හිසකෙස් පාට කළාම හැමෝම ලස්සනයිද?
වයසට, පෙනුමට ගැළපෙන්න හිසකෙස් පාට කරන හැටි
තරුණ තරුණියන්ගේ හිසකෙස් විලාසිතා අතර හිසකෙස් වර්ණ ගැන්වීම මූලික තැනක් ගන්නවා. එහෙත් හිසකෙස් වර්ණ ගැන්වීම හැම කෙනෙකුටම නොගැළපෙන අතර ඒ ඒ වර්ණ තෝරා ගැනීමද එකිනෙකාගේ සමේ වර්ණය සහ වෙනත් හේතු මත වෙනස් වෙනවා. හිසකෙස් පාට කිරීමට පෙර සිතිය යුතු බොහෝ දේ තිබෙනබව අප කියන්නේ මේ නිසයි. එසේ නම් සිතිය යුතු බොහෝ දේ මොනවාදැයි මේ ලිපියෙන් සොයා බලමු.
සමේ පැහැය : ප්‍රථමයෙන්ම සමේ පැහැය ගැන සැලකිලිමත් විය යුතුයි. ඒ අනුව හිසකෙස්වලට යොදන වර්ණය ගැන ඔබ තෝරාගන්නා රූපලාවන්‍ය ශිල්පියාගෙන් විමසිය යුතුයි.
ඇසේ වර්ණය : හිසකෙස්වලට වර්ණයක් තෝරාගැනීමේදී ඔබේ ඇසේ වර්ණයත් සැලකිල්ලට ගන්න. සමහර වර්ණ ඔබේ ඇස් මතු කර ස්වභාවික සුන්දරත්වය වැඩි කරයි.
ස්වාභාවික හිසකෙස්වල වර්ණය : ඔබගේ ස්වභාවික හිසකෙස් වර්ණය මූලිකව තබාගෙන වර්ණ තෝරාගත යුතුයි. සම්පූර්ණයෙන්ම වර්ණය වෙනස් කරනවා නම් වියදම වැඩි විය හැකියි. එවැන්නක් තෝරාගැනීමේදී ඔබගේ ජීවන රටාව, ආදායම ගැනද සැලකිලිමත් වෙන්න. ඔබගේ හිසකෙස් වර්ණ ගැන්වීමෙන් පසුව එය හරියාකාරව නඩත්තු කර ගත හැකිද එය වෙනුවෙන් කැපවිය හැකිද යන්නත් තේරුම් ගන්න.
වෘත්තිය : ඒ වගේම ඔබ නියැලෙන වෘත්තිය ගැනද සැලකිලිමත් විය යුතුයි. සමහර රැකියාවලට ආවේණික නීතිරීති තිබෙනවා. ඒ තැන්වලදී අපගේ ස්වභාවික හිසකෙස් හැර වෙනත් වර්ණ විලාසිතා කිරීමට හැකියාවක් නැහැ.
හිසකෙස්වල සෞඛ්‍යය : ඔබගේ හිසකෙස්වල නිරෝගිමත්බව තහවුරු කරගන්න. හිසකෙස්වලට හානි වී ඇත්නම් හානිය අවම කර ගැනීම සඳහා වර්ණ තෝරාගන්න.
මේ දවස්වල ජනප්‍රිය වර්ණ : හිසකෙස් වර්ණ විලාසිතාවද කාලයෙන් කාලයට වෙනස්වෙනවා. නිරූපණ ක්ෂේත්‍රයේ සිටින අයට නම් සමහර තැන්වලදී ජනප්‍රිය වර්ණ සුදුසුයි. කාලෙන් කාලෙට එන වර්ණ හැම තැනකදීම හැමකෙනාටම ගැළපෙන්නෙ නැහැ. සමහර පුද්ගලයින් තමන්ට නොගැළපෙන වර්ණ විලාසිතාවලට යොමුවෙනවා. හිසකෙස් වර්ණ විලාසිතාවක් කිරීමට ප්‍රථමයෙන් අනිවාර්යයෙන් තමන් තෝරාගන්නා රූපලාවන්‍ය ශිල්පියා සමග සාකච්ඡා කර තීරණයක් ගන්න.
වයසට ගැළපෙන වර්ණ තෝරා ගන්න
තරුණ වයස (අවුරුදු 20 දක්වා) මෙම වයස තුළ විචිත්‍රවත් සහ තද වර්ණ අත්හදා බැලීම සාමාන්‍ය ය. ඒ වගේම නිර්මාණශීලීත්වය පෙන්නුම් කළ හැකි වර්ණ හිස කෙස්වලට භාවිතා කිරීම තරුණ තරුණියන් අතර ජනප්‍රියයි. වයස අවුරුදු 20 සහ 30 ගණන්වල සිටින පුද්ගලයින් ස්වභාවික සහ හුරුබුහුටි හිසකෙස් වර්ණවලට කැමැත්තක් දක්වයි. වයස අවුරුදු 40 හෝ ඊට වැඩි පුද්ගලයින් ඔවුන්ගේ ස්වභාවික හිසකෙස් පිළිබඳ සැලකිලිමත්වීම බහුලව දැකිය හැකි කරුණක්. එහිදී ඔවුන්ගේ ස්වභාවික පැසුණු හිසකෙස් සමග මිශ්‍රවන හෝ එය වැඩිදියුණු කරන වර්ණ තෝරාගැනීමේ අවස්ථා දැකිය හැකියි. මේ සෑමදෙයක්ම පුද්ගල මනාපය අනුව වෙනස් විය හැකියි. ඕනෑම වයසක පුද්ගලයෙකුට තමන්ට විශ්වසනීය සහ පහසු විදියට වර්ණ විලාසිතා තෝරා ගත හැකියි. තම තීරණය අවිනිශ්චිත නම් වෘත්තීය කොණ්ඩා මෝස්තර ශිල්පියකුගේ උපදෙස් ගැනීම වඩාත් සුදුසුයි.
පෞරුෂයත් වෙනස් කරන්න පුළුවන්
හිසකෙස් වර්ණ විලාසිතා කිරීමේදී පුද්ගලයකගේ මුහුණ් හැඩය, සමේ පැහැය වගේම පෞරුෂ ලක්ෂණත් වෙනස් විය හැකියි. උදාහරණයක් ලෙස අඳුරු සමක් හිමි පුද්ගලයෙක් ඉකදබාැ වර්ණයක් භාවිතා කළහොත් ඇයගේ ස්වරූපය නිරූපිකාවන් මෙන් වෙනස් විය හැකියි. ඒ වගේම පැහැපත් සමත් අයෙක් තැඹිලි වර්ණය භාවිත කළහොත් වෙනත් රටවල පුද්ගලයින්ගේ ස්වරූපයට සමාන විය හැකියි. අපේ රටේ පුද්ගලයෙකුට තැඹිලි පාට වැනි වර්ණයක් හිසකෙස්වලට භාවිත කළහොත් අන් අය අතර ඒ පුද්ගලයා විහිළුවක් වෙනවා. එම පුද්ගලයින් ඒ දේවල්වලට කැමති වුවත් රුපලාවන්‍ය ශිල්පියාට එය පැහැදිලි කරදීමට සිදුවෙනවා. නීතිඥයෙක් ගුරුවරයෙක් වැනි තරාතිරම්වල සිටින පුද්ගලයින්ට ඉකදබාැ වර්ණය භාවිතා කිරීමට හැකියාවක් නැහැ. එවැනි තරාතිරම්වලට ඒ ස්ථානවලින් ලැබෙන වෘත්තීය මිනුම් තිබෙනවා. සමහර පුද්ගලික ආයතනවල පුද්ගලයින්ට නම් ඔවුන් කැමති විලාසිතා කිරීමට නිදහසක් තිබෙනවා. එවැනි ආයතනවල තරුණියන්ගේ ඇඳුම් විලාසිතා සමග හිසකෙස්වලට මෙවැනි ඉකදබාැ වර්ණ භාවිතා කිරීමෙන් ඔවුන්ගේ ක්‍රියාශීලීත්වය සහ ආකර්ෂණය පෙන්නුම් කරනවා.
මෙම කරුණුවලට අමතරව පුද්ගලයෙකුගේ හිසකෙස් ගැලවී යාම, හිසකෙස්වල ගනකමේ ස්වභාවය වෙනස්වීම අභ්‍යන්තරයේ පවතින රෝගී තත්ත්වයක් නිසාද ඇතිවිය හැකියි. හිසකෙස් වර්ණ භාවිතය රෝග විනිශ්චය සාධකයක් නොවෙයි. ඒ වගේම වයස, හෝමොන වෙනස්වීම, පෝෂණ තත්ත්වය, පාරිසරික බලපෑම් හිසකෙස් පෙනුමට බලපාන තවත් කරුණු කිහිපයක්. ඔබගේ හිසකෙස් හෝ සෞඛ්‍ය වෙනස්වීම ගැන ඔබ අවධානය දෙන්නේ නම් ඔබට නිසි මග පෙන්වීමක් ලබා දිය හැකි සෞඛ්‍ය සේවා වෘත්තිකයකු හෝ චර්ම රෝග විශේෂඥයෙකුගෙන් උපදෙස් ලබා ගැනීම වඩාත් සුදුසුයි.
උපදෙස් - ප්‍රවීණ රූපලාවන්‍ය ශිල්පී ජීවන් ගුණසේකර
උපුටා ගැනීම සිරිකත
