පුංචි ඉඩමකට විසල් පෙනුමැති නිවෙසක්

ඉඩම කුඩා වුණත් පෙනුමැති නිවෙසක් හදන බලාපොරොත්තුව බොහෝ දෙනකුට තිබෙනවා. එහෙත් තැබිය යුතු සීමාවන් ඉතිරි කර නිවෙසක් සාදන විට ඉඩකඩ සහිත විසල්  පෙනුමැති නිවෙසක් සෑදීම තරමක අභියෝගයක්. අද අපි කතා කරන්නේ පර්චස් 7.7ක් වැනි ඉඩකට සැලසුම් කෙරුණු විසල් පෙනුමැති නිවෙසක් පිළිබඳවයි. 

මාර්ගය දෙසට දිග මායිමක් සහිත නිවෙසේ ඉදිරිපස විසල් පෙනුම වඩා වැඩි අලංකාරයකින් යුක්ත වන පරිදි සැලසුම් කර තිබෙනවා. මේ නිවෙසේ වාහන නැවතුම (Car Port) එක් අන්තයක සැලසුම් කර තිබෙනවා. වැරැන්ඩාවකින් ප්‍රධාන ‍ෙදාර සහිත පිවිසුම අව්වෙන්, වැස්සෙන් ආරක්ෂා කෙරෙන අතර  වාහන නැවතුම හා එය සම්බන්ධ කර තිබෙනවා. 

බිත්ති අවමයෙන් යොදා ගැනෙනා විවෘත මාදිලියේ ක්‍රමයට සාලය, කෑම සාලය හා විවෘත මුළුතැන්ගෙය (Living, Dining & Pantry) එකම අවකාශයක පිහිටුවා තිබෙනවා. ඊට අමතරව කුඩා මුළුතැන්ගෙයක් (Wet Kitchen) ඊට සමීපවම තරමක් ආවරණය වී පිහිටුවා තිබීමත් නිවෙසේ අලංකාරය රැකගන්න වඩාත් ප්‍රායෝගික එකතු කිරීමක් වේවි. සාලය හා එම පොදු අවකාශය වටා ඇති විශාල ජනේලවලින් ආලෝකය ලබාගන්නා අතරම මැද මිදුලකින් (Court Yard) වැඩි අලංකාරයක් නිවෙසට ගෙන එනු ඇති. එසේම කොටසක් ද්විත්ව අවකාශයක් ලෙස ඉහළට විවර වන නිසා නිවෙසේ ඇතුළත විසල් අවකාශයක් නිර්මාණය වනු ඇති. 

පහළ මහලේ නිදන කාමරයක් වගේම පොදු නාන කාමරයකුත් සමීපව පිහිටුවා තිබෙනවා.  එසේම රෙදි සෝදන යන්ත්‍රය හා ඊට අදාළ කටයුතු වෙනුවෙන් කොටස්  (Laundey Area)  වෙන්කර ඇති නිසා වඩාත් පිළිවෙළ නිවෙසක් වෙනුවෙන් එය වැදගත් පිහිටුවීමක් වේවි.

මැද මිදුල වටා ඉහළ මහලට පිවිසුණු පසුව වඩා විශාල ද්විත්ව අවකාශය හරහා සාලය දර්ශනය වීම මනහර අද්දැකීමක් වේවි. ඉහළ මහලේ කාමර තුනෙන් දෙකක් පොදු නාන කාමරයක පහසුකම් සහිතව සැලසුම් කර තිබෙන අතර අනෙක් ප්‍රධාන නිදන කාමරය කුඩා නාන කාමරයක් හා ඇඳුම් කාමරයක් සහිතව සැලසුම් කර තිබෙනවා. කාමර සියල්ල විවිධ අන්දමේ බැල්කනිවලින් අලංකාර වන අතර ඒවායින් නිවෙසේ පිටත පෙනුම වඩාත් සුන්දර කරනු ඇති.

රූපවාහිනි නැරඹුම් ස්ථානය විශාල ජනේල මඟින් පිටතට විවර වන අතර නිවෙසේ පෙනුම වැඩි කිරීමේ බලාපොරොත්තුවෙන් උස තනි පියස්සේ වහලයක් නිවෙසට එක් කර තිබෙනවා. ඒ වෙනුවෙන් යකඩ හා වීදුරු යොදාගෙන තිබීමද විශේෂත්වයක්. එයින් කොටස වඩාත් ආලෝකවත් වනවා සේම පිටත පෙනුමට ගෙනඑන වෙනස් සහ විසල් පෙනුම වැදගත්.

බොක්ස් මාදිලියට වඩා සමීපව සැලසුම් කර ඇති මේ නිවෙසේ ඉහළම මහල අහස් උද්‍යානයක් (Roof terrace) ලෙස සකස් කර තිබෙන්නේ කුඩා වැසිකිළියක් සහිතවයි. පර්චස් 7.7ක් වැනි ඉඩක සැලසුම් කර ඇති මේ පෙනුමැති මනහර නිවෙසේ වර්ග අඩි ප්‍රමාණය 3000ක් පමණ වෙනවා. මේ සිහිනය වෙනුවෙන් වැය වන මුදල දළ වශයෙන් රු. මි. 12ක් පමණ වේවි.

කුඩා ඉඩක පෙනුම වැඩි විසල් නිවෙසක සිහිනය ලුහුබඳින ඔබට මේ නිවෙසේ ප්‍රභාව යම් ධනාත්මක බලාපොරොත්තුවක් වේවි.

මව්බිම