සුඛෝපභෝගී නිවහනක සිහිනය සැබෑ කරවන නිවාස සැලසුමක්
ගොඩක් වෙලාවට අපි මේ ලිපි පෙළින් කතා කරන්නේ අඩු වියදම් කුඩා නිවාස ගැන වගේම කුඩා ඉඩම්වලට ගැළපෙන නිවාස ගැන. ඒ නිසා වෙනසකටත් එක්ක අද අපි ටිකක් විශාල ඉඩමකට ගැළපෙන සහ සුඛෝපභෝගී නිවාස සැලසුමක් ගැන කතා කරන්න හිතුවා.
ඉඩමක් මිලදී ගනිද්දී එක් මායිමක් හෝ ස්වාභාවික පරිසරයකට මායිම් වනවා නම් එය ඒ නිවෙසට එක් කරන්නේ ලොකු වටිනාකමක්. ඉන් නිවෙස වෙත ස්වාභාවික පරිසරයේ අසිරිය ගෙන එන්න වගේම කෘත්‍රිම පරිසරයකින් මිදී නිවැසියන් වෙත සැනසිල්ල ගෙන එන්න හේතු වෙනවා. අද අපි කතා කරන නිවෙසත් එක් පසක් කුඩා දිය පහරකට හා ස්වාභාවික පරිසරයකට මායිම් වෙනවා. එම දිශාව නැඟෙනහිර දිශාව වන නිසා නිවෙස වෙත ස්වාභාවික ආලෝකය ගෙන ඒමටත් එම දිශාව වඩාත් විවර කිරීමෙන් බලාපොරොත්තු වෙනවා.
නිවෙසට ගැළපෙන ආකාරයේ වාහන නැවතුමක් නිවෙසේ එක් පසෙකින් පිහිටුවා තිබෙන අතර ඒ අසලින්ම ඇති අමතර ෙදාරටුවකින් නිවෙසට ඇතුළු වීමට ඉඩ සලස්වා තිබීම විශේෂත්වයක්. සාලය හා කෑම සාලය එකම අවකාශයේ පිහිටුවා ඇති අතර ඉදිරිපසින් සහ පෙර කී නැඟෙනහිර දෙසින් විශාල ජනෙල් හා වැරැන්ඩා පිහිටුවා තිබෙනවා. කුඩා මැද මිදුලක් සහ පිළිම වහන්සේනමක් සඳහා සුදුසු ඉඩක් සහිතව තමයි සැලසුම් කර තිබෙන්නේ.
නිවෙසේ මුළුතැන්ගෙය වඩාත් පොදු අවකාශයට විවර වන ලෙස සැලසුම් කර තිබෙන නිසා නිවෙසට ඉතා නවීන පෙනුමක් එක් කරනවා සේම ඉඩකඩ ඉතා විශාල කර දක්වනවා. සේවාදායකයාගේ අවශ්‍යතාව මත විශාල කාමර සහ එයටම යාබද නාන කාමර සැලසුම් කර තිබෙනවා. ඉන් නිවෙසට වඩාත් සුවපහසු හා මිල අධික බවක් ගෙන එනවා. ඊට අමතරව පහළ මහලේ සහ ඉහළ මහලවල ප්‍රධාන නිදන කාමර දෙකටම ඇඳුම් කාමරයක් එක් කර තිබෙන නිසා ඉන් තවත් පහසුවක් සේම පිළිවෙළක් නිවෙසට ගෙන එන අතර සුව පහසුව වඩාත් වර්ධනය කෙරෙනවා. පහළ මහලේ කුඩා ගබඩා කාමරයක් සහ රෙදි සේදුම් සඳහා අවකාශයක් වෙන් කර තිබීමත් වැදගත් එකතු කිරීමක් වේවි.
ඉහළ මහලට පිවිසුණු පසුව පහළ සාලය දර්ශනය වන ලෙස ද්විත්ව අවකාශයක් නිර්මාණය වන ලෙසයි සැලසුම් කර තිබෙන්නේ. රූපවාහිනි නැරඹුම් ස්ථානය වෙනුවෙන් පෙර කී දිශාවට බැල්කනි යොදා තිබෙනවා. පහළ මහලේ පරිදිම කාමර ඉඩකඩ සහිතව නාන කාමර යාබද ආකාරයට සැලසුම් කර තිබෙන්නේ. එසේම ඉහළ මහලේ ප්‍රධාන නිදන කාමරයේ නාන කාමරය කුඩා මැද මිදුලක් හා ඨපඥඥද ඹචතත එකක් සහිතව සැලසුම් කර තිබෙනවා. එසේම මෙම නිදන කාමරයට තවත් විශේෂ අවකාශයක් ලෙස කුඩා විනෝද කාමරයක් එක්කර තිබෙනවා. විනෝදකාමී යුවළකට මෙම සම්පූර්ණ අවකාශයම වෙන්වූ කොටසක් නිසා නිවෙස තුළම පෞද්ගලිකත්වයෙන් පිරි ආදරණීය අවකාශයක් නිර්මාණය කර දෙනු ඇති.
සම්පූර්ණ ඕධය හැඩයෙන් සැලසුම් කර ඇති නිවෙසේ වහලය ස්ලැබ් එකකින් ආවරණය වන ලෙසයි සැලසුම් කර තිබෙන්නේ. වර්ග අඩි 3000ක් ඉක්මවන මේ නිවෙස ඉදිකරන්නට වැය වන මුදල ආසන්න වශයෙන් රු. මිලියන 14.5ක් පමණ වෙනවා. සුඛෝපභෝගී නිවෙසක සැපපහසු ජීවිතයක් ගැන සිහින දකින අයකුට ඒ සිහිනය යථාවක් කරගන්නට මෙම සැලසුම ජවය සපයාවි.
උපුටා ගැනීම මවුබිම
