ඔබ දියුණුව කරා ගමන් කරන කෙනෙක් නම් ඔබට අවශ්‍ය මානසික මෙවලම් කීපයක්
දියුණු වෙන්න, ජීවිතය සාර්ථක කරගන්න අකමැති කෙනෙක් නෑ. හැමෝම දැනුවත්ව හෝ නොදැනුවත්ව උත්සාහ කරන්නෙ දියුණු වෙන්න. ඒත් දියුණු වෙන්න සාර්ථක වෙන්න ආසාව තිබුණට බොහෝ දෙනෙක් ඒ සඳහා අවශ්‍ය කැපවීම් කරන්න ලෑස්ති නෑ. සමහරු කම්මැලියි. සමහරු කෙටි මාර්ගවලින් දියුණු වෙන්න උපායවල් හොයනව. සමහරු අනුන්ට ගින්දර දීල අනුන්ව රවට්ටල දියුණු වෙන්න හදනව. ඒත් ඒ වගේ ගතිගුණ තියන අයට කවදාවත් නියම දියුණුවක් ලබන්න බෑ. හිතේ තෘප්තිමත් බවකින් ජීවත් වෙන්න බෑ. කදුරු ගහකින් අඹ එන්නෙත් නෑ. අඹ ගහකින් කදුරු එන්නෙත් නෑ. මේ ලෝකෙ හැම දෙයක්ම සිද්ධවෙන සිද්ධාන්ත තියනව. සොබාදහමේ නීති රීති තියනව. ඒව වෙනස් කරන්න අපිට බැහැ. ඒවා හඳුනාගෙන ඒවට අනුකූලව ජීවත් වුණොත් විතරයි අපිට දියුණුවෙන්න මගපෑදෙන්නෙ. ඉතින් අපිට ජීවිතේ තෘප්තිමත් බවකින් ගතකරන්න නම්, සැබෑ දියුණුවක් ඇතිවෙන්න නම් අපි අවබෝධ කරගත යුතු කරුණු බොහෝමයක් තියනව. පිළිපැදිය යුතු සොබාදහමේ නීතිරීති තියනව. සමාජයක ජීවත්වෙද්දී අපිට හිතෙන හිතෙන හැටියට හැමදේම කරන්න බැහැ. අනිත් අය ගැනත් හිතන්න වෙනව. අපේ දියුණුව කරා යන ගමනේදී අනිත් අයට කරදරයක් බාධාවක් නොවී, හැකිනම් ඒ අයටත් දියුණුවෙන්න අත දෙමින් ක්‍රියාකරන්න ඕන. අන්න ඒ දියුණුවේ ගමනට අපට අවශ්‍ය වන ගුණාංග කීපයක් ගැන අපි දැනුවත් වෙමු. සමහර විට මේව ඔබ නොදන්න දේවල් නොවෙන්න පුළුවන්. ඒත් නැවත මතක් කර ගැනීමෙන් ඔබට දියුණුවේ ගමනට ආලෝකයක් ලැබේවි.
ඔබ ඔබම වන්න :
ඒක තමයි මූලිකම අවශ්‍යතාවය. මොකක්ද ඔබ ඔබම වන්න කියන එකේ තේරුම. අපි බොහෝ දෙනෙක් ජීවත් වෙන්නෙ අපේම ජීවිත නෙමේ. අනුන්ගේ ජීවිත. ඒ කියන්නෙ අපි බොහෝ වෙලාවට ජීවත් වෙන්නෙ අනුන්ට ඕන විදිහට. අනුන්ට පේන්න. අනුන්ගේ ප්‍රසාදය අගය කිරීම ලබාගන්න. අපේ ජීවිතයට අවශ්‍ය දේ, අප කළ යුතු දේ තීරණය කරන්නෙ අපි නෙමේ බොහෝ වෙලාවට අනිත් මිනිස්සු. මේ හේතුව හින්ද අපි අඳින ඇඳුම, පැළඳුම, ඉන්න නිවස, පදවන වාහනය යනාදී හැමදේම අපි ගන්නෙ අනුන්ගෙ අනුමැතිය ලැඛෙයිද නැද්ද කියල ගොඩක් හිතල. අපේ අවශ්‍යතාවට වඩා අපි බලන්නෙ අනිත් අයට සාපේක්ෂව අපිත් "සැලකිය යුතු අය" බව අනිත් අයට ඒත්තු ගන්වන්න. වෙන විදිහකට කියනවනම් අපි සෑහෙන දුරකට අනිත් මිනිස්සුන්ගෙ අතේ නැටවෙන රූකඩ බවට පත්වෙලා. සමාජෙ අනිත් අය කරනවට වඩා හාත්පසින්ම වෙනස් දේවල් කර කර කැපීපෙනෙන්න ජීවත් වෙන්න කියනව නෙමේ. එහෙම කරනවනම් ඒක එක්තරා විදිහක මානසික ඌනතාවක්. සමාජයක ජීවත් වෙද්දී කිසියම් එකගතාවකට අනුව ඇඳුම් පැළඳුම්, සිරිත් විරිත් යනාදිය ගැන ක්‍රියා කළ යුතු බව ඇත්ත. ඒත් අපි අනුන්ගේ අත්වල නැටවෙන රූකඩ වෙන්න අවශ්‍යතාවක් නෑ. අපිට පුළුවන් අපිම වෙන්න. අපේ මොළේ පාවිච්චි කරල අපිට හොඳයි නිවැරදියි කියල හිතෙන දේ කරන්න. අනුන්ගේ විශ්වාස, සිතිවිලි අරමුණු වැරදි වෙන්නත් පුළුවන්. ඒ නිසා අපි හැම තිස්සේම අනුන් කියන විදිහට අනුන්ට ඕන විදිහට අපේ ජීවිතේ මෙහෙයවන්න ඉඩදෙනව නම් අපි රූකඩයෝ මිසක් නිවහල්ව හිතල ආත්ම ශක්තියෙන් යුතුව ජීවත් වෙන පුද්ගලයෝ නෙමේ. ඉතින් දියුණුවෙන්න අවශ්‍ය ඕනෑම කෙනකුට අවශ්‍ය වන මුල්ම ගුණාංගය තමයි තමන් තමන්ම වීම. තමන්ගේ හිතට එකඟව ක්‍රියා කිරීම. අපි අපේ ජීවිතය, අපේ විශ්වාසය, අපේ බුද්ධිය, අපේ සිතිවිලි අනිත් අයට උකස් කරන්නෙ ඇයි? සමාජයේ අනිත් අයගේ අදහස් ගරු කරන ගමන් අපිට අපේම නිදහස් අදහස් ඇතිව ජීවත් වෙන්න බැරිකමක් නෑ.
ප්‍රසංශාවලට කෑදර වෙන්නත් එපා. පරිභව කිරීම්වලට අධෛර්ය වෙන්නත් එපා :
දියුණු වෙන කෙනකුට අගුණම කරුණු දෙකක් තමයි අනුන්ගේ ප්‍රශංසා, අත්‍පොළසන්, වර්ණනා ඇගැයීම්වලට කෑදරවෙන එක සහ අනුන්ගේ මඩගැසීම් දෝෂාරෝපණ නිසා අධෛර්යට පත්වෙන එක. දියුණුවෙන පුද්ගලයෙක් කියන්නේ හරි දේ හරියට කරන කෙනෙක්. එහෙම කෙනෙක් අනිත් අයගේ වර්ණනා පැසසුම් පස්සේ හඹායන්නෙ නෑ. ඒ ප්‍රශංසාවලින් පිම්ඛෙන්නෙ ඔළුව ඉදිමෝගන්නේ නෑ. කවුරු ප්‍රශංසා කළත් අගය කළත් නිහතමානීව ඉන්න මිසක් ඒක මහ විශාලෙට ඇගට ගන්නෙ නෑ. ඒ වගේම දියුණුවෙන කෙනකුට සාමාන්‍යයෙන් ඊර්ෂ්‍යාකාරයෝ ඉන්න පුළුවන්. ඒ අයගෙ වැඩේ හේතු නැතත් බොරුවට හරි කතන්දර හදන එක. බොරු මඩ ප්‍රචාර යවන එක. පුළුවන් නම් නොයෙකුත් විදිහෙ අගෞරව කිරීම් සමච්චල් කිරීම් බොරු කේළම් වගේ අදෘශ්‍යමාන ආයුධවලින් අපකීර්තියට අධෛර්යට පත්කරන්න උත්සාහ කරන එක. දියුණුවෙන මිනිහෙක් ඒ හැමදෙයක්ම හිනාවෙලා බාරගන්නව මිසක් සැලෙන්නේ නෑ. හිත කරදර කර ගන්නෙ නෑ. අධෛර්යෙන් පසුබට වෙන්නෙ නෑ. අපේ කිසියම් හොඳ දෙයක් නිසා මිනිසුන්ගේ ඇගැයීමක් ලබනවනම් ඒක ගැන නිහතමානීව සතුටු වුණාට කමක් නෑ. ඒත් අනුන් තමන්ව අපකීර්තියට පත්කරන්න හදනවනං හොඳම දේ ඒව එක කනකින් අහල අනිත් කනින් පිට කරල දාන එකයි.
විවේචනවලට කන්දෙන්න :
ඒවල ඇත්තක් තියනවනම්, වරදක් ඇතොත් හදාගන්න. ඒත් නොකළ වරදකට ඔබට නිකරුණේ මඩ ගැසීම් අපවාද අවලාද ඇහෙනව නම් ඔබට නෙමේ වගේ ඉන්න. ඔබට අයිති නැති දේවල් බාරගන්නෙ මොකටද ? ඉතින් ප්‍රසංශා හෝ අවලාද ඉදිරියේ සැලෙන්න එපා. ඒව අනුන් ඔබට දෙන ඒව මිසක් ඔබට අවශ්‍ය දේවල් නෙමේ. ප්‍රශංසාවලට ස්තුතිවන්ත වෙන්න. අවලාද සතේකට ගණන් නොගෙන ඉන්න. වළාකුළු වගේ ඒවා ඔහේ පාවෙලා යන්න අරින්න. ඔබ දියුණුවෙන්න පාරට බැහැපු කෙනෙක්. අනුන්ට ඔබව වට්ටන්න රවට්ටන්න ඉඩනොදී කෙළින් වැඩකරන්න. අනුන්ගේ ප්‍රශංසාවට උඩ යන්න හදන්නත් එපා. විවේචනවලට බයවෙන්නත් එපා. ගැරහීම් තුට්ටුවකට ගණන් ගන්නත් එපා.
මයිකල් ඇන්ජලෝ
