ඇස් යට කළුවීම වැළැක්වීමේ මාර්ග

ඔබත් මේ ප්‍රශ්නයෙන් පීඩා විඳින කෙනෙක් නම් මේ හේතු මඟහරවා ගනිමින් තමන්ගේ ඇස් ප්‍රවේසම් කර ගන්නට උත්සාහ ගත යුතුයි. ඒ සමඟම ඇස් යට කළුවීම වළක්වාගැනීම සඳහා නිවෙසේදීම ඉතාම සරල, පහසු ක්‍රම අනුගමනය කරමින් කළ හැකි ප්‍රතිකාර විධි ද රාශියක් තිඛෙනවා. අද අපගේ අවධානය යොමු වන්නේ ඇස් යට කළුවීම වළක්වා ගැනීම සඳහා අපට අනුගමනය කළ හැකි ප්‍රතිකාර විධි සම්බන්ධවයි. මේ සඳහා අවධානය ප්‍රථමයෙන්ම යොමුවන්නේ නිවෙසේ දී ඔබට කිසිදු වියදමකින් තොරව කළ හැකි ප්‍රතිකාර ක්‍රම පිළිබඳවයි. 

අපි බොහෝ වෙලාවට තේ වැක්කිරීමෙන් පසු ඉතිරිවන තේ රොඩු ටික කුණු කූඩයට හළනවා නේද? එහෙත් මින් ඉදිරියට ඔබ ඒ ඉවත දමන තේ රොඩු ටික ප්‍රයෝජනයට ගන්න. එය කරන්නේ කෙසේදැයි අපි ඔබට පහදා දෙන්නම්. ඉවත දමන තේ රොඩු ටික එළියට එන්නේ නැති විදියට පුළුන්වලින් ඔතාගන්න. එසේ නොමැතිව ඔබ ටී බෑග් පාවිච්චි කරන්නේ නම් ඒ ටී බෑග් ද පුළුන්වලින් දවටා ගෙන තැටි වගේ හදාගන්න. දැන් මේ කුඩා තේ බෑග් දෙක විනාඩි 10ක් පමණ කූල් වෙන්නට ශීතකරණයේ තබන්න. විනාඩි 10ට පසු ටී බෑග් දෙක ශීතකරණයෙන් එළියට ගෙන ඇඳක හාන්සි වී ඇස්දෙක පියාගෙන ඇස් දෙක මත තබාගන්න. මෙසේ විනාඩි 10 - 15ක් අතර කාලයක් ඇස් දෙක මත ටී බෑග් තබාගෙන සිටීමෙන් ඇස් යට පවතින අඳුරු ස්වභාවය නැතිවී පැහැපත් පෙනුමක් ගෙන ඒවි. ඔබ රැකියාවට යන කෙනෙකු නම් විවේකීව සති අන්තයේ නිවෙසට වී සිටිනවා නම් මේ සරල පහසු සත්කාරය ඔබට කරගත හැකියි. මේ ප්‍රතිකාර ක්‍රමයේදී ඔබ වඩාත් සැලකිලිමත් විය යුත්තේ තේ තැටි හදාගැනීමේ දීයි. මේ තැටි දෑස් මත තබාගෙන සිටින නිසා තේ කුඩු කුමන ආකාරයකින් හෝ පිටතට නොඑන ආකාරයට සාදාගත යුතුයි. මන්ද තේ කුඩු ඔබේ දෙඇස් ඇතුළට වැටුණොත් ඔබ අපහසුතාවයට පත්වේවි. 

මේ ආකාරයටම තවත් සරල සත්කාරයක් පිළිබඳ අපි ඔබ දැනුවත් කරන්නම්. ඔබේ නි‍වෙසේ මිදුලේ සමන්පිච්ච වැලක් තිඛෙනවාද? ඉස්සර නම් හැම නිවෙසකම පාහේ මිදුලේ සමන්පිච්ච වැලක් තිඛෙනවා. රාත්‍රියට පිපෙන සමන් පිච්ච මල් මිටක් කඩාගෙන එය පිරිසුදු වතුර වීදුරුවකට දමා වසා තබන්න. මැටි භාජනයකට වතුර පුරවා මේ මල් දමා තබන්න තිඛෙනවා නම් වඩාත් හොඳයි. උදේට මේ භාජනයේ ඇති වතුර වලින් දෙනෙත් හොදින් සෝදන්න. දිනපතා ඔබට මේ සත්කාරය කරන්න පුළුවන් නම් ඒත් හොඳයි. මේ සමන්පිච්ච මල් වතුරේ සිසිලසින් ඔබේ දෙනෙත් වලටත් සිසිලසක් ගෙන දෙනවා. සියුම් සුවඳකිනුත් යුක්ත වන නිසා ඔබට කිසිලෙසකින්වත් අපහසුතාවයකට පත්වෙන්නෙත් නෑ. මේ ප්‍රතිකාර විධි දෙකෙන්ම අපි අපේක්ෂා කරනුයේ ඔබේ ඇස් දුර්වර්ණ වී ඇත්නම් ඇස් යට කළුවී ඇත්නම් ඒ සඳහා ප්‍රතිකාරයක් සිදු කිරීමටයි. 

ක්‍රීම් වර්ග ආලේප කිරීමේදී මෙන් ක්ෂණයකින් එසේත් නැත්නම් සතියෙන් දින දහයකින් ආදී වශයෙන් ඉක්මන් ප්‍රතිඵල ඔබට දකින්න නොතිබුණත්, මාසයක් දෙකක් යන විට ඔබටම දැනේවි කිසියම් සහනයක් මේ මඟින් තිඛෙන බව. මෙම ප්‍රතිකාර ක්‍රමයන්ගේ තිඛෙන සුවිශේෂීම කාරණය වන්නේ ඉන් වෙනත් උපද්‍රව සිදු නොවන නිසයි. ශරීරයට හිතකර, සියුම් සමට වුණත් ඔරොත්තු දෙන සමට පළුද්දක් ඇති නොවන මෙම ප්‍රතිකාර විධි ඔබත් අනුගමනය කර බලන්න. 

උපුටා ගැනීම සිළුමිණ