පාට ගළපලා ඇඳුම් අඳින නිවැරැදි ක්‍රමය

විලාසිතාවලට තරුණ මහලු භේදයක් නැහැ කියලා ලෝක ප්‍රසිද්ධ ඇඳුම් නිර්මාණ ශිල්පියෙක් වුණු ජර්මන් ජාතික කාල් ලැගර්ෆෙල්ඩ් කියල තිබුණා. ඔහු එහෙම කියල තිබුණේ පසුගිය අගෝස්තු මාසෙ ඔහුගේ අලුත්ම විලාසිතාගාරය ප්‍රංශයේ විවෘත කරපු වෙලායෙවෙදියි. කාල් විලාසිතාවලට වගේම විලාසිතා සඳහා වර්ණ ගැළපීම සම්බන්ධයෙනුත් බොහොම ප්‍රසිද්ධියක් උසුලන කෙනෙක්. 

ගැළපෙන පාට : 

වර්ණ ගැළපීම ගැන ඔහු ලියපු පොතක් ෆැෂන් ඩිසයිනර්ස්ලා අතර බොහොම ප්‍රසිද්ධ වෙලා තියෙනවා. ඔහු ඒ පොතේ සඳහන් කරලා තියෙන්නෙ ෂර්ට් එකක් අඳිනවා නම් ඒකට ගැළපෙන පාටින් ටයි එකක් තෝරා ගන්නෙ කොහොමද, ඒ වගේම සැමියා අඳින ඇඳුමේ පාටට ගැළපෙන්න බිරිය ඇඳුම් තෝරන්නෙ කොහොමද වගේ සරල දේවල් ගැනයි. කාල් මේ ගැන පැහැදිලි කරලා දෙන්න කලර් චාට් එකක් නිර්මාණය කරලා තියෙනවා. ඒ කලර් චාට් එක තමයි මේ පළමුවැනි රූපයේ තියෙනනෙ. ඔහු කියන විදියට විලාසිතා ලෝකයේ ප්‍රධාන වර්ණ තුන තමයි රතු, කහ සහ නිල් කියලා කියන්නේ. එතකොට මේ පාට තුනට ගැළපෙන අනෙක් පාට මොනවද කියලා අපි බලමු. කාල් කියන විදියට නම් වර්ණ ගළපන්න පුළුවන් ප්‍රධාන ක්‍රම හතරක් තියෙනවා. 

සමාන වර්ණ : 

ඉන් පළමුවැන්න තමයි සමාන වර්ණ ගැළපීම. සමාන වර්ණ ගැළපීම කියලා කියන්නේ ළා නිල් පාටට සමාන පාට මොනවද කියලා ගළපා ගන්න එක. මේ කලර් චාට් එකේ හැටියට ෂර්ට් එක ළා නිල් පාට නම් ළා නිල් පාටට සමාන පාටකින් ටයි එකක් අඳින්න පුළුවන්. උදාහණ විදියට කොළ පාට, දම් පාට, තද නිල් පාට වගේ ඒවා ළා නිල් පාටට ළඟින් යන පාට විදියට ගළපා ගන්න පුළුවන්.

විරුද්ධ වර්ණ : 

ඔහු කියන විදියට දෙවැනි ක්‍රමය තමයි අනුපූරක වර්ණ ගැළපීම. ඒ කියන්නේ අපි හිතමු අපි කලර් චාට් එකේ රවුමේ රතු පාට කැපිලා යන විදියට කේන්ද්‍රය හරහා රේඛාවක් ඇන්ද කියලා. එතකොට රතු පාටට හරි කෙළින් විරුද්ධ පැත්තේ තියෙන පාට රතු පාටට ගැළපෙනවා කියලා ඔහු කියනවා. ඒ කියන්නෙ කොළ පාට, ඒ විදියට කහ පාට ෂර්ට් එකකට දම් පාට ටයි එකක් ගැළපෙනවා. නිල් පාට ෂර්ට් එකකට තැඹිලි පාට ටයි එකක් ගැළපෙනවා. මෙන්න මේ විදියට විරුද්ධ පාට ගැළපීම තමයි ඔහු අනුපූරක වර්ණ ගැළපීම කියලා පැහැදිලි කරලා තියෙන්නෙ. 

වර්ණ ත්‍රිත්වය : 

තුන්වැනි ආකාරය විදියට කාල් කියලා දෙන්නෙ වර්ණ තුනක් එකිනෙකට ගළපන්නෙ කොහොමද කියල. ඒ ගැන තමයි පස්වැනි රූපයේ කියලා තියෙන්නෙ. ඔහු කියන විදියට කලර් චාට් එකේ සරල රේඛාවක් ඇඳලා ඒ රේඛාව අංශක 90කින් බෙදෙන විදියට තවත් රේඛාවක් ඇන්දාම ලැබෙන පාට එකිනෙකට ගැළපෙනවා. ඒ කියන්නෙ රූපයේ විදියට නම් තැඹිලි, නිල් සහ කොළ කියන වර්ණ තුන එකිනෙකට හොඳින්ම ගැළපෙනවා. එතකොට කහ, දම් සහ තැඹිලි කියන්නෙත් ගැළපෙන වර්ණ තුනක්. 

උදාසීන වර්ණ : 

කාල් වර්ණ ගළපන හතරවැනි ආකාරය තමයි උදාසීන වර්ණ ගැළපීම. ඔහු උදාසීන වර්ණ කියලා හඳුන්වන්නේ කළු, සුදු සහ අළු කියන පාට තුන. මේ පාට තුන කොයි විදියට එකිනෙක ගැළපෙනවාද කියනවා නම් ලෝකෙ තියෙන ගැළපෙනම වර්ණ තුන කළු, සුදු සහ අළු කියලයි ඔහු හිතන්නෙ. ඒ වර්ණ තුන ඕනෑම විදියකට මැච් කරලා අඳින්න පුළුවන් පාට තුනක්ලු. 

මේ විදියටම පිරිමි ළමයින්ට සහ ගැහැනු ළමයින්ට, විශේෂයෙන්ම සැමියා සහ බිරිය දෙදෙනාටත් වර්ණ ගළපලා ඇඳුම් අඳින්න පුළුවන් කියලා ඔහු කියනවා. ඒ කියන්නේ සැමියා නිල් පාට ෂර්ට් එකක් අඳිනවා නම් බිරියට පුළුවන් සමාන වර්ණ ගැළපීම යටතේ දම්, ළා නිල් හෝ කොළ වගේ පාට ඇඳුමක් අඳින්න. එහෙමත් නැත්නම් අනුපූරක වර්ණ ගැළපීම යටතේ රතු පාට එක්ක කොළ පාට හෝ නිල් පාට එක්ක කහ පාට අඳින්න. ගොඩක් තරුණ තරුණියන් වගේම විවාහක අඹු සැමියන් හොඳට ගැළපෙන්න කියලා හිතාගෙන එක සමාන වර්ණ අඳින එක නම් කාල් කිසිසේත්ම අනුමත කරන්නෙ නැහැ. ඔහු කියන්නේ ඕනෙවට වඩා සමාන පාට ගළපන්න ගියොත් ඒක කොහෙත්ම ගැළපෙන්නෙ නැහැ කියලයි. ඒ නිසා දෙන්නත් එක්ක පාටියකට යනවා නම් එක සමාන පාට කවදාවත්ම අඳින්න එපා කියලා ඔහු කියනවා. එතකොට නිකන් දෙන්නා යුනිෆෝම් එකක් ඇන්දා වගේ තියෙයිලු. කාල් කියන විදියට ගොඩක් තරුණ තරුණියන් වර්ණ ගැළපීම මහ ලොකු දෙයක් විදියට හිතාගෙන හිටියට ඒකෙ ඇති දෙයක් නැතිලු. වර්ණ ගැළපීම අපි කොයි විදියට කළත් දකින කෙනාගෙ ඇස්වල හැටියටයි, පාටවලට තියෙන රුචි අරුචිකම හැටියටයි අපිට ලැබෙන ප්‍රතිචාර වෙනස් වෙනවලු. ඒ කතාව නම් ඉතින් හරියටම හරි. 

දුලංජලී මුතුවාඩිගේ 

මව්බිම