ජීවිතේ සාර්ථක කරගන්න උදේ 8ට කලින් මේ දේවල් කරන්න
පිබිදෙන්න, දිදුලන්න කැමති අයට උදේ වරුව කියන්නෙ හොඳ හිතවතෙක්. රැකියාවට යන්න කලින් උදේ පැය කීපය භාවිතා කොට ඔබට සාර්ථකත්වයක් වගේම සෞඛ්‍ය සම්පන්න ජීවිතයකුත් ලද හැකියි. ලෝකයේ ඉහළ සාර්ථකත්වයක් ලද බොහෝ දෙනා මේ ආකාරයෙන්ම තම උදය කාලය ප්‍රයෝජනවත් ලෙස භාවිතා කළ බව සඳහන් වෙනවා. බ්‍රිතාන්‍ය අගමැතිවරියකු වූ මාග්‍රට් තැචර්, ලෝ සුප්‍රකට ඇමෙරිකානු වාස්තු විද්‍යාඥ ෆ්‍රෑන්ක් ලොයිඩ් රයිට්, ඩිස්නිලන්තයේ ප්‍රධාන විධායක නිලධාරී වැනි අති සාර්ථක පුද්ගලයින් හැම දෙනෙක්ම පාහේ පාන්දර 5ට කලින් අවදි වූ අය බව සඳහන්. ඔබත් ඒ වගේ සාර්ථකත්වයක් ලබන්න කැමති නම් මේ කරුණු අත් හදා බලන්න.
1. ව්‍යායාම්වල යෙදෙන්න.
උදෑසන ව්‍යායාම්වල යෙදීමෙන් ශරීර ශක්තියට අපූරු ජවයක් වගේම ජීවිතයට පරිසමාප්තියක් වැනි හැඟීමක් දැනෙනවා. මෙය දිවියේ කාර්යන් ප්‍රබෝධමත් කිරීමට හොඳ පිටිවහලක්. ඒ වගේම උදෑසන මේ ආකාරයෙන් ව්‍යායාම්වල යෙදීමෙන් දවස අවසානයේ විඩාපත් බවක් දැනෙන්නේ නැහැ. හෙටම වෙනදාට වඩා විනාඩි 15කට කලින් අවදි වී බලන්න ඔබ අතින් වෙනදාට වඩා බොහෝ දේවල් ඉටු වනු නොඅනුමානයි.
2. ඔබේ දවස සැලසුම් කරන්න.
ඔබේ ඉලක්කයන්, ඔබ කළ යුතු දෑ ආදිය පිළිවෙළකට පෙළගස්වමින් දවස තුළ ඔබ ඉටු කළ යුතු දෑ උපරිමව කිරීමට මග සකසාගන්න. මේ වගේ දෙයක් කරන්න හොඳම කාලය උදැසන කාලයයි. ඒ දවසේ නිස්කලංකම කාලය උදෑසන කාලය හින්දයි. ඒ වගේම දවසේ විසඳිය යුතු ගැටලු පිළිබඳ සිතා බලන්න හොඳ කාලයත් මෙයයි. මේ පෙළ ගැස්වීමේදී ඔබේ කාර්ය බහුල කාර්යන් අතර විනාඩි 10ක පමණ විවේක කාලයක් තමන්ගේ අසුනේ සිටම කළ හැකි භාවනාවක් ආදියත් ඊට ඇතුළත් කරන්න.
3. සෞඛ්‍ය සම්පන්න උදෑසන ආහාර වේලක් ගන්න.
දවසේ කාර්යන් සඳහා මනාව මූණ දීම සඳහා ඔබ ඔබව හැඩ ගැස්විය යුතුයි. ඒ සඳහා සෞඛ්‍ය සම්පන්න ආහාර වේලක් අත්‍යවශ්‍යම දෙයක්. මේ නිසා මොන තරම් ප්‍රමාද වුණත් උදේ ආහාර වේල නියම වෙලාවට ගැනීම අතපසු කරන්න එපා. වෙලාව මදි බව හැඟේ නම් වෙනදාට වඩා විනාඩි 15ක් විතර කලින් අවදි වන්න. එසේ නොවුණහොත් බොහෝ විට සිදුවන්නේ ඔබේ සිත ද එසේ වැඩවල නිරතවීම වෙනුවට කුසගින්න ගැන සිතීමට පෙළඹීමයි. උදේ ආහාරය ගෙදරින්ම ගැනීම සෞඛ්‍යට විතරක් නමෛයි පවු‍ලේ සම්බන්ධතාවයටද යහපත් ලෙස බලපානවා.
4. මනසින් දකින්න.
බොහෝ විට අපි අපේ ශරීර සෞඛ්‍ය ගැන සිතා මානසික සෞඛ්‍ය ගැන හිත යොමු කරන්නෙ නැහැ. දවසේ වැඩ කටයුතු පැටළුනොත් සිතට දැනෙන ආතතිය මානසික සෞඛ්‍යට සෑහෙන්න බලපාන්න පුළුවන්. ඒ හින්දා උදෑසන විනාඩි කීපයක් මනසින් භාවනාවකට සම වැදී දවසේ කාර්ය ගැන මනසින් දකින්න. දවසේ ඇති ගැටලු මනසින් විසඳීමට උත්සාහ ගන්න. ඔබට ලද හැකි සාර්ථකත්වයන් ගැන සිහිපත් කරන්න ඒ වගේම හැම දේ ගැනම ධනාත්මකව සිතීමට යොමු වීමෙන් දවස හොඳ ර්‍ණමූඩ්” එකකින් ඇරඹීමට ඔබට අවස්ථාව සැලසේවි.
5. එපා කරපු දේවල්වලින් දවස අරඹන්න.
අපේ එදිනෙදා කාර්යභාරයන් ලැයිස්තුවේ අඩුම තරමින් අප කිරීමට අකමැති දේවල් එකක්වත් තියෙන්න පුළුවන්. ඒවා අතහැර දැමුවත් සතියකින් මාසයකින් හෝ අපට ඒවා කිරීමට සිදුවෙනවා. අන්තිමට එපා වෙලා එවැනි දේ කිරීම සිතටත් මහ බරක්. ඒ හින්දා දවසේ කාර්යන් ඇරඹීමේදී මුලින්ම වැඩි කැමැත්තක් නොදක්වන දේ කරන්න. උදේ පාන්දර, මොකද උදේ පාන්දර ඔබ හොඳ මානසික මෙන්ම කායික ශක්තියකින්ද සිටින නිසා අමාරු දේවල්වලට හොඳින් මූණ දීමට හැකියාවක් ඔබට තිඛෙනවා. මේ ආකාරයෙන්ම කටයුතු කිරීමේදී දවස ක්‍රම ක්‍රමයෙන් ඔබට පහසු වෙනවා. ඒ හින්දා දවස අවසානයේ ඔබේ සිතට දැනෙන්නෙ විඩාපත් බවක් නොව අස්වැසිල්ලක්. ඒ අස්වැසිල්ල පසුදා උදෙන්ම අවදිවන්න ඔබට හොඳ පිටිවහලක් වනවාට කිසිදු සැකයක් නැහැ.
ගැමුණු රත්නායක
උපුටා ගැනීම ලක්බිම පුවත් පත
