පර්චස් 10කට හැඩකාර නිවෙසක්

නිවෙසක් කියන්නේ බොහෝදෙනකුට ජීවිතයේ තියෙන ලොකුම හීනයක්. ඒ හීනය තමන්ට හැකි උපරිමයෙන් පාට කරන්න ඒ හැමකෙනෙක්ම මහත් වෙහෙසක් ගන්නවා. තමන් සතු ඉඩමේ ඉඩකඩ සහිත අලංකාර නිවෙසක් ඉදිකරනවා වගේම මිදුලෙන් කොටසක් ඉතිරිකර ගන්නටත් බොහෝ අය කැමතියි. ඉඩම කුඩා වුණත් එම බලාපොරොත්තුව ඉටුවන හැඩකාර නිවෙසක් ගැනයි අපි අද කතා කරන්නේ.

පර්චස් 10ක් වැනි ඉඩක් සහිත මෙම නිවෙස ඇතුළත ඉඩකඩ වගේම බාහිර අලංකාරය ගැනත් වැඩිපුර සිතා තිබෙනවා. නාගරික හෝ අර්ධ නාගරික පරිසරයකට වඩාත් ගැළපෙන නිවෙසක් වුණත් පුංචි වෙනස්කම් කිහිපයකින් ග්‍රාමීය පරිසරයකට වුවත් ගළපාගත හැකියි. ඉඩම පිටුපසින් හා ඉදිරිපසින් මෙන්ම එක් පසෙකිනුත් සැලකිය යුතු ඉඩක් ඉතිරි කර සැලසුම් කර ඇති නිවෙස අනෙක් පසින් මායිම මත blind wall ඉදිකර තිබෙනවා. එම මායිම දෙසට වන්නට වාහන නැවතුම සකස් කොට තිබෙනවා.

නිවෙස ඉදිරිපසින් වැරන්ඩාවක් (verandah) සැලසුම් කර තිබෙන අතර ප්‍රධාන පිවිසුමෙන් පිවිසෙන්නේ නිවෙසේ ආලින්දයටයි. ද්විත්ව අවකාශයක (double height space) ලෙස ඉහළ මහල හා සම්බන්ධ වන මෙම අවකාශය ඉහළින් ඉදිරිපසින් විශාල වීදුරුවක් හරහා ආලෝකය විශාල වශයෙන් ලැබෙනු ඇති. එසේම ආලින්දය හා කෑම සාලයත් එකම අවකාශයේ මඳක් වෙන්කොට සැලසුම් කර තිබෙන අතර කෑම සාලයට දෙපසින් මැද මිදුලත්, පිටත උද්‍යානයත් පිහිටුවා තිබෙනවා. නාගරික පරිසරයකදී වුණත් නිවැසියන් මින් ලබන නිස්කලංකය විශාලයි.

ඉඩකඩ සහිත මුළුතැන්ගෙය නිවෙසේ කෙළවරකට වන්නට සැලසුම් කර තිබෙන අතර ඒ හරහා පිටුපස උද්‍යානයට පිවිසිය හැකියි.  පහළ මහලේ කාමර දෙකක් සැලසුම් කර ඇති අතර ඉන් එකක් අවශ්‍ය නම් කාර්යාල කාමරයක් ලෙස භාවිත කළ හැකියි. එසේම අනෙක් කාමරය සැලකිය යුතු ඉඩක් සහිතව සේම පොදු නාන කාමරයට ඉතා නුදුරින් පිහිටුවා තිබෙනවා.

පියගැටපෙළ මැද මිදුල (court yard) සමීපයෙන් ඉහළට දිවෙන අතර ඉහළ මහලේ පොදු අවකාශය වන රූපවාහිනි නැරඹුම් ස්ථානය ඉඩකඩ සහිතව සැලසුම් කර තිබෙනවා. එසේම පොදු නාන කාමරයක් දෙපසින් පිහිටුවා ඇති නිදන කාමර දෙකත් සැලකිය යුතු ඉඩකින් යුක්තයි.

වියදම අඩුවෙන් අහස් උද්‍යානය (roof terrace) මිහිර නිවැසියන්ට ලබාගැනීම වෙනුවෙන් කුඩා කොටසක් ආවරණය කෙරෙන්නේ ස්ලැබ් එකක් මඟින්. එසේම ඉතිරි කොටස් සරල වහල කිහිපයකින් මට්ටම් කිහිපයකින් පිහිටුවා තිබෙනවා. ඉන් නිවෙසට වඩාත් විශාල බවක් වගේම පිරුණු බවක් ගෙන එනවා. ඒ සඳහා බිත්ති කිහිපයකට යොදාගෙන ඇති විශේෂිත උපක්‍රම හා වර්ණ විශේෂ මෙහෙයක් සිදුකරනු ලබනවා.

පර්චස් 10ක් වැනි ඉඩමකට ගැළපෙන ලෙස වර්ග අඩි 2150ක් සහිත මේ නිවෙස හැඩකාර නිවෙසක සිහිනය දකින ඔබට බලාපොරොත්තුවේ එළි දල්වන පහන් වැටක් වේවි.

මව්බිම