පැරණි තාලෙට ඉදිවුණු අලුත් කාලේ ගෙදර
අලුතෙන් නිවෙසක් තනන්න බලාපොරොත්තු වන හැම කෙනකුටම තමාටම අනන්‍ය වූ ආශාවන් බොහොමයක් තිබෙනවා. ඒ එක් එක් පුද්ගලයාගේ සිතැඟි ඉටු කර නොගත්තොත් ඉදිකරන නිවෙස ගෙහිමියාට සතුටක් උපදවන්නක් වෙන්නේ නැහැ. ඉතින් තමන්ගේ අභිලාෂයන්, ආදායම සහ උචිත බව ආදී සියල්ල හරි හැටි සලකා බලා නිවෙසක් සැලසුම් කරගන්න හිතුවොත් එය නිසැකයෙන්ම සතුට පිරි සිරි නිවෙසක් වීම ඒකාන්තයි.
අද අපි කතා කරන නිවෙස ටිකක් පැරැණි හැඩයට අලුතෙන් ඉදිවන නිවෙසක්. තල කිහිපයක වහල සඳහා සාම්ප්‍රදායික හැඩතල යොදා ගැනීමෙන් ඒ අවශ්‍ය හැඟීම් නිවෙසට එක්කොට තිබෙනවා. එක් පසෙකින් වාහන නැවතුම හා ඊට සමමිතිකව කාමරයක් එක් කරගෙන තිබෙනවා.
නිවෙසේ ඉදිරිපස මැද කොටසේ වැරන්ඩාවකින් නිවෙසේ ආලින්දයට පියනැඟිය හැකියි. පැරැණි නිවාසවල ඉස්තෝප්පු කාමරය වැනි කාමරයක් වම්පසට එක්කොට තිබෙනවා. සාලයත් පැරැණි නිවෙස්වල මෙන් නිවෙසේ මැද කොටසේ ස්ථාන ගත කර තිබෙනවා. නමුත් ආලෝකය සඳහා විශාල ජනෙල් යොදා එක් පසෙකින් මිදුලට විවර කර තිබෙනවා. ඊට අමතර කුඩා මැද මිදුලක් එක්කර තිබෙනවා.
ආලින්දයෙන් කෑම කාමරයටත්, එතැනින් මුළුතැන්ගෙය වෙතත් යා හැකියි. ඒ එකකට එකක් සමීපවත් බෙහෙවින් පිළිවෙළකටත් සකසා ඇති නිසා සැලසෙන පහසුව කිව නොහැකි තරම්. එසේම මුළුතැන්ගෙය කොටස් දෙකකට බෙදා සකස් කොට තිබීමත් පැරැණි හා නවීන යොදා ගැනීම්වල මුසුවක්.
පොදු අවකාශයෙන් වෙන්ව ප්‍රධාන නිදන කාමර තුනක් ස්ථාන ගත කර තිබෙනවා. ඒ හැම කාමරයක්ම සැලකිය යුතු ඉඩකින් යුක්තයි. එසේම සියලුම කාමර වෙත සමීපව නාන කාමර තිබීමෙන් නිවැසියන් වෙත ගෙනෙන පහසුව කිව නොහැකි තරම්. පොදු නාන කාමර දෙකක් ලෙස සැලසුම් කර ඇතත් අවශ්‍ය නම් ඉන් එකක් යාබද නාන කාමරයක් බවට පහසුවෙන් පත් කරගත හැකියි.
පර්චස් 12ක් පමණ ඉඩකට සැලසුම් අතර ඇති මේ නිවෙසේ වර්ග අඩි ප්‍රමාණය 1500ක් පමණ වනවා. මේ නිවෙස ඉදිකරන්නට වැය වන මුදල ආසන්න වශයෙන් රු. මිලියන 5.5ක් පමණ වනවා.
සියලු පහසුකම්වලින් පිරුණු අද කාලයට තරමක් වෙනස් මේ සොඳුරු නිවෙස ටිකක් සාම්ප්‍රදායිකත්වයට කැමැති සැප පහසු ජීවිතයකට හීන දකින කෙනකුට අලුත් ආලෝකයක් සපයන නිවෙසක් වේවි.
උපුටා ගැනීම මව්බිම
