Missed Call ආදරයෙන් ජීවිතය Cut කර නොගැනීමට නම්....
ආදරය, ප්‍රේමය තරම් තරුණ හදවත් තදින් වෙලාගනු ලැබූ සංවේදී හැඟීම් ලොව නොමැති තරම්ය. එහෙයින් තුරුණු හදවතට ආදරය, ප්‍රේමය අවැසිය. වේගයෙන් දියුණු වන ලෝකය තුළ ආදරයේ හැඩතල තාක්ෂණය මගින් ප්‍රබල වෙනසකට බඳුන් කර ඇත්තේ “දුරකථනය” නූතන ආදරය තුළට සිරකරවීම මගිනි. එහෙයින් නූතන ආදරයේ පැවැත්ම තීරණය වීම කෙරේ දුරකථනය ප්‍රබල ලෙස බලපානු ලබයි.
වර්තමානයේ දුරකථනය තුළින් ආදරය සොයා යෑමට පුරුදුව සිටින තරුණ කොටසක්ද නැතුවාම නොවේ. දුරකථනය මගින් අහඹු ලෙස සිතින් නිගමනය කරන ලද අංකවලට ඇමැතීම, නාඳුනන අංකවලට මිස්කෝල් ගැසීම, කෙටි පණිවුඩ යැවීම යනාදී උපක්‍රමයන් දුරකථන ආදර සබඳතා ඇතිකරගැනීම එවැනි බොහෝ පිරිස් අනුගමනය කරන සුලභ උපක්‍රමයන් වේ. මෙකී උපක්‍රමයන් මගින් දුරකථන ආදර සබඳතාවකට පදනම දමා ගැනීම සිතන තරම් ලෙහෙසි පහසු නොවේ. මන්දයත් එය අදාළ අංකය සතු ග්‍රාහකයාගේ ප්‍රතිචාරය මත තීරණය මත බැවිනි. යහපත් ප්‍රතිචාරයක් ග්‍රාහකයා වෙතින් ලැබිම දුරකථන ආදරයක් ඇතිකරගැනීමට රුකුළක් වන අතර, ග්‍රාහක ප්‍රතිචාරය අයහපත් නම් එකී සබඳතාව බිඳවැටීමට එය හේතුවනු නිසැකය. කෙසේ හෝ වේවා දුරකථනය මගින් පෙම් සබඳතා ඇතිකරගැනීම හා එවැන්නක් පවත්වාගැනීම තුළ ඇත්තේ දැඩි අවිනිශ්චිතතාවයකි. නිතර හමුවන හොඳින් දන්නා හඳුනන පුද්ගලයන් කෙරේ පවා විශ්වාසය තැබිය නොහැකි වාතාවරණයක් පවත්නා වූ මෙකල හුදෙක් දුරකථනයකින් මිත්‍රත්වයක් ගොඩනගාගත් පමණින්, නිතර කතාබස් කළ පමණින්, නාඳුනන පුද්ගලයකු කෙරේ විශ්වාසය තබන්නේ කෙසේද? එබැවින් අපට ස්ථීර ලෙසම දුරකථන ආදර සබඳතා පිළිබඳව දෙවරක් සිතා බැලීමට සිදුවේ. දුරකථන ආදර සබඳතා පිළිබඳ මෑත කාලයේ මාධ්‍යවල පළවන පුවත් වාර්තා දෙස හැරී බලන කළ ඉන් ගම්‍යවන කරුණු ඉතා කනගාටුදායක වේ. මෙවැනි සබඳතා නිසාවෙන් බොහෝ තරුණියන්ට තමන්ගේ ගෞරවාන්විත බව පවා අහිමිව ගොස් ඇත. ඇතැම් තරුණියන්ට සිය ජීවිතයෙන් පවා වන්දි ගෙවීමට මෙවන් දුරකථන ආදර සබඳතා හේතුවී ඇත. එමෙන්ම සමහර තරුණියන් මෙවන් සබඳතා හමුවේ නොමගට වැටී දිවිය අඳුරු කරගත් අවස්ථාද නැතුවාම නොවේ. නූතන තාක්ෂණයේ දියුණුව තුළ දුරකථන තුළ පවත්නා වූ Effects, Magic Voice මගින් විවිධ සංඛ්‍යාත පරාසයන් තුළ කටහඬෙහි ඇතිකරනු ලබන සුළු වෙනස්කම් මත පුද්ගලයකුගේ අනන්‍යතාව පවා නිසිලෙස හඳුනාගැනීම අපහසු වේ. එහෙයින් පිරිමියකුට ගැහැනු කටහඬක් මෙන්ම, ගැහැනියකුට පිරිමි කටහඬක් මෙතුළින් ලබාගත හැක. එබැවින් එවැනි අවකාශයක් තුළ දුරකථනයක් මගින් පුද්ගලයකු මුලාවට පත්කිරීම නූතනයේ ඉතා සරල දෙයක් බවට පත්ව ඇත. ඒ නිසා දුරකථන තුළින් ඇතිකරගනු ලබන ආදර සබඳතා පිළිබඳව තවත් වරක් සිතාබැලිය යුතු කාලය එළැඹ ඇත.
උපුටා ගැනීම ලක්බිම පුවත්පත
