එලිගන්ට් විදිහට අදින්න කැමති කාන්තාවන්ට විතරයි
ඔයාට කවදහරි හිතිලා තියෙනවද වැදගත් කාන්තාවක් එහෙමත් නැත්නම් එලිගන්ට් ලේඩි කෙනෙක් සමාජයේ පිරිසක් ඉස්සරහා කැපිලා පේන්නෙ ඇයි කියලා? ඒකෙ රහස එයාලා අඳින ඇඳුම් නෙවෙයි. මොනවද එයාලා අඳින්න තෝරගන්නෙ නැත්තෙ කියන එක. ඉතින් මේ ලිපිය වැදගත් වෙන්නෙ මෙන්න මේ වගේ එලිගන්ට් විදිහට ඇඳුම් අඳින්න කැමති අපේ කාන්තාවන්ට. ඒ නිසා සාමාන්‍ය විදිහට අඳින පළඳින උදවිය මේක කියවලා හිත රිද්දගන්න උවමනා නෑ. මොකද මේක අපි ගේන්නේ හැමදාම කරන විලාසිතාවන්ගෙන් ඈත් වෙලා වෙනසක් කරගන්න හිතන කෙනෙක් ඉන්නවනම් අන්න එයාට…
එලිගන්ට් විදිහට අඳින එකෙන් අපිට වාසි ගොඩක් ලැබෙනවා. පළවෙනිම කාරණේ එලිගන්ට් ලේඩි කෙනෙක් කාටුන් ප්‍රින්ට්ස් අඳින්නෙ නෑ. ඒ කිව්වේ මිකී මවුස්, හෙලෝ කිටී, ස්පොන්ජ් බොබ් වගේ කාටුන් කැරැක්ටර්ස් ප්‍රින්ට් කරපු ඇඳුම්. මොකද මේ ඇඳුම් ඇන්දම ලැබෙන්නෙ බාල වයස්කාර පෙනුමක් මිසක් එලිගන්ට් එහෙමත් නැත්නම් වැදගත් පෙනුමක් නෙවෙයි.
යෝගා පෑන්ට්ස් ඇඳන් ෂොපින් කරන්න යන්න එපා
ඊළඟ පොයින්ට් එක යෝගා පෑන්ට්ස් සහ ලෙගින්ස්. සාමාන්‍යයෙන් මේ යෝගා පෑන්ට්ස් සහ ලෙගින්ස් අඳින්නෙ යෝගා කරද්දි, ජොගින් කරද්දි හෝ ජිම් එකේදිනෙ. ඉතින් එහෙමනම් මේ දේවල් ඔයා අඳින්න ඕනෙ ඒ තැන්වලට විතරයි. ඔයා යෝගා පෑන්ට් එකක් ඇඳන් ෂොපින් කරන්නවත් රෙස්ටෝරන්ට් එකකට කන්න යන්නවත් එපා. මොකද ඒක වැදගත් කාන්තාවකට ගැළපෙන්නෙ නෑ. කෙනෙක්ට කියන්න පුළුවන් මේ දේවල් හැමතැනටම අඳින්නෙ ඇඟට පහසු නිසා කියලා. තැනකට ගැළපෙන්න අඳින්න පුළුවන් ඇඟට පහසු වෙනත් කලිසම් වර්ග ඕනතරම් තියෙනවා. ඒ නිසා කම්මැලිකමට යෝගා පෑන්ට් එකක් ඇඳන් නොගැළපෙන තැන්වලට නොයා ඒ තැනට ගැළපෙන විදිහට යන්න උත්සාහ කරන්න.
පළවෙනි තෝරාගැනීම රිප් ජින්ස් කරගන්න එපා
රිප් ජින්ස් කියන්නෙත් මේ දවස්වල ජනප්‍රියතම ෆැෂන් චොයිස් එකක්. ඒත් කොච්චර ලෝකෙ ජනප්‍රිය වුණත් මේ රිප් ජින්ස් එලිගන්ට් කියන වර්ගයට අයිති වෙන්නෙ නෑ. අපි අහලා තියෙනවනෙ ෆෝමල් සහ අන්ෆෝමල් කියල වචන දෙකක්. ඒ කියන්නෙ විධිමත් හා අවිධිමත්. මේ රිප් ජින්ස් කොහෙත්ම ෆෝමල් එහෙමත් නැත්නම් විධිමත් අවස්ථාවලට කොහෙත්ම ගැළපෙන්නෙ නෑ. ඔයාට ෆෝමල් තැනකට වැදගත් විදිහට ඩෙනිම් එකක් අඳින්නම ඕනෙනම් Tailored trousers හෝ Straight leg jeans උත්සාහ කරල බලන්න. මම මේ කියන්නෙ රිප් ජින්ස් අඳින්න එපා කියල නෙවෙයි. නමුත් එලිගන්ට් ලේඩි කෙනෙකුගේ පළවෙනි තෝරාගැනීම රිප් ජින්ස් විය යුතු නෑ.
වැඩිපුර පෙන්නන්න කැමති කොටස විතරක් හයිලයිට් කරන්න
විලාසිතා තෝරාගැනීම තමන්ගෙ පෞද්ගලික කැමැත්තක්. ඔයා තෝරගන්න විලාසිතාවලින් ඔයාට හොඳ ආත්ම විශ්වාසයක් ලැබෙනවනම්, හොඳ ප්‍රතිරූපයක් ලැබෙනවනම්, සමාජයට ඔයාගෙන් එළියට දාන්න උත්සාහ කරන ඉමේජ් එක ඒ විදිහට එළියට දෙන්න පුළුවන්නම් ඒ විදිහට ගැළපෙන විලාසිතා තමයි ඔයා තෝරගන්න ඕනෙ. මේක වැදගත්ම කාරණයක්. ගොඩක් කාන්තාවන් කැමැතියිනෙ තමන්ගෙ සරාගී බව පෙන්නන්න. ඉතින් සරාගී බව පෙන්නන්න වැදගත් විදිහටත් පුළුවන්.
ඔයාට පුළුවන් ඔයා එළියට පෙන්නන්න කැමතිම කොටස වැඩිපුර හයිලයිට් වෙන්න විලාසිතා කරන්න. උදාහරණයකට ඔයාට ඔයාගෙ කකුල් දෙක පේන විදිහට අඳින්න ඕනෙනම් හොඳට වැහෙන්න ටොප් එකක් ඇඳලා කෙටි සායක් අඳින්න.
නැත්නම් උඩින් හොඳින් වැසුණු කෙටි ගවුමක්. ශරීරයේ උඩ කොටස හයිලයිට් වෙන්න අඳින්න ඕනෙනම් උඩින් ඕපන් එකක් තියෙන යට කොටස දිගට තියෙන ඇඳුමක් අඳින්න. වැදගත්ම දේ මේ සේරම තැන් එකපාර පෙන්නන්න යන්න එපා.
ගෑනු ළමයි ගොඩක් කැමතියිනෙ ෂෝට්ස් අඳින්න. සාමාන්‍ය ප්‍රමාණයේ ෂෝට්ස් වගේම ඉතාම කෙටි ඒවත් දැන් ලංකාවෙ ගෑනු ළමයි පාරෙ ඇඳන් යනවා. මේ ෂෝට්ස් පවා එලිගන්ට් විදිහට අඳින්න පුළුවන්. එලිගන්ට් විදිහට ෂෝට් එකක් අඳින්න ඕනෙනම් කවදාවත් තට්ටම් (Bum areas) පවා එළියට පේන විදිහේ ෂෝට්ස් අඳින්න එපා.
ජුවලරි සෙට් එකම එකපාර දන්න එපා
ඕනවට වඩා දේවල් ඕනම නෑ කියල කතාවක් ඔයා අහල ඇතිනෙ. මේ කතාව හැමදේකටම අදාළයි. ෆැෂන් කරද්දි ඕනවට වඩා ආභරණ දාන එක එලිගන්ට් ලුක් එකට ගැළපෙන්නෙ නෑ. එලිගන්ට් ලේඩීස්ලා හැමතිස්සෙම තෝරගන්නෙ සිම්පල් ක්ලැසික් ජුවලරීස්.
ඔයා ලොකු මාලයක් දානවනම් ඔයාගෙ අනිත් ආභරණ පුංචි වෙන්න ඕනෙ. ඔයා අඳින්නෙ දිලිසෙන ඇඳුමක්නම් ඔයා ඒ ඇඳුමට දාන්න ඕනෙ සිම්පල් ජුවලරීස්. ගොඩක් අය ලේසියට එකම ජාතියේ ජුවලරි සෙට් එකම දානවා. ඒත් මේ ෆුල් ජුවලරි සෙට් එක එකපාර දාන එකෙන් ඔයාට නොගැළපෙන පෙනුමක් එන්න පුළුවන්. නමුත් ජුවලරි සෙට් එකෙන් අයිටම්ස් දෙකක් වගේ එකපාර පළඳින්න පුළුවන්. ඒක අඳින ඇඳුම අනුව වෙනස් වෙනවා.
අඳින ඇඳුම් අයන් කරන්න
අයන් එහෙමත් නැත්නම් ස්ත්‍රික්ක කියල ජාතියක් මේ ලෝකෙ තියෙන්නෙ ඇඳුම් මදින්න මිසක් පොඩි වෙච්ච ඇඳුම ඒ විදිහටම ඇඳන් යන්න නෙවෙයි. ඇඳුමක් අයන් කරගන්න තියෙන කම්මැලිකමට ගොඩක් කාන්තාවන් අතට අහුවුණ ඇඳුම එහෙම්ම ඇඳන් යනවා.
හැබැයි මතක තියාගන්න ඕනෙ පොඩි වුණ ඇඳුම් ඇඳන් එළියට බැස්සම ඔයාගෙ ඇඳුමෙන් ඔයා ගැන ගොඩක් දේවල් බාහිර සමාජයට හිතාගන්න පුළුවන්. නීට් එකට ලස්සනට අඳින ඇඳුම ඔයාගෙ මුළු ලුක් එකටම බලපානවා. ඒ වගේම තමයි ඇඳුමේ රෙදි වර්ගය, පාට, ඇඳුමේ ප්‍රමාණය ගැන ඔයා අනිවාර්යයෙන්ම අවධානය යොමු කරන්න ඕනෙ.
ස්ක්‍රන්චීස් තියෙන්නෙ කොන්ඩෙට දාන්න මිසක් අතට දාන්න නෙවේ
දැන් සමාජයේ තියෙන අලුත්ම විලාසිතා රැල්ලක් තමයි කොණ්ඩෙට දාන්න තියෙන ස්ක්‍රන්චීස්, වූල් බෑන්ඩ්ස් අතේ දාගෙන යන එක. අතට දාන්න ස්ක්‍රන්චීස් ඕනෙ නෑ. ඔයාට පුළුවන් හොඳ කොලිටි බැන්ගල් එකක් හෝ ඔරලෝසුවක් අතට දාන්න.
ඒ වගේම අපි හැමෝටම අපි ආස කරන හෑන්ඩ් බෑග් එකක් තියෙනවා. කොච්චර පරණ වෙලා ඩැමේජ් වුණත් යන යන හැමතැනම අරගෙන යන. ඒ බෑග් එක කොච්චර ගාණක් දීලා ගත්තත් පරණයිනම් අයින් කරන්න. කැත පරණ හෑන්ඩ් බෑග් එකකට පුළුවන් ඔයාගෙ පෙනුම අඩුකරලා පෙන්නන්න.
එරංදි කෞශල්‍යා
උපුටා ගැනීම නවලිය
