SMART පෙනුමට OFFICE යන්න

ඇඳුමට ගැළපෙන්න පාවහන් තෝරා ගැනීම වැදගත් වුවත් එය රැකියාවේ ස්වභාවය මත වෙනස්වෙන්නත් පුළුවන්. අයෙක් රැකියාවේදී දිගු වෙලාවක් අසුන්ගෙන සිටියත් තවත් කෙනෙක් දිගු වෙලාවක් හිටගෙන වැඩ කරනවා වෙන්න පුළුවන්. ඒ නිසා ඔෆිස් එකට ගැළපෙන විලාසිතාවක් තෝරාගන්නාවිට රැකියා ස්ථානය, තනතුර වගේම සුව පහසුව ගැනත් සිතා බැලීම වැදගත්. 

01. වර්ක් පම්ප්ස්  (Work pumps)

උස - මිටි හැමෝටම ගැළපෙන වර්ක් පම්ප් පාවහන් දවසේ දිගු වෙලාවක් හිටගෙන වැඩකරන කාන්තාවන්ට වඩාත් හොඳ තේරීමක් වන අතර තමන්ගේ උස බර සමබරව දරාගෙන වැඩ කිරීමේ පහසුව ඇති කරයි. මේ පාවහන් භාවිතය කාන්තාවන්ට ඇවිදීම පහසු කරයි. විවිධ වර්ණ හා මෝස්තරවලින් හැඩවී තිබෙන නිසා ලස්සන ගවුම් විලාසිතාවකට වගේම බෙල් බොටම් හා ටයිඞ් සාය විලාසිතා සඳහා කදිමට ගළපාගන්න පුළුවනි.

02. මියුල්ස්  (Mules)

පාදයේ පිටුපස විළුඹ ප‍්‍රදේශයට ආකර්ෂණීයබව වගේම සුවපහසුව උපරිම සපයන පාවහන් වර්ගයක්. විළුඹට තද ගතියක් හෝ බරක් දැනෙන්නේ නැත. බර නොමැති මේ සපත්තු ඔබට වැඩිදුර ඇවිදීම පහසු කරයි. 

03. ෆ්ලැට් ෂූස්  (Flat shoes)

මෙම සපත්තු සැහැල්ලූබවින් වැඩි නිසා ඔබේ පාදයට වැඩි බරක් ගෙන දෙන්නේ නැත. ෆ්ලැට් ෂුස් පාදයට අලංකාර, සිහින් සහ වඩාත් විශ්වාසදායක පෙනුමක් ලබා දෙන අතර  ඕනෑම විධිමත් අවස්ථාවක් සඳහා පරිපූර්ණ පාවහන් විලාසිතාවක් විදියට පාවිච්චි කිරීම පහසු යි. එහෙත් උසින් අඩු කෙට්ටු සිරුරක් ඇති කෙනකුට ෆ්ලැට් ෂූස් එතරම් ගැළපෙන්නේ නැහැ.

04. ස්පූල් හීල්ස්  (Spool heels)

තරමක් අඩි උස පාවහන් පාවිච්චි කරන්න කැමති සිරුර ටිකක් මහත යුවතියකට පහසු සහ ගැළපෙන පාවහන් වර්ගයක් ලෙස Spool heels හඳුන්වන්න පුළුවනි. කාර්යාලයට යන විටදී මෙන්ම සාදයක් සඳහා ද මෙම පාවහන් සුදුසු යි. මෙම පාවහන් උසින් අඩු වන අතර පළලින්ද යුක්තයි. පහසුවෙන්  ඕනෑම අවස්ථාවක් සඳහා භාවිතා කළ හැකියි. කාර්යාලයට සුදුසු  ඕනෑම ඇඳුම් විලාසිතාවක් සමග පහසුවෙන්ම ගළපාගත හැකියි.

ඔබේ හොඳම පෙනුම සඳහා කළු සහ දුඹුරු ස්ලැක් සහිත කාන්තා ලෝෆර් පැලඳගන්න. පෙනුම සම්පූර්ණ කිරීම සඳහා කෙටි අත් සහිත කාන්තා කමිසයක් සහිත විලාසිතාමය අත්බෑගයක්  ගන්න.

05. ලෝෆර්ස් (Loafers)

ඔබ වඩාත් සුවපහසුව ගැන සිතන අයෙකු නම් ලෝෆර්ස් ඔබට වඩාත්ම හොඳින් ගැළපෙන පාවහන් යුගලය යි. විශේෂයෙන් මේ පාවහන් වර්ගය නිම වී තිබෙන්නේ රැකියා ජීවිතයේ සුව පහසුව සඳහාමයි. සාමාන්‍ය ගමනක් සඳහාත්, මෙම පාවහන් භාවිතා කළ හැකියි. විධිමත් පෙනුමක් සඳහාද, මිතුරු සාදයක් සඳහා මෙන්ම විනෝද චාරිකාවක් යෑමේදී මෙම සුව පහසු ලෝෆර්ස් යුගලය ඔබට කදිම මිතුරියක් වේවි.

06. ස්ටිලෙටෝ  (Stilettos)

ස්ටිලෙටෝ පාවහන් යනු එක් ක්ෂණයකින් ඔබේ පෙනුම හා සුන්දරත්වය ඉහළ නැංවීමට හැකි පාවහන් යුගලක්. විවිධ වර්ණවලින් සමන්විත වුවත්, කළු හෝ බේජ් වැනි වර්ණ සහිත ස්ටිලෙටෝ යුගලයක්  ඕනෑම ඇඳුමක් සමග ගළපාගත හැකියි. එහෙත් මෙම සිහින් අඩි සහිත පාවහන් යුගලය පැලඳගෙන වැඩිදුරක් ඇවිදීම නම්, පහසු කටයුත්තක් නොවෙයි. කාර්යාලයට පැමිණීමේදී සහ ඇතුළත වැඩ කරන විට ඇවිදින්නට තිබෙන ඉඩප‍්‍රමාණය සීමිත නම් ඔබට මේ පාවහන් පහසුවෙන් භාවිතා කරන්න පුළුවනි. සාදයක් සඳහා දිගු ගවුමකට, ජීන්ස් කලිසමකට, ටයිඞ් සායක් සඳහා මෙන්ම සැහැල්ලු කුර්තා ඇඳුමකට පවා ස්ටිලෙටෝ පාවහන් ගළපාගත හැකියි.

උපුටා ගැනීම සිරිකත