කළු ගල් සහ වීදුරුවලින් හැඩ කරපු කාමර 5 ලස්සන ගෙදර
නව නිවෙසක සිහින දකින හැම කෙනකුගේම බලාපොරොත්තුව ඉඩම කුඩා වුණත් වැඩි කොටසක් ගෙවත්තටත් ඉතුරු කරගනිමින් සියලු අවශ්‍යතා සපිරි නිවහනක් තනා ගැනීමයි. ඒ වගේම ටිකක් වෙනස්, අලුත් පෙනුමක නිවෙසකට හිමිකම් කියන්නත් කවුරුත් කැමැතියි. අද අපි කතා කරන නිවෙස තරමක වෙනස් පෙනුමක් තියෙන නිදන කාමර 5කින් සමන්විත එහෙත් කුඩා ඉඩමකට ගැළපෙන එකක්.
නිවෙසේ එක මායිමක් අන්ධ බිත්තියක් (Blind wall) ලෙස යොදාගෙන සැලසුම් කර ඇති මේ ඕධය බරනඥ නිවෙසෙ වඩාත් ගැළපෙන්නේ නාගරික පරිසරයකටයි. කළුගල් හා වීදුරු යොදාගෙන හැඩ කර ඇති කොටස නිසා සාමාන්‍ය නිවෙසකට වඩා වෙනස් නවීන පෙනුමක් නිවෙසට එක් කරනවා.
වාහන නැවතුම සමීපයෙන්ම නිවෙසේ ප්‍රධාන ද්වාරය (Main Door) පිහිටුවා තිබෙනවා.
සාලය හා කෑම සාලය (Dining) එකම අවකාශයේ සැලසුම් කර තිබෙනවා. නිවෙසේ ඉදිරිපසට විවර වන විශාල මැද මිදුල මේ පොදු අවකාශයටත් ඉහළ මහලේ රූපවාහිනී නැරඹුම් ස්ථානයටත් (TV Area)ගෙන එන්නේ සුන්දරත්වයක්. පිටතින් ඇතුළු විය හැකි කාර්යාල කාමරයක් සහිත මේ නිවෙසේ පහළ මහල නිදන කාමර දෙකකින් සමන්විතයි.
එසේම ඒ නිදන කාමර දෙකටම සමීපව සහ පොදු අවකාශයන්ගෙන් වෙන්ව නාන කාමරය (Bathroom) පැවැතීම නිසා සැලසෙන පහසුව කියා නිම කළ නොහැකියි.
ඉහළ මහලේ රූපවාහිනී නැරඹුම් ස්ථානය (TV Area) සඳහා ගැළපෙනම ස්ථානයේ එය පිහිටුවා තිබෙනවා. අන්ධ බිත්තිය දෙසට විවර වන බැල්කනි (Balcony) නිසාත් පහළ මහල හා සම්බන්ධ වන ද්විත්ව අවකාශය Double Height Space) නිසාත් සැළැකිය යුතු ආලෝකයක් නිවෙස තුළ රඳවා ගත හැකියි.
ඉදිරිපස විශාල බැල්කනි (Balcony) එකක්ද සහිත ප්‍රධාන නිදන කාමරය එයටම අෑඳුන නාන කාමරයක් සහ ඇඳුම් මාරු කිරීමේ අවකාශයක් (Bathroom & Dressing Area) සහිතයි.
ඉන් මේ නිවෙසේ ප්‍රධාන නිදන කාමරය පරිපූර්ණ වගේම සැපපහසු එකක් බවට පත්වෙනවා. පහළ මහලේ මෙන්ම ඉහළ මහලේත් තවත් නිදන කාමර දෙකක් සහ පොදු නාන කාමරයක් සැලසුම් කර ඇති මේ නිවෙස සාමාජිකයන් වැඩි නිවෙසක් සඳහා වගේම වයෝවෘද්ධ වැඩිහිටියන් සමඟ දිවිගෙවන පවුලකට වඩාත් ගැළපෙනවා. අවශ්‍යතාව මත ඉහළ මහල අහස් උද්‍යානයක් (Roof Terrace) ලෙසත් භාවිත කළ හැකියි.
පර්චස් 10ක පමණ ඉඩක ඉන් පර්චස් 4.5ක් පමණක් ආවරණය වන ලෙස ඉදි කර ඇති මේ නිවෙසේ සම්පූර්ණ වර්ග ප්‍රමාණය 2,300ක් පමණ වනවා. රු. මිලියන 8කට පමණ වැඩ අවසන් කළ හැකි මේ නිවෙස සාමාජිකයන් වැඩි පවුලකට කුඩා ඉඩක සුවපහසු කැදැල්ලක මිහිර විඳගන්නට ගැළපේවි.
උපුටා ගැනීම මව්බිම
