මුළුතැන්ගෙයි රහස් දන්න ඔබට හොඳම ස්වයං රැකියාව

අපේ රටේ හුඟක් ගැහැනු අය මහන්න දන්නවා. ඒ නිසා තමයි අපි මහන්න දන්න ගෘහණියන්ට තමන්ගේ හැකියාව වර්ධනය කරගෙන ඒකෙන් ආදායමක් ගන්න හැටි කියලා දුන්නේ. පසුගිය සති කිහිපයෙම අපි ඔබට බෑග්, ඇඳුම්, රිබන් මල් වගේ ඒවා මහලා කීයක් හරි අතට ගන්න හැටි කියලා දුන්නේ ඒකයි.

ඒත් අපි දන්නවා අද ඉන්න හැම ගෘහණියම මහන්න දන්නේ නෑ කියලා. ඒ නිසා මේ සතියේ අපි මහන්න දන්නේ නැති අයට ආදායමක් ලබා ගන්න කියලා දෙන්නයි හදන්නේ. මහන්න නොදන්නවා වුණාට ඔබට කෑම හදන්න පුළුවන් ඇති නේද? ගෙදර එදිනෙදා කන කෑමවලට අනුව විශේෂ කෑම ජාති මොනවා හරි හදන්න දන්නවද? කැවුම්, කිරිබත්, කොළකැඳ, සුප්, වණ්ඩු ආප්ප, රෝල්ස්, කට්ලට්, ආස්මි, මුරුක්කු, ඉඳිආප්ප, ආප්ප, මුං ඇට, කව්පි, කඩල... කොයි තරම් කෑම වර්ග තියෙනවද? ඉතින් මේ කෑමවලින් දෙක තුනක් හරි හදන්න ඔබට පුළුවන්නම් ඒකෙන් ආදායමක් ගන්න හැටි අපි කියලා දෙන්නම්. අපි හිතමු ඔබට කෑම හදන්න පුළුවන් කියලා... ඒ වගේම ඔබ කෑම හදලා අතට ගාණක් ගන්නත් කැමැතියි කියලා හිතමු... මුලින්ම ඔබ කරන්න ඕනේ ඔබට හොඳටම, රසටම හදන්න පුළුවන් කෑම වර්ග මොනවද කියලා තෝර ගන්න එක.

ඊට පස්සේ කෑම හදන්න කලින් ඒකට වෙළෙඳපොළක් තියෙනවද කියලා බලන්න. ඒ කියන්නේ විකුණගන්න පුළුවන්ද කියලා. මොකද ඇඳුම් මහනවා වගේ කෑම හදලා ඊට පස්සේ හිමින් සැරේ විකුණගන්න බෑ. කෑම තියාගන්න පුළුවන් පැය ගාණක් විතරයි. ඒ නිසා ඔබ කෑම හදන්න කලින් ඒවා විකුණගන්න හැටි ගැන කල්පනා කරන්න ඕනේ.

ඔබට පුළුවන් ඔබේ ගේ අසල තියෙන හිතවත් කඩවලින් අහන්න. ගමේ හෝ නගරයේ ඔබ හඳුනන කඩවලින් අහන්න පොඩි පොඩි කෑම වර්ග හදනවා. ගන්නවද කියලා. කඩේකට දැම්මොත් එතැනින් අනිවාර්යයෙන්ම ඔබට වෙළෙඳපොළ හැදෙනවා. 

ඒ වගේම පාසලක කැන්ටින් එකට කෑම දාන්න ඔබට පාසලේ අදාළ කෙනෙක් එක්ක කතාකරගන්න පුළුවන්. ඊට අමතරව රැකියා ස්ථානයක් තිබෙනවානම් ඒ ආයතනවල කැන්ටින් එකක් වුණත් පුළුවන්නම් කතා කරගන්න. ඒ වගේම ඔබේ ගෙදර තිබෙන්නේ පාර අයිනකනම් ඔබට ෂෝ කේස් එකක කෑම තියන්නත් පුළුවන්. ඒත් ඒකට නම් ගන්න ඕනේ දින කීපයක් තියාගන්න පුළුවන්, වගේම ඉතිරි වුණොත් ඔබේ ගෙදර අයට කන්න පුළුවන් කෑම වර්ගයක්. ඒත් ඔබට ගෙදර හෝ පාර අයිනේ තියෙන හඳුනන ගෙදරක බෝඩ් එකක් දාන්න පුළුවන් කෑම ඕඩර්ස් භාර ගන්නවා කියලා. ඒකට ඔබ හදන්න දන්න කෑම වර්ග ටිකක් ඔබේ දුරකතන අංකයත් සඳහන් කරන්න.

මේ විදියට ඔබ වෙළෙඳපොළ හදාගත්තට පස්සේ කෑම ටික ටික හදන්න පටන් ගන්න... එතෙන්දී වැඩිපුරම මිනිසුන්ට අවශ්‍ය කෑම හැදුවොත් තමයි ඔබට මේ වැඩේ දිගටම කරන්න පුළුවන් වෙන්නේ. පාසලක් ළඟ කඩේකට කෑම දානවානම් ඔබට පුළුවන් පාසල් ළමයින්ට උදේට කන්න වණ්ඩු ආප්ප හැලප වගේ දෙයක් දාන්න. කොළකැඳ හදලා දෙන්න පුළුවන්. දවල්ට ළමයින්ට ඉක්මනට කන්න පුංචි බත් එකක් දෙන්න පුළුවන්. ඒ වගේම නිතර සෙනඟ ගැවසෙන තැනක්නම් ත්‍රීවීල් පාර්ක් එකක් හරි, ඔෆීස් එකක් හරි හවස පන්තියක් හරි තිබෙන තැනක කඩයක්නම් ඔබට හවසටත් මොනව හරි දාන්න පුළුවන් උදේ ඉතිරි වුණ කෑමවලට වඩා හවස උණුවෙන් මොනව හරි කන්න හැමෝම වගේ කැමැතියිනේ... රෝල්ස්, වඩේ, වගේ දේවල් හවසට ඔබට කඩේට දාන්න පුළුවන්.

ඊළඟට අපි මතක් කරන්න ඕනේ මේ කෑම හදන්න අමුද්‍රව්‍ය ගන්නේ කොහොමද කියලා. මෙතෙන්දී පාන් පිටිවලට වඩා හාල්පිටිවලින් කෑම හදනවානම් ඔබට තියෙන ඉල්ලුමක් වැඩිවෙනවා. මොකද පාන්පිටි කෑවට වැඩක් නෑ කියලා කවුරුත් දන්නවනේ. අනෙක් පාන්පිටිවලට වඩා හාල්පිටිවලින් කෑම හදන එක ඔබටත් ලාභයි. ඒ වගේම ගුණයි. ඔබ කෑම දාන වෙළෙඳපොළේ හරි දාන බෝඩ් එකේ හරි ‘හාල්පිටි’ කියන වචනයත් දාන්න. ඊළඟට ඔබට තවත් අවශ්‍ය අමුද්‍රව්‍ය ගන්නවානම් හුඟක් බඩු තියෙන කඩේකින් ගන්න. එතකොට ලාභෙට ගන්න පුළුවන්. ඒ වගේම නිතර භාණ්ඩ විකිණෙන්නේ නැති කඩේකින් ගත්තොත් හුඟක් වෙලාවට කල් පැනපු ඒවා තියෙන්න පුළුවන්.

අන්තිමට අපි බලන්නේ ඔබ වෙලාව හොයාගන්නේ කොහොමද කියලා. ඒකට ඔබට රූපවාහිනිය බලන වෙලාව අඩු කරලා ටිකක් උදේ නැඟිටින්න වෙනවා. කොළ කැඳ වගේ දෙයක් හදනවානම් උදේට නැඟිටින්න වෙනවා. ඒත් හවසට මොනව හරි කෑම ටිකක් විතරක් ඔබ හදනවානම් ඔබට උදේම නැඟිටින්න අවශ්‍ය වෙන එකක් නෑ. ඒ වගේම උදේ කෑමක් හදනකොට ඔබට රෑට ඒකට අවශ්‍ය දේවල් සූදානම් කරලා තියලා. නිදාගන්න පුළුවන්. එතකොට උදේට ඔබට ලේසියි. මොකද ඔබ කෑම දාන්න පරක්කු වුණොත් මිනිස්සු වෙන තැනකින් කෑම අරන් යයි. එහෙම වුණොත් ඔබ කඩාවැටෙනවා.

කොහොම වුණත් මේ වැඩේදී ඔබ සැලකිලිමත් වෙන්න ඕනේ ප්‍රධාන කරුණු 4ක් තියෙනවා. මුලින්ම ඔබ පිරිසිදුවට, සෞඛ්‍යාරක්‍ෂිතව මේ වැඩේ කරන්න. කෑම අල්ලනකොට වුණත් අඬුවක් භාවිත කරන්න. නැත්නම් කෑම ගන්න අයට පිළිකුල් වෙනවා. ඊළඟට ඔබ සුහදශීලී වෙන්න ඕනේ. ආඩම්බරයෙන් හිටියොත් ඔබ ළඟට පාරිභෝගිකයො එන්නේ නෑ. අනෙක් එක තමයි ඔබ කඩිසර වෙන්න ඕනේ ඒ වගේම ඔබේ කෑම රසවත් වෙන්න ඕනේ. මේ කරුණු ටික පිළිපැද්දොත් ඔබට කෑම හදලා ඒක ස්වයං රැකියාවක් බවට පත්කරගන්න පුළුවන් වෙයි.

උපුටා ගැනීම මව්බිම පුවත්පත