ලලනා රූ සපුවට සැබෑ වෙනසක්
නෙතු බඳනා රූසපුවක් හිමි ඔබ ඔසරියකින් හැඩවූවොත් ඒ සුන්දර බව දෙගුණ තෙගුණ වන බව නම් නිසැකයි. කාන්තා ලාලිත්‍ය මනාව ඔප්නංවන හොඳම විලාසිතාවක් ලෙස ද ඔසරිය හඳුන්වන්න පුළුවනි. බලන්නකෝ මේ කට්වර්ක් ඔසරි විලාසිතාවෙනුත් ඒ බව හොඳින්ම පෙනෙනවා නේද කියලා.
අවශ්‍ය ද්‍රව්‍ය :
- කැමැති වර්ණයකින් රෙදි යාර 6 ක්
- මල්ටි ස්ටෝන්ස්
- පර්ල්ස්
- කෝඩ්
- ෆැබ්රික් ග්ලූ
නිර්මාණය කිරීම :
පළමුවෙන්ම සාරි පොට, පල්ලුව සහ නෙරියට අවශ්‍ය රෙදි කොටස් කඩා ඉවත් කරගන්න. ඉතිරිය සාරි හැට්ටයට වෙන්කර ගන්න.
දැන් සකස් කරගත් මෝස්තරය ඍජිෆෝම් බෝඩ්එක මත තබා එයට උඩින් පොලිතින් කොළය තබා ඊට උඩින් සාරි පොට කොටස තබා ඩ්‍රෝවින් පින්ස් ගසන්න.
පසුව ඔබට විනිවිදව පෙනෙන මෝස්තරය වර්ක් කරගන්න. අවශ්‍ය තැන්වලට පමණක් ගම් දමා වේළෙන්නට තබන්න. මෙසේ සාරි පල්ලුවේ ද අවශ්‍ය තැන්වලට පමණක් ගම් දමා වේළෙන්නට හරින්න.
සාරිපොටේ ගම් වේළුණු මෝස්තරය ගෙන අවශ්‍ය කොටස් සියල්ලම එම්බ්‍රොයිඩරි කතුරෙන් කපා ඉවත් කරන්න. මෙහි ඇති සියලු කොටස් එකට එකක් යාවී තිබිය යුතුය. මේ කට්වර්ක් මෝස්තරය කරගැනීමේදී විශාල කොටස් කීපයක් ඉවත් නො කරන්න. එසේ කළහොත් සාරිය එල්ලා වැටීම සිදුවිය හැකියි. එම නිසා නිතරම කුඩා කොටස් කපා ඉවත් කරගන්න. එවිට කල් පැවැත්ම වගේම වැඩි ලස්සනකුත් දිස්වේවි. දැන් යළිත් සාරි පොට ඍජිෆෝම් එක මත එලා ඩ්‍රෝවින් පින්ස් ගසා විනිවිද පෙනෙන මුළු මෝස්තරයටම සාරියේ වර්ණ කෝඩ් නූලකින් කෝඩ් කරගන්න. මෙයට වටිනාකමක් සමඟ වැඩි ලස්සනක් එකතුකර ගැනීමට මල්වටා ළඟින් ළඟින් මල්ටි ස්ටෝන්ස් අලවා ගන්න. මල්මැද ඉතිරිවන කොටස්වලට වයිට් පර්ල්ස් අලවන්න. මෙහි අතරින් පතරට ස්වීකුවින්ස් වුවද භාවිත කළ හැකියි. මේ අයුරින් ඔසරි පල්ලුව ද අලංකාර ලෙස නිර්මාණය කරගන්න. ඔසරි පල්ලුවේ මෝස්තරය ඔබගේ ඉණට සරිලන මිමි අනුව සකසා ගන්න. නෙරිය අගට පමණක් අඟල් 1/2 ක මල්ටි ස්ටෝන්ස් සමඟ පර්ල්ස් දමා අලවා හැඩකර ගන්න. මෙහි හැට්ටය ද අත දිගට දමා මසා ඇති අතර අත අගට කට්වර්ක් ක්‍රමයට හැඩකර අතේ සහ නෙරියේ තැනින් තැනට පර්ල්ස් එක බැගින් අලවන්න.
උපදෙස් - ප්‍රවීණ සාරි මෝස්තර නිර්මාණ ශිල්පිනී ජයන්ති ගමගේ
හැඩගැන්වීම - සුධීරා සැලෝන් හි සුභාධි විතානගේ
නිරූපණය – ඩයනා
රූ රටා - ටිරොන්
ඡායා - ප්‍රභාත් රඹුක්වැල්ල
ලිව්වේ උදයංගනී ලියනආරච්චි
තරුණී
