ලස්‌සන රුවකට කැමති නම් පාවහන් ගැනත් හිතන්න
අපි ලස්‌සනට අඳින්න කැමතියි. මේ ලස්‌සන වඩාත් දියුණු වී පෙනෙන්නට නම් අපි පළඳින පාවහන් ගැනත් වැඩි අවධානයක්‌ යොමු කරන්න ඕනේ. අපි දැකලා තියෙනවා බොහෝ කාන්තාවන් ලස්‌සනට මේකප් කරලා ලස්‌සන ඇඳුම් ඇඳලා කොහෙත් ම ගැලපෙන්නේ නැති පාවහන් පැළඳගෙන යනවා. මේක ඉතා ම අවලස්සන යි. ඒ නිසා නිතරම ඇඳුමට ගැලපෙන විදියට පාවහන් තෝරගෙන පළඳින්න පුරුදු වෙන්න.
මෙතනදි ඔබ කල්පනා කරයි ඇඳුමේ පාටට පාවහන් ගොඩක්‌ අරගන තියන්නේ කොහොමද කියලා. එහෙම අවශ්‍ය නැහැ. කළු, සුදු හා දුඹුරු පාවහන් කට්‌ටල තුනක්‌ තිබෙනවා නම් ඒ හොඳට ම ඇති. කළු පාවහන් පමණක්‌ වුනත් තමක්‌ නෑ. කළු ඕනම ඇඳුමක වර්ණයට ගැලපෙනවා.
ඒ වගේ ම උස අඩිය සහිත හා රහිත පාවහන් අතරත් වෙනසක්‌ තියෙනවා. උස උඩි සහිත පාවහන්වලින් ගමනට ලතාවක්‌ ලැබෙනවා. ඒ වගේම ඇඳුමේ අලංකාරයත් හොඳින් පෙනෙනවා. නමුත් පාවහන්වල උස වැඩි වන විට දෙපයට වෙහෙසක්‌ දැනෙන්නට පුළුවන්. ඒ නිසා වඩාත් තද වන පටි ඇති පාවහන් තෝරාගන්න එපා. සාමාන්‍ය ප්‍රමාණයට අඩිය උස සපත්තු එදිනෙදා භාවිතයට ගන්න. වඩාත් උස සපත්තු විශේෂ අවස්‌ථාවලදි පමණක්‌ පළඳිනවා නම් හොඳයි. ඒ වගේ ම පැතලි අඩිය ඇති ඉතා ම ලස්‌සන පාවහන් අද වෙළෙඳ පොළේ තිබෙනවා. මේවා දෙපයටත් පහසුයි.
සපත්තු දෙකක්‌ මිලදී ගන්නා විට එහි ලස්‌සන ගැන වගේ ම පැළඳීමේ පහසුව ගැනත් හිතන්න ඕන. ඒ නිසා පාවහන් පළදා මදක්‌ ඇවිදලා බලන්න. එයින් ගැටලුවක්‌ ඇති වන්නේ නැතිනම් එම පාවහන් ඔබට ගැලපෙනවා.
බොහෝ දෙනෙකුට පවතින ගැටලුවක්‌ වන්නේ අලුත් පාවහන්වලට දෙපය කැපීමයි. ඒ සඳහා දෙපයේ වගේම පාවහන්වලත් ඔබ ආලේප කරන ක්‍රීම් ස්‌වල්පයක්‌ ආලේප කරන්න. පාවහන්වල සම තද ස්‌වභාවයෙන් යුතු නිසායි කකුල කැපෙන්නේ. එම සම මෘදු බවට පත් වූ විට එයට කැපෙන්නේ නෑ.
එකම මෝස්‌තරයේ පාවහන් පළඳින විටත් එම පාවහන්වල රටාව අනුව කකුලේ එක්‌ පෙදෙසක්‌ කළු වීමට ඉඩ ඇත. ඒ නිසා නිතර ම එකම මෝස්‌තරය තෝරා ගන්න එපා.
ඇතැම් අයට විවිධ සම් වර්ග අසාත්මික වෙනවා වරක්‌ පැළඳි පාවහන් අසාත්මික වූයේ නම් එය නැවත පළඳින්න එපා. ඒ මඟින් දෙපය කසා තුවාල වීමට පුළුවන්. නැවත නැවත එම පාවහන් ම පැළඳීමෙන් එය සුවවන්නේ නෑ.
උපුටා ගැනීම නවලිය
