ඉවසන්න හොඳ හිත පතුරවන්න නිරෝගීව දිවි ගෙවන්නට එය හොඳම මඟයි
දිවි රටාවේ අහිතකර හුරුපුරුදු නිසා ඇතිවන විවිධ රෝගාබාධ - හෘදයාබාධ, ආඝාතය, අධික රුධිර පීඩනය, දියවැඩියාව, සමහර පිළිකා ආතරයිටීස් ඇතිවීම කෙරෙහි මානසිකමය ක්‍රියාකාරකම් ඇති කරන බලපෑම ප්‍රබල බව වර්තමාන පිළිගැනීමය. මානසික අවපීඩනය, විෂාදය, සමාජයීය වශයෙන් කොන්වී තනි වීම, හදිසි කෝපය, මානසික ආතතිය, සාංකාව හා කාංසාව ආදී මානසික ක්‍රියාකාරකම් මෙම අහිතකර තත්ත්ව අතර පෙරමුණේ වෙයි. මෙහි අනෙක් පැත්ත දෙස ඒ ආකාරයෙන්ම බැලිය නොහැකිද? හිතකර මනෝචර්යාවන් සතුටෙන් සිටීම, ලද දෙයින් තෘප්තිමත් වීම, ඉවසීම, යහපත් චිත්ත වේගයෙන් මිදීම, භාවනා කිරීම, අධ්‍යාත්මික සතුටක් අත්විඳීම සිනාසීම ආදී මෙම රෝග වැළැක්වීමේ හැකියාවක් ඇතිනම් අවදානම පහත හෙලීමේ හැකියාවක් නොපෙන්වන්නේද? යන්න විද්‍යාඥයන් අතර කුතුහලය ජනිත කර ඇත. මහජන සෞඛ්‍යය පිළිබඳ හාර්වර්ඩ් විද්‍යාතනයේ (ඇමරිකාවේ) ලෝරා කැබ්සන්ස්කි සහ පීට්ස්බර්ග් විශ්වවිද්‍යාලයේ වෛද්‍ය පීඨයේ රෙඛෙකා තර්ස්ටන් යන මමෝ විද්‍යාඥවරියන් දෙපළ සිය පර්යේෂණය යොමු කළේ හිතකර චිත්තවේගී සක්‍රීය හා සජීවි බවක් සහිත පුද්ගලයන් තුළ, තම ශක්තිය (හැකියාව) යහපැවැත්ම පිළිබඳ හැඟීම් මෙන්ම තම චිත්තවේගයන් නියාමනය කර ගැනීමට ඇති හැකියාව විමසීමටය. හිතකර චිත්තවේගී සක්‍රියතා සජීවි බව විමසූ මෙම පර්යේෂණයට නිරෝගී පුද්ගලයන් 6000ක් ලක්කර ප්‍රශ්න මාලාවක් හරහා පෙර සඳහන් කළ සාධක ඔස්සේ අධ්‍යයනය සිදු කළ මෙම පර්යේෂකයන් ලද පිළිතුරු මත තම ග්‍රහකයන් චිත්තවේග සක්‍රියතා සජීවීත්වය පහළ, මධ්‍යම හා ඉහළ වශයෙන් වෙන්කරනු ලැබීය. එම ප්‍රශ්න හය මෙසේය.
- උදෑසන නින්දෙන් අවදි වන විට ඔබට නැවුම් බවක් හා විවේකී බවක් දැනුනේද?
- ඔබගේ පෞද්ගලික ජිවිතය ගැන ඔබ සතුටට සෑහීමකට පත්ව සිටින්නේද?
- ඔබගේ ශක්තිමත් බව සහ කාර්යක්ෂම බව සහ ඉදිරිපත් වීමේ හැකියාව ගැන ඔබ සිතන්නේ කෙසේද?
- ඔබගේ එදිනෙදා ජීවිතය ඔබට ආශ්වාදජනකද?
- ඔබගේ හැසිරීම්, සිතුවිලි, චිත්තවේග සහ හැඟීම මනා පාලනයක් ඔබ සතුවේද?
- ඔබට ඔබ ගැනම සෑහීමක් ස්ථායිබවක් හැගෙන්නේද?
මෙම සක්‍රියතා විමසුමේදී ඉහළම ලකුණු වර්තා කළ පුද්ගලයන් තුළ හෘදයාබාධ, ඇන්ජයිතා වැන පපුවේ කැක්කුම්, කිරීටක හෘද රෝග, දියවැඩියාව ආදී රෝග තත්ත්වයන් හා රෝග අවදානම් නොතිබු හෝ පැවතුණේ නම් ඒ අවම මට්ටමින් බව හෝ පර්යේෂකයෝ ........ චිත්තවේගී සජීවි බව ඉදිරියේ ආතතියේ බලපෑම් අහිමිවන බව විද්‍යාඥයන්ගේ අදහසය. එය ඍජුලෙසම හෘද රෝග අඩු කිරීමට බලපායි. ආතතිය නම් චිත්තවේගී ශක්තියට, රුධිර පීඩනය ඉහළ දැමීමට, හද ගැස්ම වේගවත් කිරීමට, ස්නායු පද්ධතිය ඇවිස්සීමට මෙන්ම ශරීර අභ්‍යන්තර ප්‍රදාහමය තත්ත්වයන් ඇති කිරීම ආදී හෘදයාබාධ කුළුගන්වන ප්‍රවේගයන් උපදවිය හැකිය. යහපත් චිත්තවේගී හැඟීම් තුළින් මෙම අහිතකර තත්ත්වයන් පසු බැස්වීමට පුළුවන් බව අධ්‍යයන මඟින් සානාථ කර ඇත. යහපත් චිත්තවේග හා හැඟීම් සහිත පුද්ගලයන් සමාජය තුළ තනි නොවේ. කොන්වීමට භාජනය නොවේ. ඔවුන් බොහෝවිට දුම්පානයෙන් හා අධික මත්පානයෙන් තොරය. ආහාරයට ගිජුකමක් නොදක්වන නිසා අධික තර බවට පත් නොවෙති. ලද දෙයින් තෘප්තිමත් වන නිසා ද්වේශයෙන් තොරය. නිතර අධ්‍යාත්මික කාර්යයන්හි නරතවන නිසා සිත සන්සුන්ය. ප්‍රකෝප නොවේ. ඉවසීමෙන් අනුන්ට සවන් දීමට සමත්ය. ව්‍යායාම ගැනීමට යොමුවෙයි. මේ සියල්ල එක්තැන් වූ විට ලෙඩ රෝග උවදුරු දුරලන, ප්‍රතිශක්තිය වර්ධනය කරවන බලවේගයක් හිමිකර ගැනීමට සමත් වෙති.
ජීවිතය දෙස ඔබ හෙලන බැල්ම නිගමනය කිරිමට ඔබගේ දෙමාපියන්ගෙන් උරුම වූ ජාන, මුල් කාලයේ ලද ඉගෙනුම, පවුලේ සහ වෙසෙන සමාජ පරිසරය ආදිය හේතුවන බව සත්‍යයය. ඔබ ධනාත්මක හැඟීම් සහිත වූවෙක් ද ඍනාත්මක හැඟීම් සහිත වූවෙක් ද ඒවා "ගලේ කෙටූ අකුරු" ලෙස කවදාවත් වෙනස් කළ නොහැකි දේ ලෙස සිතීම වැරදිය. එසේ නම් ඔබටද හිතකර, ධනාත්මක සිතුවිලි නැතිනම් සක්‍රිය සජීවි චිත්තවේග හා හැඟීම් සහිත පුද්ගලයකු විය හැකිය. ඒ සඳහා ගත හැකි පියවර බොහෝය. මෙහි පහත දැක්වෙන්නේ ඉන් කිහිපයක් පමණය. යෙදෙන කාර්යයන්වලින් ඈත්ව ඔබට සතුට, තෘප්තිය උරුම කරන කාර්යයක දිනක් හෝ ඉන් යම් කාලයක් හෝ නිරත වන්න. විනෝද ගමනක් යෑම, පන්සල් පල්ලි යෑම, වනයකට යෑම, අභය භූමියකට යෑම, මුහුදු වෙරළකට - උද්‍යානයකට යෑම ආදි දේ් අතර ඔබ සිත්ගත් ස්ථානයකට යෑම කළ හැකිය. එසේ ගිය ගමනකදී සිත් ගත් සිද්ධියක්, දර්ශනයක් මනසේ රඳවා ගන්න. විවේක විටෙක එම මතකය ආවර්ජනය කරන්න. පුංචි "ඩයරියක්" පොත් පිංචක් ළඟ තබා ගන්න. පෙර සඳහන් කළ කාර්යකදී මෙන්ම එදිනෙදා ජීවිතයේ අත්දුටු මිහිරි අත්දැකීමක් හෝ මාධ්‍යයෙන් ලැබුණු අලුත් යමක් එවැනි පොතක සටහන් කරන්න. ඉඩ ලද විටෙක එම පොත කියවීමටද ඔබට ඉමහත් ආශ්වාදයක් ලැබිය හැකිය. පෙර අත්දැකීම නැවත නැවතත් විඳීමට එවිට ඔබට හැකිවේවි. ඡායාරූප ඇල්බමයක් පවත්වා ගෙන යෑමෙන්ද ඔබට මෙම අවස්ථාව ලබාගත හැකිය. සමහරවිට මෙම තොරතුරු අනෙක් අය සමඟ හුවමාරු කර ගැනීම තුළින් ඔබට තවත් අපූරු වූ වින්දනයක් ලද හැකිය. ඔබට ආවේනික වූ හැකියාවන්ගෙන් ඵල ලබන්න. ඔබ අද වෛද්‍යවරයෙකු හෝ ඉංජිනේරුවෙක් වුවද ඔබගේ සහජ දක්ෂතාව ඇත්තේ චිත්‍ර ඇඳීමට, ඡායාරූපකරණයට, ගීත ගායනයට හෝ සංගීත වාදනයට විය හැකිය. වෘත්තීයමය එසේම වෙහෙසකර වෘත්තීයෙන් මිදී සහජ හැකියාවට පණ දෙන්නටද අවස්ථාව උදාකර ගන්න. ඔබගේ ශක්තිය හා හැකියා වෙනත් මං පෙත්වලටද යොමු කරන්න. සාමාන්‍යයෙන් නිරත වන ක්‍රියාවන්ට අමතරව කලා, ආගමික, ස්වේච්ඡා, ආදී වශයෙන් වෙනත් කාර්යයකට යොමු වීමද ඔබට සතුටත්, ආශ්වාදයත් හිමි කිරීමට සමත්ය. සෑම දෙයක්ම වැරදි දෙස නොබලා, පැත්ත බැලීමට ඔබට හැකිනම්, නිරෝගී ජිවිතයක් සඳහා වන වැදගත් පියවරක් ඔබ තබා අවසන්ය.
තුසිත මලලසේකර
උපුටා ගැනීම දිනමිණ පුවත් පත
