කුඩා ඉඩමකට ගැළපෙන හුරුබුහුටි ගේ පොඩ්ඩක්

නාගරික  පරිසරයක නිවෙසක් තනන බොහෝ අය මුහුණ දෙන ලොකුම ගැටලුව වෙන්නේ තම සිතැඟි අවශ්‍යතා සපිරෙන නිවෙසක් තනන්නට තරම් ඉඩම ප්‍රමාණවත් නොවීමයි. මේ හේතුව නිසා සිත් පීඩාවෙන් නිවෙසක් තනන්න සිතේ දෙගිඩියාවෙන් ඉන්න අය එමටයි. 

නමුත් පවතින ඉඩකඩ නිසි ලෙස කළමනාකරණය කළොත් වඩාත් සුන්දර සහ තම අවශ්‍යතාවලට ගැළපෙන නිවෙසක් තනන්නට අපහසු වෙන්නේ නැහැ. අද අප කතා කරන නිවෙසේ ඉඩම එක් මායිමක් හැඩයට පවතින හරි චතුරස්‍ර නොවූ  පර්චස් 5.5ක් පමණ දිගින් යුක්ත එකක්. ඉදිරිපසින් හා පසුපසින් අවශ්‍ය ඉඩකඩ තබා අනෙක් දෙපසම අන්ධ බිත්ති (Blind Wall)  ලෙසයි. නිවෙස සැලසුම් කර තිබෙන්නේ. වාහන නැවතුමත් (Car Port) එක් අන්ධ බිත්තියකට ආසන්නව පිහිටුවා තිබෙනවා.

නිවෙසේ නාන කාමර ඉදිරි පෙනුමට පෙනෙන ලෙස සැලසුම් කර තිබුණත් එය විශේෂිත බිත්තියක් ලෙසට ඉහළට සැලසුම් කර තිබීමෙන් ඉන් නිවෙසට ප්‍රභාවක් ලබාගෙන තිබෙනවා. වාහන නැවතුම සඳහාත් කොන්ක්‍රීට් පර්ගොලා (Pergolas)  යොදාගෙන ආවරණයක් සලසා ඇති නිසා ඉන් නිවෙසට නවීන පෙනුමක් එක් කරන අතර නිවෙස වෙත ලබාදෙන ආලෝක ප්‍රමාණයත් වැඩි කරනවා. 

නිවෙසේ ආලින්දය හා කෑම සාලය (Living & Dining) එකම අවකාශයක ස්ථානගත කර තිබෙන්නේත් ඉඩකඩ පහසුව උදෙසායි. එක ශාලාවක් ලෙස සැලසුම් කොට පසුපසින් විශාල වීදුරු බිත්තියක් හා ඉන් මෑත පඩිපෙළ සැලසුම් කර තිබෙනවා. ඒ අසලින්ම ද්විත්ව අවකාශය (Double Height Space) හරහා ඉහළට යන ගසක් නිවෙස මැද ස්ථානගත කර තිබීමත් අපූරුයි. මුළුතැන්ගෙයත් මේ අවකාශයට සමීපව පිහිටුවා තිබෙන නිසා සැලසෙන පහසුව විශාලයි. පහළ මහලේ එකම නිදන කාමරය නාන කාමරයට සමීපවම ස්ථාන ගත කොට තිබීමත් ඉතා පහසු පිහිටීමක් වනු ඇති.

ඉහළ මහලේ රූපවාහිනි නැරැඹුම් ස්ථානයත් (TV Lobby) කුඩා මුළුතැන්ගෙය (Mini Pantry)  ද්විත්ව අවකාශයට සමීපව ඉදිකර තිබෙන අතර එම ද්විත්ව අවකාශය ආනතියකට විවර කර තිබීම නිවෙසට අලුත් පෙනුමක් එක් කරාවි. එසේම මෙම අවකාශය පර්ගෝලා සහ වීදුරුවලින් ආවරණය වන නිසා දිවා කාලයට මෙම අවකාශය සූර්යාලෝකයෙන් ප්‍රමුදිත වනු ඇති. එසේම ඉහළ මහලේ නිදන කාමර දෙකක් හා පොදු නාන කාමරයක් සහිතවයි සැලසුම් කර තිබෙන්නේ. ඉන් එක් නිදන කාමරයකට සමීපවම නාන කාමරය සැලසුම් කර තිබෙන අතර එම නිදන කාමරයට ඇඳුම් මාරු කිරීමට කුඩා ඉඩකඩක්ද ලබාදී තිබීම විශේෂයි.  අහස උද්‍යානයක් (Roof Terrace) ලෙස වහලය සකස් කර ඇති නිසා අවම ඉඩකඩ සහිත ඉඩමකදී වන අඩුව මකාගෙන අවශ්‍යතා සඳහා ඒ ඉඩකඩ භාවිත කිරීමේ පහසුව නිවැසියන්ට සැලසෙනවා.

පර්චස් 5.5ක් වැනි කුඩා ඉඩකට සැලසුම් කර ඇති මේ නිවෙසේ සම්පූර්ණව අඩි ප්‍රමාණය 1600ක් පමණයි. රු.මි. 5.8ක් වැනි මිලකට වැඩ අවසන් කළ හැකි මේ මනහර නිවෙස කුඩා ඉඩමක අලුතෙන් නිවෙසක් තනන්න හිතේ දෙගිඩියාවෙන් ඉන්න අයට ඒ වෙනුවෙන් පියවර තබන්න සුබවාදී ආකල්පයක් සපයාවි.

ගෘහ නිර්මාණ ශිල්පී ධම්ම ගීතාංජන උපුටා ගැනීම මවුබිම