පර්චස් 13ක ඉඩමට ගැළපෙන නවීන පන්නයේ සුවපහසු තනි මහලේ නිවෙස
නාගරික ඉතා කුඩා ඉඩම්වලට ගැළපෙන විවිධ පන්නයේ නිවාස බොහොමයක් ගැන කතා කළ අපි අද කතා කරන්න හිතුවේ තරමක ඉඩකඩ ඇති, අන්ධ බිත්ති නොමැති තනි මහලේ සුවපහසු නිවෙසක් ගැනයි. වර්තමානයේ වැඩි පිරිසක් කැමැතියි ස්වාභාවික හිරු එළිය හා වාතාශ්‍රය ලැබෙන නිවෙසක දිවි ගෙවන්න. ඉතින් මේ නිවෙසත් එවැනි සාමාන්‍ය වහලයකින් ආවරණය වූ අංගසම්පූර්ණ නිවෙසකි.
නිවෙසේ ආලින්දය වටා දිවෙන වහලයකින් ආවරණය වුණු වැරන්ඩාවකින් (Verandah) අලංකාර වන නිවෙසේ වම්පසට වන්නට වාහන නැවතුම් (car port) නිවෙසටම යාබදව සැලසුම් කර තිබෙනවා. එකම වහලයකින් ඒ දෙකටම සෙවණ සැලසෙනවා.
ප්‍රධාන ෙදාරෙන් ඇතුළුවන්නේ ප්‍රවේශ ශාලාවකටයි. ප්‍රධාන ආලින්දය පිහිටුවා තිබෙන්නේ ඊට පිටුපසින්. එමඟින් සාලයේ ඉඩකඩ වැඩි වනවා පමණක් නොව අමුත්තන් මුණගැසීමේ පහසුවත් සලසනවා.
පිටතින් හා ඇතුළතින් ඇතුළු විය හැකි කාමරය කාර්යාල කාමරයක් ලෙස භාවිත කළ හැකියි. සාලය හා කෑම කාමරය අතර හැඩ කළ විශේෂිත බිත්තියකින් ලබාදෙන අලංකාරය හරිම ආකර්ෂණීයයි. කෑම කාමරයෙන් වම්පසට මුළුතැන්ගෙය යාබදවම සැලසුම් කර තිබෙනවා. සැලකිය යුතු ඉඩක් සහිත නිසාත් මුළුතැන්ගෙය ජනේල හරහා ඉදිරි ගෙවත්ත දර්ශනය වීමත් නිසා ගෘහණියට එහි සිට පහසුවෙන් නිවෙසේ කටයුතු හැඩගස්වා ගැනීමට හැකිවනවා. පිටුපස ගෙවත්ත සඳහා පිවිසීමට ෙදාරක් සහ වැරන්ඩාවක් තිබෙනවා.
කෑම කාමරයෙන් දකුණුපස පළමු නිදන කාමරය ස්ථානගත කර තිබෙන අතර ප්‍රධාන නිදන කාමරය හා තවත් නිදන කාමරයක් ඉන් පසුපස සැලසුම් කර තිබෙනවා. මේ නිවසේ කාමර සංවිධානාත්මක කර ඇති අපූරුව නිසා ප්‍රධාන නිවැසියාටත් අනෙත් නිවැසියන්ටත් ඉතා පහසුවෙන් නාන කාමරය පොදු අවකාශයන්ට විවර නොවී භාවිත කළ හැකියි.
අද අපි කතා කළ මේ නිවෙස පර්චස් 13ක පමණ ඉඩමකට ගැළපෙන වර්ග අඩි 1300ක් පමණ වූ නිවෙසක්. මේ නිවෙස තනා නිම කරන්නට වැය වෙන මුදල රු.මි. 4.2ක් පමණ වේවි. විශාල මුදලක් යටකර මහල් නිවෙසක් හදන්න ජීවිතේ වැඩි කාලයක් ණය ගෙවනවාට වඩා සැලකිය යුතු ඉඩක් තිබෙනවානම් මෙවැනි තනිමහලේ අංගසම්පූර්ණ නිවෙසක් හදන්න හිතුවොත් සැලසෙන වාසි එමටයි.
උපුටා ගැනීම මව්බිම
