නිවසට තිර රෙදි දැමීමට පෙර මේ ගැන හිතමු

නිවෙස් අලංකාර කිරීමට යොදාගත හැකි බොහෝ අංග ඇත. ඒ අතුරින් නිරතුරු අවශ්‍ය වන අංගයක් ලෙස තිර රෙදි හැඳින්විය හැකිය. දොර සහ ජනෙල්වල තිර යෙදූ පසු නිවසක පෙනුම අලංකාරය සම්පූර්ණයෙන්ම වෙනස් වේ. තිර රෙදි භාවිතයේදී දැනුවත් විය යුතු බොහෝ කරුණු ඇත. යම් ස්ථානයකට තිරයක් දැමීමෙන් මනා අලංකාර පෙනුමක් ලබාගත යුතුය. එනම් ඒ ඒ ස්ථානයන්ට ගැළපෙන නිර්මාණයක් කිරීමට ඔබ දක්ෂයකු විය යුතුය. අප ඔබට හඳුන්වා දෙන්නේ තිර රෙද්දක් දැමීමට පෙර සැලකිලිමත් විය යුතු කරුණු කිහිපයක් ගැනය. නව වසරේ නිවෙසට අලුත් දේ එකතු කර ගනිමින් අලංකාර කර ගැනීමේදී නවීන තිර රෙදි මෝස්තරවලටත් වැඩි අවධානයක් යොමුවෙයි. තිර රෙදි මිලදී ගැනීමට පළමුව සිතන්නේ නම් වැඩි මුදලක් ඔබට දැරීමට සිදුවන නිසා එයට සූදානම්ව යා යුතුය. එමෙන්ම තමා වියදම් කරන මුදලට සරිලන ලෙස ආකර්ෂණීය පෙනුමක් ලැබෙන ආකාරයට තිර රෙදි මෝස්තරය තෝරා ගැනීමද ඔබ සතු වගකීමක් වේ.

ස්ථානය :

තිර රෙද්දක් යෙදීමට පෙර එය අවශ්‍ය ස්ථානය පිළිබඳව සැලකිලිමත් විය යුතුය. නිවසක් තිරයක් නම්, විසිත්ත කාමර, නිදන කාමර, කුඩා දරුවන්ගේ කාමර (බේබි කාමර) හා පැන්ට්‍රිය යන ස්ථාන සඳහා වෙන වෙනම ගැළපෙන අයුරින් තිර නිර්මාණය කළ යුතුය.

වර්ණය :

තිර රෙදි සඳහා වර්ණ ගැළපීම ඉතාම වැදගත්ය. තිර රෙද්ද දමන ස්ථානයට ගැළපෙන අයුරින් වර්ණය තෝරා ගත යුතුය. තිර රෙදිවලට වර්ණය ගැළපීම සඳහා වැදගත් කරුණු කිහිපයක් ඇත. තිර රෙද්ද දමන ස්ථානයේ ඉඩ ප්‍රමාණය අඩු නම් ලා පැහැ වර්ණයන්ද, ඉඩ ප්‍රමාණය වැඩි නම් තද පැහැ වර්ණ ද භාවිත කළ හැකිය. ඉඩ ප්‍රමාණය අඩු ස්ථාන සඳහා තනි පැහැ වර්ණයන් භාවිත කිරීමෙන් ඉඩ අවකාශය වැඩි බව පෙන්නුම් කළ හැකිය.

තිර රෙදි සැකසීමේදී බිත්තියේ වර්ණය, ගෘහ භාණ්ඩවල වර්ණය, ‍පොළොවේ වර්ණය (ටයිල්) ගැන සැලකිලිමත් විය යුතුවේ. එම වර්ණයන්ට ගැළපෙන අයුරින් තිර රෙද්දේ වර්ණය තෝරාගත යුතු අතර ඇසට වෙහෙස කර බව ලබා දෙන වර්ණ තෝරා ගැනීමෙන් වළකින්න.

ස්වභාවික වර්ණ මුසු කිරීම පවා වැදගත්වේ. විසිත්ත කාමර සඳහා තනි පැහැ රෙදි වර්ග භාවිතා කිරීම සුදුසුය. මුළුතැන්ගෙයි තිර රෙදිද විසිත්ත කාමරයේ තිර රෙදි නිර්මාණවලට ගැළපෙන අයුරින් නිර්මාණය කළ යුතු අතර ළදරු කාමර සඳහා ළදරු මෝස්තර සහිත මුද්‍රිත රෙදි භාවිත කරන්න.

ආලෝකය :

නිවසක් තුළ හොඳ ආලෝක තත්ත්වයක් පැවතීම අවශ්‍යය. එයින් එම නිවසේ කළඑළිය වැඩිවේ. නිවස තුළට ලැබෙන ආලෝක ප්‍රමාණය හොඳ මට්ටමක පවතී නම් තද පැහැ වර්ණ ගැළපිය හැකිය. ඔබ කරන නිර්මාණයෙන් නිවස තුළට ලැබෙන ආලෝකය අවම කිරීමක් නොකළ යුතු අතර ආලෝකය අඩු ස්ථානවලට ලා පැහැ රෙදි පමණක් යොදන්න. එයින් අඳුරු බව අවම කළ හැකිය. නිවසකට දොර හා ජනෙල් රෙදි යෙදීමේදී බිත්තිවල ආ‍ලේප කර ඇති වර්ණය, බිත්තිවල උස, නිවසේ කුමන ස්ථානයටද තිර රෙදි යොදන්නේ, නිවස පිහිටා ඇති ප්‍රදේශයට අයත් දේශගුණික ස්වභාවය හා නිවසේ විශාලත්වය යන කාරණා පිළිබඳව මූලිකවම සැලකිලිමත් විය යුතුවෙයි. එමෙන්ම තිර රෙදි සඳහා අපිට වැය කළ හැකි මුදල, කල්පැවැත්ම යන කාරණා අනෙක් වැදගත් කරුණු වේ. අලංකාර ලෙස තිර රෙදි මෝස්තර තෝරා ගත්තද නිවෙසට හොඳින් ආලෝකය ලැබිමට හැකි වන ලෙස රෙදි වර්ග තෝරා ගැනීමට උනන්දු වන්න. තිර රෙදි අතරින් වාතය හා ආලෝකය නිවෙසට ඒමට පහසු වන ලෙස තුනී රෙදි යොදා ගත යුතුය.

නමුත් රාත්‍රියේ විදුලි ආලෝකයට පිටත සිට බැලූවිට ඇතුළ හොඳින් පෙනෙන නිසා තරමක් ඝනකම් තිර රෙද්දක් තෝරා ගැනීම වඩා සුදුසු වෙයි. යටින් තිර රෙද්ද හා එයට උඩින් ඝනකම් මෝස්තර සහිත රෙදිත් ඔබේ කැමැත්ත අනුව ගළපාගත හැකිය. අතැම් විට විවිධ මෝස්තර මුද්‍රිත තිර රෙද්ද පමණක් ජනෙල්වලට ගළපා ගන්නා අවස්ථාද ඇත.

නිවසේ තාප්පය උසට බැද පිටතට ආවරණය වී ඇත්නම් එලෙස තිර රෙදි සාලයට යොදා ගැනීම වරදක් නැත. නමුත් කාමරවලට නම් නිතරම පිටතට නොපෙනෙන ඝනකම් මෝස්තර සහිත තිර රෙදි තෝරා ගන්න. රාත්‍රී කාලයේ විදුලි බුබුළු ආලෝකයට ඇතුළත පෙනීමෙන් වළක්වා ගැනීමට මෙවැනි තිර රෙදි භාවිතා කරන්න.

බිත්ති වර්ණයට ගැළපෙන්න :

නිවසේ සාලය හා කාමරවල බිත්ති මත ආ‍ලේප කරන ලද වර්ණවලට අනුව තිර රෙදි වර්ණද ගළපා ගත යුතුය. බිත්තිවල ආ‍ලේප කරන ලද වර්ණ තද පැහැති නම් ළා වර්ණයෙන් තිර රෙදි තෝරා ගැනීම තුළින් නිවෙසට වැඩි ආලෝකයක් ගෙනදීමට සමත්වේ.

වෙනස් මෝස්තර :

නිවෙසක සාලය, නිදන කාමර, මුළුතැන්ගෙය වැනි විවිධ ස්ථාන අනුව තිර රෙදි මෝස්තර හා රෙදි වර්ගද වෙනස් වෙයි. මුළුතැන්ගෙයි පැන්ට්‍රි කබඩ් ඇති විට වඩාත් ගැළපෙන්නේ සරල මෝස්තර සහිත දිග නොවූ සරල තුනී තිර රෙදි නිර්මාණයකි. සාලය හා නිදන කාමර වලට නම් තිර රෙදි බිම් මට්ටමට සමාන වන ලෙස නිර්මාණය කෙරේ. නිවෙසේ පුටු හා ගෘහ භාණ්ඩවලට ගැළපෙන ලෙස තිර රෙදි මෝස්තරද ගළපා ගන්නට ඔබට හැකිය.

ඉඩ වැඩි කර පෙන්වීමට :

අවකාශය අඩු සාලයකට හෝ කාමරයකට නම් ලා පැහැති තිර රෙදි මෝස්තර ගළපා ගැනීමෙන් වැඩි ඉඩකඩක් ලබාගන්නට පුළුවන. වැඩි ඉඩකඩක් සහිත සාලයකට නම් තද වර්ණ සහිත තිර රෙදි මෝස්තර තෝරා ගැනීමෙන් එම ස්ථානයට ආකර්ෂනීය බවක් ගෙනදිය හැකිවේ.

ගෘහ භාණ්ඩ සමග ගළපන්න :

නිවෙසේ බිත්තිවල වර්ණ පමණක් නොව ටයිල් ‍පොළොවේ වර්ණද තිර රෙදි සමග ගළපන්න. ආලින්දයේ සෝෆාවල, කුෂන් කවරවල මෝස්තරද තිර රෙදි හා ගළපා ගත හැකිය. කාමරවල නම් ඇඳ ඇතිරිවල මෝස්තර තිර රෙදි සමග ගළපා ගන්න.

දරුවන්ගේ කාමර සඳහා :

කුඩා දරුවන්ගේ කාමරයට තිර රෙදි තෝරා ගන්නා විට එහි බිත්තිවල වර්ණ හා එම්බ්‍රොයිඩර් කර මසාගත් සමනලුන් වැනි සත්ව රූපද එයට එක් කර ගන්න. කුඩා දරුවන්ගේ කාමරේට ලා වර්ණ ගළපා ගෙන සරසා ගන්න. දරුවාගේ මනැස නිරවුල්ව තබාගෙන අධ්‍යාපන කටයුතු කිරීමට ලා වර්ණ කාමරයට ගැල්වීම වඩාත් සුදුසුයි.

උපදෙස් අභ්‍යන්තර ගෘහ නිර්මාණ ශිල්පී හේෂාන් ඩොන්
සටහන අකිලා නදිශානි බණ්ඩාර