නිදන කාමරය වර්ණ තේමාවකින් හැඩ කරගන්න

ගෘහණියන් බොහෝ විට ස්වයං රැකියාවල නියුතුව සිටින්නේ තමන්ගේ අපතේ යන කාලයට නියම වටිනාකමක් දීමටයි. මැහුම් ගෙතුම්වලට වඩාත් රුචිකත්වයක් දක්වන ඔබට ඉතාම අඩු මුදලකින් ඔබේ නිවෙසට අවශ්‍ය දෑ ඔබේ දෑතින්ම නිර්මාණය කරගත හැකියි. අප අද බලමු, නිදනකාමරයට අවශ්‍ය ද්‍රව්‍ය ඔබේ දෑතින්ම නිර්මාණය කර ගන්නා ආකාරය. 

අවශ්‍ය ද්‍රව්‍ය : 

• ලිනන් රෙදි 

• ලයිනින් රෙදි 

• පැඩින් 

• නූල් කැරැලි 

• ස්විකුවින්ස් 

• රේන්ද

නිර්මාණය කර ගන්නා ආකාරය :

ඇඳ ඇතිරිල්ල : 

අපි මුලින්ම බලමු ඇඳ ඇතිරිල්ල නිර්මාණය කර ගන්නා ආකාරය කොහොමද කියලා. රූපයේ දැක්වෙන ආකාරයට ඔබ මුලින්ම කළ යුත්තේ අවශ්‍ය ආකාරයට මල් මසා ගැනීමයි. මෙහිදී භාවිත කර තියෙන්නේ බුලියන් මැස්මයි. බුලියන් මැස්මට අනුව මලක පෙත්ත නිර්මාණය වන්නේ ඉදිකටුවේ නූල් පොටවල් හතක් එතීමෙනි. එහි පෙති පිරවිලි මැස්මෙන් හා නැටි මැස්මෙන් නිර්මාණය කරගෙන තිබේ. එය වඩාත් අලංකරණය කර ගැනීමට ස්විකුවින්ස් අල්ලා ගන්න. මෙයාකාරයට ඇඳ ඇතිරිල්ලේ මල් මසා ගැනීමෙන් අනතුරුව එම ලිනන් රෙද්ද කුවිල්ට් කරගත යුතුයි. එහිදී අවශ්‍ය ප්‍රමාණයට ලයිනින් රෙද්දක් ගෙන ඊට පැඩින් දමා ලිනන් රෙද්ද කුවිල්ට් කරගත යුතුයි. මෙහිදී රූපයේ දැක්වෙන ආකාරයට රෙද්දෙහි වර්ණය තෝරා ගැනීමේදී මනා වර්ණ සංයෝජකයකින් යුතුව කළ යුතුයි. එහි වර්ණ ඔබේ කැමැත්ත මත තෝරා ගන්න.

කොට්ට : 

අපි ඇඳ ඇතිරිල්ල ලස්සන කර ගත්තා. දැන් කොට්ට සකස්කර ගන්නා ආකාරය බලමු. එහිදී වර්ණ සංයෝජනය ඇඳ ඇතිරිල්ලේ වර්ණයට සමාන විය යුතුයි. එමෙන්ම කොට්ටය වඩාත් අලංකාර කර ගැනීම සඳහා පෙර ආකාරයෙන්ම මල් මසා ගැනීමත් ඒවාට සුදුසු රේන්දයක් ඇල්ලීමත් කළ හැකිය. වැඩිදුර අලංකාර සඳහා විවිධ හැඩතලයේ කොට්ට නිර්මාණය කර ගැනීමට ඔබට පහසුවෙන්ම පුළුවන්. මෙහි දිග පෙනුමෙන් යුතු කොට්ටය මසා ගැනීමේදී අවධානය යොමු කළ යුතු කරුණක් වන්නේ එහි දිග ප්‍රමාණය අඟල් 15ක් නම් ලෙනින් රෙද්ද කැපීමේදී එය අඟල් 25ක් වන ලෙසට කැපීමයි. පසුව අඟල් 5ක් දෙපැත්තෙන්ම තිබිය යුතුයි. අවශ්‍ය නම් එම කොට්ට සඳහා ද මල් මසාගත හැකියි. දැන් ඔබේ ඇඳ ඇතිරිල්ල සහ කොට්ට සියල්ල නිර්මාණය කරගෙන අවසන්.

පා පිස්ස : 

ඇඳ ඇතිරිලිවලටම ගැළපෙන අන්දමේ පාපිස්නාව නිර්මාණය කරගත හැකිය. එයටද යොදාගෙන ඇත්තේ ලෙනින් රෙද්දයි. එය රේන්දයකින් තවදුරටත් අලංකාර කරගත හැකිය. 

ලයනි රසිකා නිරෝෂිණී 

උපුටා ගැනීම මව්බිම