විසිත්ත කාමරය ඔබ ගැන හෙළි කරන කැඩපතකි
ගෘහයක අභ්‍යන්තර නිර්මාණය ගැන කතා කිරීමේදී නිවසේ ඉතාම වැදගත් අංගයක් වන විසිත්ත කාමරය (Living Room) අපට අමතක කළ නොහැකිය. අමුත්තකු නිවසට පැමිණි වහා මුලින්ම ඇස ගැටෙන්නේ විසිත්ත කාමරය සභිත ප්‍රදේශයයි. එය එම නිවැසියන් හඳුනා ගැනීම සඳහා වන හැඳුනුම්පතක් වැනිය. අමුත්තන් ඉන් ඔබ්බට විහිදී ගිය, නිදන කාමරවලට හෝ ඇතුළු ගැබට පිවිසෙන්නේ නැත. එම නිවසේ අයගේ පිළිවෙළ, අපිළිවෙළ ගැන ඉතා පැහැදිලි චිත්‍රයක් මවා පාන්නට විසිත්ත කාමරය ක්‍රියා කරන බව අමතක කළ යුතු නොවේ. විසිත්ත කාමරය හැම විටම හොඳ ආලෝකයකින් සහ වාතාශ්‍රයකින් යුතු ප්‍රියමනාප තැනක් විය යුතුය. විශාල ජනෙල් කවුළු යොදාගෙන එයට හොඳහැටි ආලෝකය ලබාගැනීමට කටයුතු කිරීම ඉතා වැදගත් වෙයි. living-roomඑසේම එහි පොළවබිත්ති සේම සිවිලිමද එකිනෙකට එකක් මනා ලෙස ගළපාගත යුතුය. එපමණක් නොව එහි භාවිතා කරන තිර රෙදි පවා පොළවට බිත්තිවලට, සිවිලිමට, ගැළපෙන්නට තෝරාගත යුතුය. එසේම හොඳින් වාතාශ්‍රය ලැබෙන ආකාරය සිනිඳු, තිර රෙදි එහි ජනෙල්වලට භාවිතා කිරීමද ඉතා වැදගත් වෙයි. අද ඉදිවන නවීන අංගවලින් යුතු නිවාසවල විසිත්ත කාමරයට පැමිණි විට නිවසේ විශාල ප්‍රදේශයක් දිස්වන ආකාරයට (Open Plan) බිත්ති අඩු විවෘත ප්‍රදේශයක් ලෙස ඇති අයුරු දැකගත හැකිය. එවිට විසිත්ත කාමරයට පැමිණි කෙනෙකුට දිස්වන්නේ දක්නට ලැබෙන්නේ විසිත්ත කාමරය පමණක් නොවේ. සමහරවිට මුළුතැන්ගෙය, නිවස ඇතුළත අංග රැසක් විසිත්ත කාමරයට දිස්විය හැකිය. එබැවින් විසිත්ත කාමරයට දර්ශනය වන ඒ සියලු අංග පිරිසිදුව පිළිවෙළට නිතරම තබා ගැනීමට කටයුතු කිරීමද ඉතා වැදගත් අවශ්‍යතාවයකි. එසේම කුඩාම විසිත්ත කාමරයක් නම් එහි බිත්තිවලට ආ‍ලේප කරන පැහැයේ වෙනස්කම් මගින් ප්‍රදේශය විශාල කර පෙන්විය හැකිය. එසේම විසිත්ත කාමරයක් අලංකාර කිරීමේදී එම නිවස හිමි පුද්ගලයාගේ රැකියාව, අනන්‍යතාවයට ඔබින ආකාරයට එය කිරීමද එහි සිරියාව වැඩිකර ගැනීමට හොඳ මගකි. උදාහරණයක් ලෙස සංගීතය ඇලුම් කරන කෙනකු හෝ එම වෘත්තියේ නියැළෙන කෙනෙකුට නම් විසිත්ත කාමරයේ පියානෝවක් වැනි සංගීත භාණ්ඩයක් යොදාගෙන ලස්සන කරගත හැකිය. එසේම සතුන්ට අසීමිතව ආදරය කරන කෙනෙකුට නම් සතුන්ගේ පින්තූරයක් වැනි දෙයක් යොදාගෙන එහි විසිතුරු බව වැඩිකරගත හැකිය. එසේම විසිත්ත කාමරය සඳහා සෝපාවක් පුටු කට්ටලයක් වැනි දෙයක් යොදන විට එහි වර්ණය තිර රෙදිවලට ගෙබිමට, සිවිලිමට, බිත්තිවලට සහ එහි තිබෙන අනෙකුත් බඩු භාණ්ඩවලට ගැළපෙන්නේදැයි විමසිලිමත් වන්න. සමහර අය නිවසේ විසිත්ත කාමරය භාවිතා කරන්නේ අමුත්තන් මුණගැසීම සඳහා පමණි. නමුත් තවත් සමහර නිවෙස්වල විසිත්ත කාමරය, නිවසේ අය රැස්වන තැනක්, රූපවාහිනිය නරඹන තැන ලෙසද භාවිතා කරයි. එබැවින් විසිත්ත කාමරය පිළියෙළ කිරීමේදී එහි යොදන පුටු සංඛ්‍යාව ආදිය නිවසේ සාමාජිකයන්ට සහ අමුත්තන්ට ප්‍රමාණවත් වන අයුරින් සැකසිය යුතුය. එසේම හැමවිටම විසිත්ත කාමරයේ පිළිවෙළ, පිරිසිදුකම ගැන සැලකිලිමත්ව කටයුතු කළ යුතුමය. සමහර විට හදිසියේ නිවසට අමුත්තකු පැමිණි විට චකිතයකින් තොරව එහි රැගෙන යාමට අවශ්‍ය පසුබිම සූදානම් කර ගෙන තිබිම අත්‍යවශ්‍ය වූවකි.
ලක්බිම පුවත්පත
