විසම හැඩයේ ඉඩමකට ගැළපෙනන නිවසක්
නිවසක් හදන්න බලාපොරොත්තුවෙන් ඉන්න ඔබට ඒ සඳහා තිබෙන ඉඩම චතුරස්‍ර ඉඩමක් නොවෙන්න පිළිවන්. ඉඩමක් මිලදී ගනිද්දී වුණත් ටිකක් විශේෂ හැඩ සහිත ඉඩම් අඩු මිලකට අලෙවි වෙනවා. හැම කෙනෙක්ම එවැනි ඉඩමක නිවසක් හදද්දී ටිකක් පසුබට වෙනවා. එසේ සිතීම වරදක් නොවෙන්නේ ඉඩම අඩු මුදලකට ලැබුණට එවැනි ඉඩම්වල තම සිතැඟි අනුව නිවසක් හදන්නට ඇති අපහසුව නිසයි. නමුත් ඉඩමේ පවතින හැඩ සහ අවශ්‍යතා හොඳින් කල්පනා කොට ගළපා ගතහොත් වෙනස් සහ අපූරු නිවසක් හදන්න හැකි වේවි. ඉතින් අද අපි කතා කරන්නේ එවැනි විසම හැඩ සහිත කුඩා ඉඩමකට ගැළපෙන ලෙස සකස් කළ නිවසක් ගැනයි.
තරමක් ජනාකීර්ණ පර්චස් 9කට ආසන්න මේ ඉඩමේ වෙනස්ම හැඩ තල සහිත පිහිටීම නිසා නිවසක් ඉදිකිරීමට හැකි බිම් ප්‍රමාණය (Buildable area) අවමයි.
ප්‍රධාන මාර්ගයට වැඩි දිගක් මුහුණලා ඇති නිසා නිවසේ ඉදිරි පෙනුමට වැඩි විශාලත්වයක් ඇති පෙනුමක් ලැබෙනවා. නමුත් පටු තීරයක් වැනි ඉඩමක් නිසාත් මාර්ගයට සමාන්තර දෙසින් පසුපස අවකාශය තැබීමට (Rear space) ඉඩ මදි නිසාත් නිවසට ස්වාභාවික වාතාශ්‍රය ලබාගැනීම යන කාරණා නිසාවෙන් මෙම ඉඩමේ නිවසක් තැනීම තරමක අභියෝගයක්.
පසුපස අවකාශය ඉඩමේ එක් පසෙකටත් අනෙක් පසින් වාහන නැවතුමත් (Car Port) පිහිටන ලෙස නිවස සැලසුම් කෙරෙන අතර ඉතා කුඩා වැරන්ඩාවකින් ප්‍රධාන ද්වාරය ආවරණය වෙනවා. ආලින්දය (Living Area) ඉතා විශාල නොවුණත් පවතින ඉඩකඩ මනාව ගළපා ගැනීම සඳහා එක් පසෙකින් කෑම සාලයත් එකම අවකාශයක පිහිටුවා තිබෙනවා. ද්විත්ව අවකාශයක් (Double height space) ලෙස ඉහළ මහල හා සම්බන්ධ කෙරෙන නිසා මෙන්ම ඒ සමඟ ඇති විශාල ජනේල මඟින් දෙමහලටම නොඅඩුව ආලෝකය ලැබෙනවා. එසේම ඉතා දිගු අන්ධ බිත්තිය ආධාර කරගෙන පියගැට පෙළ සැලසුම් කර තිබෙන අතර මෙම බිත්තිය සඳහා විශේෂ පෙනුමක් ලබාදීම පවා නිවසේ ඇතුළත අලංකාරය වැඩිකිරීමට හේතු වන අතර අහසට විවර වෙන වීදුරුවකින් (Sky Light) එම බිත්තිය වෙත ස්වාභාවික ආලෝකය ලබා ගත හැකිය.
පහළ මහලේ නිදන කාමර දෙකක් සහ ඊට යාබද පොදු නාන කාමරයක් පිහිටුවා තිබෙනවා. මුළුතැන්ගෙය ඉඩමේ විශේෂ හැඩය භාවිත කොට එය නිවසට එක් කරගෙන තිබෙන්නේ ඉඩමේ ඉඩකඩ උපරිමයෙන් භාවිත කිරීමේ අපේක්ෂාවෙන්. නවීන විවෘත මුළුතැන්ගෙයක් (Open Pantry) ලෙස වුවත් භාවිත කළ හැකි මෙම මුළුතැන්ගෙය හා කෑම සාලය අතර නිවස තුළ ඇති විය හැකි කෘත්‍රිම බව වළකනු වස් මහල් තුනම හරහා ඉහළට ඇදෙන ගසක් යෝජනා කර තිබෙනවා. මෙවැනි ඉඩමක නිවසකට එවැනි එක් කිරීම්වලින් ලැබෙන සැනසුම නිවැසියන්ට ඉතා වැදගත්.
ඉහළ මහලේ රූපවාහිනි නැරඹුම් ස්ථානය පහළ මහල වෙත විවර වන්නේ පෙර කී ද්විත්ව අවකාශයෙන්. නිවස තුළ අන්තර්සම්බන්ධයක් පවත්වා ගැනීම හා ඉඩකඩ වර්ධනය කර පෙන්වීමට ඉන් ලැබෙන පිටුබලය ඉතා ඉහළයි.
නිදන කාමර දෙකක් සහ පොදු නාන කාමරයක් සැලසුම් කර තිබෙන අතර ඒ සඳහා සුදුසු ලෙස බැල්කනි යොදා තිබෙනවා. එසේම කුඩා කාර්යාල කාමරයකුත් නිවැසියන්ගේ අවශ්‍යතා මත සැලසුම් කර තිබෙනවා. සම්පූර්ණ බොක්ස් මාදිලියේ නිවසක් වන මෙය අහස් උද්‍යානයකින් (Roof Terreace) යුක්තයි.
පර්චස් 9කට ආසන්න විශේෂිත හැඩයේ ඉඩමකට සැලසුම් කෙරුණු මේ නිවසේ වර්ග ප්‍රමාණය ව.අඩි 2100ක් පමණ වනවා. රු.මි. 6.9කින් පමණ වැඩ අවසන් කළ හැකි මේ නිවස විසම හැඩයේ ඉඩමක නිවසක් හදන්න ඇති බිය නිසා තැවුලෙන් ඉන්න අයට උත්සාහයක් දරලා බලන්න ශක්තියක් වේවි.
උපුටා ගැනීම මවුබිම
