අඳින ඇඳුමට ගැලපෙන ආභරණ තෝරාගන්න හැටි
ආභරණ කියන්නෙ ඉතින් ගැහැණු අයට ගැලපෙන මාතෘකාවක් නේ. මේ කතා බහ ඔන්න ගැහැණු කතාවක්. අපි කතා කරන්නෙ ඇඳුමට ගැලපෙන්න අනෙක් ආභරණ තෝරාගන්න හැටි ඉගෙන ගන්න උදව් වෙන පොඩි පොඩි කාරණා ටිකක්. හුඟක් ගැහැණු අය ලස්සනට අඳින්න, ආභරණ පළඳින්න හුඟක් කැමති උනාට ඒ ගැන තියෙන නොදැනුවත්කම නිසාම නොගැලපෙන ආභරණ අරගෙන ඇඳුමේ තියෙන ලස්සනත් නැති කරගන්න අවස්ථා අපි ඕනතරම් දැකල තියෙනවනේ. ඔන්න මේක කියෙව්වට පස්සෙනම් එහෙම වෙන එකක් නැහැ. පොඩිම පොඩි සිම්පල් ආභරණ වල ඉඳල ලොකුවට කැපිල පේන්න පළදින ආභරණ වෙනකං ඕනම විදිහක ආභරණ අඳින්න, පළඳින්න ආස නෝනලාට මොකක්ම හරි උදව්වක් ලැබෙයි ඒ ගැන තව ටිකක් ඉගෙන ගන්න.
1. ඇඳුමේ අත් සහ කර විලාසිතාව
ආභරණ තෝරගන්නකොට අපි හුඟක්ම සැලකිලිමත් වෙන්න ඕන, ඒත් අපි හුඟක් දෙනෙක්
නොහිතන, එක්කෝ හිතන්න ඕන කියල නොදන්න කාරණාවක් තමයි මේ. අපි ඇඳුමට
ගැලපෙන්න ආභරණ තොරගන්නකොට වගේම පළඳින ආභරණ වර්ග මොනවද කියල හිතනකොට
ඉස්සෙල්ලම බලන්න ඕන අපි අඳින ඇඳුමේ අත් සහ කර විලාසිතාවන් මොන වගේද කියන
එක. මැණික් කටුව වෙනකන්ම අත්දෙක දිගට දාල මහපු ඇඳුමක්නම් ඒ ඇඳුමට වළලු හෝ
බ්‍රේස්ලට් දාන එකෙන් වැඩක් නැහැ. ඒක ගැලපෙන්නෙත් නැහැ. ඒ වගේම බෙල්ල ළඟටම
කර දාපු ඇඳුමක්නම් බෙල්ලටම බඳින මාල ගැලපෙන්නෙත් නැහැ. අන්න ඒ වගේ ඇඳුමේ
විලාසිතාව අනුව තමා දාන්න ඕන, නැති ආභරණ වර්ගය තෝරාගන්න ඕන.
2. කොණ්ඩේ විලාසිතාව
ඊළඟ එක තමයි කොණ්ඩේ විලාසිතාව. ඇඳුම ගැන හිතුවට පස්සෙ හිතන්න ඕන ඒ ආභරණ එක්ක දාන කොණ්ඩ විලාසිතාව මොකක්ද කියල. කොණ්ඩේ කඩාගෙන යනවනම් කරාබු වලට ලොකු අවධානයක් දීලා වැඩක් නැහැ. පේන්නෙ අඩුවෙන්නේ. ඒ වගේම දාන හෙයාර් ස්ටයිල් එක අනුවත් ගැලපෙන, නොගැලපෙන විවිධ කරාබු වර්ග තියෙනවා. ඒ වගේම තමයි මාලත්. ඒ ගැනත් ටිකක් ලොකුවට හිතන්න ඕන ආභරණ මිලදී ගන්න කලින්.
3. ඔෆිස් යන ඇඳුමට
ඔන්න දිනපතා යන ඔෆිස් ඇඳුමට ගැලපෙන ආභරණ ගැන කතා කරමුකෝ. ඔෆිස් එකට උනත් යනකොට අනිවාර්යයෙන් පොඩියට හරි අභාරණයක් පැළඳගෙන යන්නම ඕන. අඳින ඇඳුමේ පෙනුමෙන් වාසි වෙන අවස්ථා කාර්යාල ජීවිතේ ඕන තරම් තියෙන්න පුළුවන්. ඉතින් ඇඳගෙන යන ඇඳුමේ පෙනුම තව ටිකක් වැඩිකරන්න පුළුවන් වෙන්නෙ මේ ආභරණ වලිනුයි. අනිත් එක එන්නන් වාලේ ඔෆිස් ආව වගේ නැතුව උනන්දුවෙන් ආපු බවත් මේ ආභරණ පැළඳීමෙන් පෙන්නන්න පුළුවන්.
කොහොමහරි ඔෆිස් යන ඇඳුමට ගැලපෙන ආභරණ ගැන කතා කරමුකෝ. ඕනෙයි කිව්වට ඔෆිස් ඇඳුමට මහා ලොකු ආභරණනම් ගැලපෙන්නෙ නැහැ. ආභරණ වර්ගය, ඒ කිව්වේ රත්තරන්ද? රිදීද? පබළුද? කියන එක ගැටළුවක් නැහැ. ඒක තමන්ගේ අනන්‍යතාවය අනුව තීරණය කරන්න පුළුවන්. හැබැයි ඔය ඕනම එකක් සිම්පල් වෙන්න ඕන. තනිපට චේන්, බ්‍රේස්ලට්, පර්ල්ස් අල්ලපු සරල ආභරණ, ලොකුම නැති පබළු මාල වගේ ඒව තමයි ඔෆිස් ඇඳුමකට සුදුසු.
4. සාරියට
සාරියට පළඳින ආභරණ, යන අවස්ථාව අනුව වෙනස් වෙන්න පුළුවන්. සාමාන්‍යයෙන් එදිනෙදා රැකියාවට යනවනම් කලින් ඔෆිස් ඇඳුමට වගේම සිම්පල් මාල, ටිකක් ලොකු කන්ෆරන්ස් එකකට වගේනම් ටිකක් කැපිලා පේන මාලයක් වගේ තෝරාගන්න පුළුවන්. විවෘත කිරීමක් වගේ විශේෂ උත්සවයක්නම් මාල, වළලු හෝ බ්‍රේස්ලට්, කරාබු වගේ හැම ආභරණයක් ගැනම සැලකිලිමත් වෙන්න ඕන. ඔසරියක් අඳිනවනම් ඉන හවඩිය, ඔසරි කටුවක් වගේ දේවලුත් අනිත් ආභරණ වලට ගැලපෙන්නම ගන්න ඕන.
5. සැන්දෑවේ සාදයකට
හැන්දෑවේ සාමාන්‍ය පාර්ටි එකක්නම් ටිකක් කැපිල පේන්න ආභරණ දැම්මට කමක් නැහැ. හැබැයි ඇඳුම හුඟාක්ම ලොකුවට කැපිල පේන එකක්නම් ආභරණ ටිකක් චාම් උනාට කමක් නැහැ. එත් වැඩියෙන්ම සුදුසු නම් ටිකක් සාමාන්‍ය පෙනුම ඇඳුමකට හොඳ ආභරණ පාවිච්චි කරන එකයි. මොකද පාර්ටි එකක් කියන්නෙ වෙඩින් එකක් වගේ ලොකු අවස්ථාවක් නෙමෙයිනෙ. ගල් අල්ලපු ලොකු මාල, ලොකුවට පේන කරාබු, ලොකු වළලු, බ්‍රේස්ලට් වගේ පෙනුම තියෙන ඒ වගේම කැපිල පේන වර්ණයන්ගෙන් යුතු ආභරණ තමයි සැන්දෑ සාදයකට තෝරාගන්න ඕන.
6. විශේෂ අවස්ථාවක්
විශේෂ අවස්ථාවක් කිව්වේ ඔය මඟුල් ගෙයක් වගේ ලොකු දෙයකට. ඉතින් ඒ වගේ තැනකට අඳින ඇඳුම අනිවාර්යයෙන්ම ටිකක් පෙනුම එකක් වෙන්නම ඕනනෙ. ආභරණත් ඒ වගේම තමයි. ඇඳුමේ පෙනුම තව වැඩි කරල පෙන්නන්නත්, එහෙම නැත්තම් ලස්සන ඇඳුමක් කැත කරල පෙන්න්නන්නත් ලොකු හැකියාවක් තියෙනව මේ ආභරණ වලට. ඒ නිසා ඇඳුමේ වටිනාකමට නොදෙවෙනි වෙන්න ආභරණ තෝරාගන්න ඕන අවස්ථාවක් තමයි මේ මඟුල් ගෙවල් වගේ විශේෂ අවස්ථා. ඇඳුමේ පාටට, ඩිසයින් එකට ගැලපෙන්න රත්තරන්, රිදී වගේ ටිකක් ග්ලිටරි ගතියෙන් වැඩි, හෝල් එකක ඇතුලේ නම් ලයිට් එලියට හොඳට පේන ආභරණ තොරගන්නවනම් තමයි හොඳ.
7. ක්‍රීඩා ඇඳුමට
ක්‍රීඩා ඇඳුමට මොන ආභරණද අනේ කියල හිතෙනවා නේද? ඇත්ත තමයි. ක්‍රීඩා කරන වෙලාව කියන්නෙ ආභරණ ඇඳ පැළඳගෙන ඒවගේ හැඩ බල බල, ඒවා පරිස්සම් කර කර ඉන්න පුළුවන් වෙලාවක් නෙමෙයිනෙ. හැබැයි අපිට එහෙම හිතුනට ලස්සනට අඳින, ආභරණ වලට හරිම කැමති තරුණියක් නම් ක්‍රීඩා කරන්න, ව්‍යායාම කරන්න වගේ යන වෙලාවල් වලදී උනත් ඔහේ කණ කර පාලුවට යන්න කැමති නැහැනෙ. අන්න එහෙම අයට පුළුවන් ක්‍රීඩා ඇඳුමට, ඇඳුමේ පාටට ගැලපෙන්න හොඳින් පේන ස්ටෝන්ස් හෝ බීඩ්ස් කරාබු කුට්ටමක් ඒකටම ගැලපෙන සිම්පල් බ්‍රේස්ලට් එකක් වගේ ආභරණ පාවිච්චි කරන්න.
උපුටා ගැනීම දිවයින
