසමත් වුණා කියන්නෙ ජීවිතය පරාජිත වුණා කියන එක නෙමේ කොහෙත්ම. විභාගයක් කියන්නෙ එක්තරා කඩුල්ලක් මිසක් ජීවිතය නෙමෙයිනේ. ඇත්ත. ඔබේ ජීවිතේ වටිනා කාල සීමාවක් මේ විභාගය වෙනුවෙන් කැප කළ බව ඇත්ත. ඔබේ නින්ද, ශ්‍රමය, මිල මුදල් කැප කළ බව ඇත්ත. ඔබේ විනෝදාංශ, විවේකය ඒ වෙනුවෙන් පරිත්‍යාග කළ බව ඇත්ත. ඒ සේරම කැපකිරීම් කරලත් මෙහෙම අසමත්වීම දරාගන්න බැරි වේදනාවක් කලකිරීමක් ගෙන ඒමත් පුදුමයක් නෙමේ. ඒත් දැන් ඒ වේදනාව, ඒ කලකිරීම, ඒ අසමත්වුණා කියන සිතිවිල්ල ගැන ඕනෑවට වඩා හිත හිත කාලෙ කාදමන එක නමෛයි බුද්ධිමත් කෙනෙක් ලෙස ඔබ කළ යුත්තෙ. විභාගය අසමත්වීම කියන්නෙ ජීවිතය අසමත්වීමක් නෙමේ කියන කරුණ අවබෝධකරගන, ‘නැහැ මම පරාජිතයෙක් වෙන්නෙ නෑ... මම ජයග්‍රාහකයෙක් වෙනවාමයි’ කියන අධිෂ්ඨානයෙන් නැගිට පෙරට යාමයි ඔබෙන් සිදුවිය යුත්තෙ. විභාගයක් පාස්වුණේ නෑ කියන්නෙ ඔබ අදක්ෂයෙක් බුද්ධිමත් නැති කෙනෙක් කියන එක නෙමේ. කොහේ හරි වැරදීමක් වෙන්න ඇති. ඔබේ යම් යම් අඩුපාඩු දුර්වලකම්, තියෙන්න ඇති. ඒත් ඒවා හදාගන්න පුළුවන් වැරදි මිසක් ජීවිතය කාබාසීනියා කරන හේතුවක් විය යුතු නැහැ කොහෙත්ම. මෙහෙමත් හිතන්නකො.
විභාග අසමත් වුණේ ඔබෙත් උනන්දුව කැපවීම මදිකම නිසා වෙන්නත් පුළුවන්නෙ. නේද? සමහරවිට ඔබ ඒ තරම් සැලසුම් සහගත ලෙස විභාගයට සූදානම් නොවුණා වෙන්නත් පුළුවන්. ඉගෙනීමට කැපවීමෙන් යොමු නොවුණා වෙන්නත් පුළුවන්. එහෙම නම් මේ විභාග ප්‍රතිඵල තුළින් ඔබට කියන පණිවුඩය ඔබ තව මීට වඩා කැපවුණා නම් ඔබට ජයගන්න බැරිකමක් නෑ කියන එකයි. අනිත් අතට විභාගෙ ඇත්තටම අසාධාරණ විදිහට පැවැත්වුණා වෙන්නත් බැරිකමක් නෑ. විශේෂයෙන් අපේ රටේ බොහෝ විභාගවල අක්‍රමිකතා අනන්තවත් තිබුණු බව පැහැදිලිව ඔප්පුවෙලත් තියනව. ප්‍රශ්නපත්‍ර බලන අප වැරදි තීන්දු දෙනව වෙන්නත් පුළුවන්. සමහර නැවත විමර්ශනවලදී කලින් අසමත් වූ සිසුන්ට සාමාර්ථ ලැබෙනව. ඒ කියන්නෙ මුල් වතාවෙ උත්තර පත්තරේ හරියට බලල නෑ කියන එකනෙ. එහෙම අසාධාරණකමුත් විභාගවලදී සිද්ධවෙනව. අනිත් එක ලිඛිත විභාගයක් කියන්නෙ දැනුම හරියටම පරීක්ෂාකර බැලීමට සීයට සීයක්ම නිවැරදි මිනුම් දණ්ඩක් නෙමේ. හොඳට දැනුම තියන ළමයි අසමත් වෙන අවස්ථා තියනව. බහුවරණ ප්‍රශ්න වගේ ප්‍රශ්නවලදී කිසි දැනුමක් නැති සිසුවෙක් වුණත් අහම්බෙන් සලකුණු කරන පිළිතුරු නිවැරදි ඒවා වීම නිසා සමත්වෙන අවස්ථාත් තියෙන්න පුළුවන්. සමහර දැනුම තියන දක්ෂ සිසුන්ට විභාගවලදී හරියට ලියාගන්න බැරිවෙන අවස්ථා තියෙන්න පුළුවන්. සමහර සිසුන් විභාගවලට මුහුණදීමේදී මානසික දුර්වලතාවන්ට මැදිවෙන අවස්ථා තියෙන්න පුළුවන්. මේ හැමදේකින්ම කියන්න උත්සාහ කළේ සමහර විට ඔබේ විභාග ප්‍රතිඵලත් අසාධාරණ වෙන්නත් ඉඩ නැත්තෙමත් නෑ කියන අදහසයි. කෙසේ වෙතත් මොන හේතුවක් මත අසමත් වුණත් ඔබ ඒ ගැන කලකිරීමෙන් ළතවෙන එක නම් සම්පූර්ණයෙන්ම නිෂ්ඵලයි. ඒ ටික පමා නොවී ඉක්මණින්ම අවබෝධ කරගැනීම ඔබට වාසියි. කිසි දෙයක් ගැන ළතවෙන එකේ තේරුමක් නෑ. වෙච්ච දේ හොඳපිට පෙරළගන්න මාර්ගයක් හදාගැනීමයි ඒ ළතවෙනව වෙනුවට කළ යුත්තෙ. විභාගය අසමත් වුණා කියන්නෙ ලෝකෙ අන්තිම වුණා කියන එක නෙමේනෙ. එක්කො මීට වඩා හොඳ සූදානමකින්, හොඳ කැපවීමකින් ජවයකින් ආයෙ විභාගෙ කරනව කියල අධිෂ්ඨානයෙන් අද ඉඳලම ක්‍රියාත්මකවෙන්න. ලංකාවෙත් පිටරටත් උසස් තැන්වලට ආපු බොහෝ අය දෙපාර තුන්පාර නෙමේ ඊටත් වඩා වාර ගණනක් විභාගවලට ලියූ අවස්ථා තියෙනව. සමහර කථිකාචාර්යවරුන්, සාර්ථක ව්‍යාපාරිකයින්, විද්‍යාඥයින් පවා විභාග අසමත් වෙලා නැවත නැවත විභාගවලට පෙනී ඉඳල සමත්වෙලා තියනව. අනිත් එක හැමෝටම හැමදේම කරන්නත් බෑනෙ. බොහෝ මව්පියො දරුවන්ව වෛද්‍යවරු, ඉංජිනේරුවරු, නීතිඥයො වගේ සීමිත වෘත්තී කීපයකට තල්ලු කරන්න හදනව මිසක් දරුවන්ගෙ දක්ෂතා අඳුනාගන ඒ අයට සාර්ථකව සතුටින් කළහැකි වෘත්තීන් වෙත යන්න ඉඩ හදල දෙන්නෙ නෑ. ඒක බලවත් වරදක්. විභාගයක් අසමත් වුණා කියන්නෙ ඔබ අදක්ෂයෙක් කියන එක නෙමේ. ඔබට ජීවිතය ජයගන්න බෑ කියන එක නෙමේ. ඔබ ඔබේ දක්ෂතා හඳුනාගන දියුණු කර ගත්තොත් විභාග ගණනාවක් පාස් කරපු අයටත් වඩා අතිශයින් සාර්ථක පුද්ගලයෙක් බවට පත්වෙන්නත් බැරි නැහැ. මාළුන්ට, ඉබ්බන්ට, අශ්වයින්ට පියාඹන්න බෑ. ගස් නගින්න බෑ. ඒත් වඳුරන්ට ගස් නගින එක කජ්ජක් නෙමේ. අශ්වයින්ට දුවන එක වැඩක් නෙමේ. ඒ නිසා හැම සතාටම එකම විභාගයක් තියල දක්ෂකම් මැනගන්න බෑ. ඒ වගේ ඔබේ දක්ෂතා විභාගයකින් මැනගන්න පුළුවන් ඒවා නොවෙන්න පුළුවන්. ඒත් ඔබටත් අනිත් අයට වඩා දක්ෂ ලෙස කළ හැකි මොකක් හෝ දක්ෂතාවක් අනිවාර්යයෙන්ම තිබිය යුතුයි. ඒක හඳුනාගන මතුකරගන දියුණුකරගන්න අධිෂ්ඨාන කරගන්න. ඒ නිසා නැවතත් කියන්නෙ විභාගයක් අසමත්වීම කියන්නෙ ජීවිතය අසමත්වීමක් නෙමේ. එක්කො ආයෙ ලියන්න. නැත්නම් ඔබේ දක්ෂතා අඳුනාගන විකල්ප මාර්ගයක යන්න. මොනව කළත් දැඩි අධිෂ්ඨානයකින් ජීවිතේ ජයගන්නවාමයි කියන ස්ථාවරයේම ඉන්න. හිත ශක්තිමත් කරගන්න. විභාගයක් හින්ද ජීවිතේ කඩාවැටෙන්න දෙන්න එපා.
මයිකල් ඇන්ජලෝ
උපුටා ගැනීම ලක්බිම
