තම අතපසුවීම්වලින් ඉගෙන ගන්න හැටි දරුවන්ට කියා දෙන්න

බොහෝ විට අපි අපේ දරුවන් අතින් වැරැද්දක් හෝ අතපසුවීමක් සිදුවූ විට එයට ප්‍රතිචාර ලෙස නොයෙකුත් දේවල් කරනවා. විශේෂයෙන්ම දෝෂාරෝපණය කරනවා, අවලාද නගනවා, එයින් නොනැවතී පාරක් දෙකක් ගහන්නත් දෙමාපියන් පසුබට වෙන්නේ නැහැ. ඒ විතරක් නමෛයි. එය නැවත නොකරන්න අවවාද කරනවා. සමහර දෙමව්පියන් ලොකු දේශනා කරනවා දරුවන්ට ජීවිතේ එපා වෙන තරමටම. බොහෝමයක් දෙමාපියන් තම දරුවන්ගේ අතින් අමතක වීමකින් හෝ නොදැනුවත්ව සිදුවන අතපසුවීම්වලට මෝඩයා, පිස්සා, බූරුවා වගේ ලෝකෙම ඉන්න සතුන්ගේ නම් භාවිතා කරමින් බැණ වදින අවස්ථා ඔබ කොතෙකුත් දැක ඇති. ඒ වගේම සමහර විට මේ ලිපිය කියවන ඔබත් ඔබේ දරුවන්ට මෙලෙස ආමන්ත්‍රණය කරන අයෙකු විය හැකියි. බොහෝ විට මේ නිසාම දෙමව්පියන් වශයෙන් ඔබ ගැටලු රාශියකට මැදිවනවාට කිසිදු සැකයක් නැහැ. මෙසේ දරුවන්ට ඔවුන්ගේ පෞරුෂය විනාශ වී යන ආකාරයට ආමන්ත්‍රණය කිරීම හා දඬුවම් කිරීම නිසා එම දරුවන් පසුකාලීනව දෙමව්පියන්ගේ අවවාද ඇසීම ප්‍රතික්ෂේප කිරීම වගේම වැරදි දෙයකට ඔවුන්ට දඬුවම් දුන්නත් එයද නොසලකා හරින තත්ත්වයට පත්වීමට පටන් ගන්නවා. ඉන්පසුව එම දෙමාපියන්ට යාමට සිදුවන්නේ ඊටත් වඩා ලොකු ක්‍රියාමාර්ගයකටයි. මෙසේ දරුවන්ට අනවශ්‍ය විදිහට දඬුවම් දීම නිසා දරුවන්ද පාසල් ගිය පසු දිගින් දිගටම වෙනත් දරුවන් සමග රණ්ඩු සරුවල් කිරීමට පෙළඹීම, වෙනත් දරුවන්ගේ වැරදි සෙවීම, නුහුරට කතා කිරීම, නරක විදිහට පාස‍ලේ හැසිරීම ආදිය නරක ගුණ පෙන්නුම් කරාවි. එම නිසා දරුවන්ගේ හිත් කැඩෙන විදිහට කටයුතු කිරීමට දෙමාපියන් වශයෙන් ඔබ කටයුතු නොකළ යුතුයි.

විශේෂයෙන්ම කුඩා දරුවන්ගේ සිත් ඉතා ලාමක නිසා ළපටි සිත් ඉක්මනින් බිඬෙන සුළුයි. අපි දරුවන්ගේ මනසට ඇතුල් කරන හොඳ හෝ නරක දරුවන් ඉක්මනින්ම ආදර්ශයට ගන්න පෙළඹෙනවා. අපි වගා කරන දෙය තමයි දරුවන් නෙළා ගන්නේ. සමහරවිට ඔබත් ඔබේ දෙමාපියන්ගෙන් මෙවැනි අත්දැකීම් කුඩා කල සිටම ලබන්න ඇති. ඒ නිසා ඔබ වැඩිහිටි වූ පසුවත් ඔබට ඔබේ ඒ ගතිගුණ වෙනස් කර ගැනීමට නොහැකි වන්න ඇති. නමුත් මෙයින් වෙන්නේ ඔබගේ දරුවන්ගේද අනාගතය විනාශ වෙන එක විතරයි. මොකද කුඩා කල සිටම දරුවන් තම මනසට ඇතුල් කර ගන්නේ දෙමාපියන්ගෙන් හා ගුරුවරුන්ගෙන් ඔවුන්ට ලැඛෙන අත්දැකීම් හා හැසිරීම් රටාවල්. මෙය මෙසේ දිගින් දිගටම ගෙන යාමටද ඔබගේ අදහස? අපි අපේ දරුවන්ට හොඳ විනයක් සංයමයක් ඇතිව හැදෙන්නට ඉඩදීමයි දෙමාපියන් වශයෙන් කළ යුත්තේ. වැඩිහිටියන් තම දරුවන්ගේ අතින් සිදුවන අතපසුවීම් පිළිබඳව ඔවුන්ව දැනුවත් කළ යුතුයි. ඒ වගේම එවැනි අතපසු වීමක් හෝ වැරදීමක් සිදුවූ විට එයට මුහුණ දෙන ආකාරය තමයි මූලිකවම අපි දරුවන්ට උගන්වන්න ඕනා. එවැනි අතපසුවීමක් සිදුවූ විට ඊළඟට අපි කළ යුතු දෙය කුමක්ද කියාත් දරුවන් දැනුවත් කිරීම බුද්ධිමත් දෙමාපියන්ගේ වගකීමක් හා යුතුකමක් බව මතක තබා ගන්න. විශාල බලපෑම් ඇති කරන අතපසුවීම් සමග අප කටයුතු කරන්නේ මේ ආකාරයට යැයි දරුවන්ට කියා දෙන්න. ඒ වගේම අතපසුවීමක් වූ සැනින් එය නිවැරදි කර ගන්නා ආකාරයත් ඔවුන්ට කියා දෙන්න. එසේ ඔබ නොකළොත් ඔවුන්ට එම වැරැද්ද සාදා ගැනීමට තිඛෙන ඉඩකඩ ඔබ විසින්ම අහුරා දමන බව මතක තබා ගන්න.

ඔබ නිතරම සිතන්න ඔබගේ රැකියාව කරන ස්ථානයේ හදිසියේ හරි ඔබගේ අතින් සිදුවූ වැරැද්දකට අංශ ප්‍රධානියා ඔබට මෝඩයා, පිස්සා යනුවෙන් බැන වැදුනහොත් ඔබට මොන තරම් තරහක්, ලැජ්ජාවක්, කලකිරීමක්, ඇතිවනවාද කියා. ඒ වගේ වෙලාවක ඔබට දැනෙන හැඟීම් ඔබට මතක් කර ගත හැකියි නේද?. ඒ විතරක් නමෛයි ආයතන ප්‍රධානියා නිතර දෙවේ‍ලේ වෙන අතපසුවීම්වලට දිගින් දිගටම කෑගසන්නත් බණින්නත් පටන් ගතහොත් ඔබට ඔබේ රැකියාව එපා වෙනවා නේද? ඒ වගේම සමහරවිට ඔබ හිටියටත් වඩා මුරණ්ඩු, රළු, පුද්ගලයෙකු බවට පත්වෙන්න පුළුවන්. ඒ වගේම තමයි ඔබගේ දරුවනුත්. ඔවුන්ටත් තමන් අතින් සිදුවන අතපසුවීම්වලට දිගින් දිගටම දඬුවම් කරන්නත්, බණින්නත්, පටන් ගතහොත් ඔවුන්ද හදාගන්න බැරි තරමට මුරණ්ඩු වෙන්න පුළුවන්. සමහර දරුවන්ට මෙසේ නිරතුරුවම විවිධ නාමයන් යොදා බැණ වැදීම හා ටොකු ඇනීම නිසා ඔවුන් පසුව දෙමාපියන් කොතරම් බැන්නත් ගැහුවත් කනකට නොගෙන කම්ම‍ලේ ඉන්න බල්ලන් මෙන් සිටීමට පුරුදු වෙන්න පුළුවන්. ඒ නිසා දරුවන්ට තරවටු කිරීමේදී මෙන්ම ඔවුන්ගේ වැරැද්දකදී දඬුවම් කිරීමේදීද පැසුණු බුද්ධියක් ඇති වැඩිහිටියන් වශයෙන් ඔබ දෙවරක් සිතාබලා කටයුතු කරන්න මතක තබාගන්න.

• හැමදෙනා අතින්ම අතපසුවීම් සිදුවන බව දරුවන්ට පැහැදිලි කරන්න. ඒ වගේම අප හැමෝම නිවැරදි මිනිසුන් නොවන බවත් කියා දෙන්න.
• දෙමාපියන් වශයෙන් අපි අපේ සිතට අධිෂ්ඨානයක් ඇති කරගත යුතුයි. දරුවන් අතින් නැවතත් මෙවැනි අතපසුවීම් සිදුනොවීමට දරුවන්ගේ අතින් අතපසුවීමක් වූ විට නිහඬවම ඔවුන්ට උදව් කරන්න. ඔවුන් එවිට තේරුම් ගනීවි තමන් අතින් ලොකු වැරැද්දක් වූ බව. 
• ඒ වගේම එහි ප්‍රතිවිපාක ඔවුන්ටම විඳගන්න ඉඩදී පසුව ඔවුන්ට එහි ඇති වැරැද්ද පහදා දෙන්න. උදාහරණයක් වශයෙන් දරුවන් කෑම මේසයේදී කෑම සැම තැනම විසිකරමින් කනවිට ඔවුන්ට එහි වැරැද්දක් ඇති බව තේරුම් ගැනීමට ඔවුන්ම ලවා ඒ විසිරුණු කෑම ඉවත් කරන්න. එය නරක පුරුද්දක් බව ඔවුන්ට වටහාදෙන්න.
• දරුවන් අතින් වැරදි සිදුවීමට පෙර ඔවුන්ට එය වැරැද්දක් බවට දැනුවත් කර තබන්න. 
• දරුවන්ට වැරදි කිරීමට අනුබල දීමෙන් වළකින්න. 
• ඔවුන්ට ඔවුන්ගේ වගකීම පිළිබඳව නිසි අවබෝධයක් ලබාදෙන්න. ඒ වගේම තමන්ගේ වැරදි අනුන්ගේ පිට පැටවීමෙන් වළකින ලෙස ඔවුන්ව දැනුවත් කරන්න. 
• දරුවන්ට ඔවුන්ගේ අතින් වෙනත් පුද්ගලයෙකුට කිසියම් අතපසුවීමක් සිදුවුවහොත් එයට තම කනගාටුව පළ කිරීමට උගන්වන්න. 
• එක වැරැද්දක් වූ පමණින් දිගින් දිගටම එයම පවසමින් දරුවන්ට "ඇණයක්" වන එක නවත්වන්න.
• දරුවන් අතින් වන සුළු සුළු අතපසුවීම්වලට බැණ වැදීම හෝ දඬුවම් කිරීමෙන් වළකින්න. ඔවුන්ට ඒ වැරැද්දේ ඇති බරපතළකම වටහා දෙන්න.
• තමන් අතින් සිදුවූ වැරදි පිළිගැනීමට දරුවන්ව ධෛර්යමත් කරන්න. ඒ වගේම තම වැරැද්ද අන් අය පිටින් යැවීම නරක පුරුද්දක් බවත් ඔවුන්ට කියා දෙන්න.
• දරුවන් තමන් අතින් සිදුවූ අතපසුවීම් පිළිගත් පසු ඔවුන්ව වර්ණනා කරන්න. විවේචනය කිරීම්, ගුණ දොස් පැවැසීමෙන්
• වළකින්න. ඒ වගේම වරද පිළිගත් පසු ඔවුන්ට දඬුවම් කිරීමෙන් මෙන්ම විනිශ්චය දීමෙන් වළකින්න.
• දරුවාගේ අතින් නොදැනුවත්ව වරදක් සිදුවූ විට ඔවුන්ගේ හිතේ අමාරුව තේරුම් ගන්න. ඒ වගේම ඔබ ඔවුන්ගේ මානසික මට්ටමට ගොස් සිතන්න පුරුදු වෙන්න. එමෙන්ම එම වැරැද්ද නැවතත් සිදු නොකරන බවට තම සිතින් අදිටන් කරගන්න කියන්න. හිත නැවතත් යථා තත්ත්වයට හදා ගන්න විදිහ ගැන කියලා දෙන්න.
• හැමවිටම ඔවුන්ගේ ගැටලු විසඳා ගැනීමට උදව් කරන්න. විශේෂයෙන්ම වැරැද්දක් වූ පසු එම වැරැද්ද තමන් කළ බව ඔවුන් පිළිගත් පසුව ඇතිවන හිතේ අමාරුවට ඔවුන් කැමති ලස්සන දෙයක් කරන්න ඉඩ දෙන්න. (චිත්‍රයක් ඇඳ පාට කිරීමට ඉඩ දෙන්න. නැතිනම් කේක් එකක් ලස්සනට අයිසින් කරන්න උදව් කරන්න.)

ශිරෝනි ග්‍රේරෝ

උපුටා ගැනීම ලක්බිම පුවත් පත