සුවපත් දිවියකට වැට බඳින සම පැහැපත් කර ගැනීමේ විලාසිතා
බොහෝ ආසියානු රටවල සමේ පැහැය යමෙකු අයත්වන සමාජ මට්ටම විදහා දක්වන එක් සංකේතයක් බඳුය. සාමාන්‍යයෙන් ඉන්දියාවේ පැහැපත් සමක් ඇති අය වරප්‍රසාද ලත් ඉහළ සමාජ පන්තියට අයත් වූවන් ලෙසත් කළු පැහැ සමක් ඇතියවුන් දුප්පත් හෝ පහත් සමාජ මට්ටමකට අයත් වූවන් ලෙසත් සැලකේ. ඉන්දුනීසියාව හා තායිලන්තයේ කළු පැහැ සම කියා පාන්නේ ඔවුහු බොහෝ සෙයින් එළිමහනේ ඉර අව්වට පිළිස්සෙමින් වැඩ කරන්නවුන් බවය. එනම් ඔවුහු බොහෝවිට සමාජයේ දිළිඳු ජන කොට්ඨාසයට අයත් ගොවි කම්කරු ජනතාවය. ඉන්දියාවේ කුලවලට බෙදීම තහනම් කොට ඇතද, මිනිසුන් සම පැහැපත් කර ගැනීමට දරන බලවත් උත්සාහය දෙස බලන විට ඒ පනවා ඇති තහනම අර්ථ විරහිත වී ඇති බවක් පෙන්වයි. අාසියානු රටවල මිනිසුනට සුදු හම පිළිබඳව දැඩි කැමැත්තක් ඇතිවීමට, එම රටවල් අධිරාජ්‍යවාදීන්ගේ යටත් විජිත ලෙස කලක් පැවතීම හේතු වී යයි සමහරු මත පළකරයි. යටත් විජිත සමයේදී රජයේ උසස් නිල තල දැරුවෝ හා ඉහළ පන්තිවලට අයත්වූවෝ සුදු හමක් සහිත විදේශිකයෝය. අද වනවිට කිසිදු ආසියාතික රටක් සුදු අධිරාජ්‍යවාදීන්ගේ පාලනය යටතේ නොපැවතියද, සමේ සුදු කළු භේදය මත සමාජ තත්ත්වය ගණනය කිරීම කොතරම් මිනිසුන් සිත්තුළ කා වැදී ඇද්දයි කිවහොත් අද ලෝකයේ ආර්ථික අතින් ඉතා ඉහළ මට්ටමක සිටින, බොහෝ ශක්තිමත් සංස්කෘතියකට උරුමකම් කියන ජපානය වැනි රටක පවා මිනිසුන් සම පැහැපත් කර ගැනීමට බලවත් උනන්දුවක් දක්වයි.
ඉන්දියාවේ ප්‍රකට සමාගමක් 1978 දී ආ‍ලේපනයක් හඳුන්වා දීමත් සමග පැහැපත් කර ගැනීමේ උනන්දුවේ පැහැදිලි වර්ධනයක් දැකිය හැකි විය. 2010 වසරේදී ඉන්දියාවේ පමණක් සම පැහැපත් කරන ආ‍ලේපන සඳහා වූ වෙළෙඳපළ වටිනාකම ඩොලර් මිලියන 432ක් විය. සුප්‍රසිද්ධ පර්යේෂණ සමාගමක් වූ ඒ.සී නීල්සන් (Ac Nielson) සමාගමේ වාර්තාවලට අනුව මෙම වටිනාකම වසරකට 18ක වේගයෙන් වැඩි වී තිබේ. මේ අනුව පසුගිය වසරේ පමණක් ඉන්දියානුවන් භාවිතා කළ සම පැහැපත් කරන ආ‍ලේපන ප්‍රමාණය ටොන්, 233කි. මේ සඳහා වැය වී ඇති මුදල කොකා කෝලා හා තේ සඳහා වැය කර ඇති මුදල් ප්‍රමාණයද ඉක්මවා යන්නකි. 8-2මුලදී සම පැහැපත් කරන ආ‍ලේපන නිපදවූයේ කාන්තාවන් සඳහා පමණක් වුවද 2005 දී පිරිමින් සඳහාද ආ‍ලේපනයක් වෙළෙඳ‍පොළට නිකුත් විය. මේ කුමන ආ‍ලේපනය ගැල්වුවද සම පැහැපත් කර ගැනීමට ඒවා පාවිච්චි කරන සියලු දෙනාටම හැකියාව ලැබෙන්නේ නැත. සමහරුනට පමණක් පැහැපත් ලප කැළැල් නොමැති සමක් ලබා ගැනීමට හැකි වුවද බොහෝ දෙනකුට අවසානයේ හිමිවන්නේ තැනින් තැන ලප සහිත අඳුරු පැහැ සමකි. ඊට හේතු වූ කරුණු කිහිපයකි. සම පැහැපත් කරන ආ‍ලේපන සාදන්නේ රසායනික ද්‍රව්‍ය කීපයක සංයෝගයෙනි. ඒවා අතර හයිඩේ‍රාක් විනෝන් (Hydroquinone), ස්ටීරොයිඩ් (Steroids), රසදිය (Mercury) ලෙමන් (Mercury), සිට්‍රික් ඇසිඩ් (Citric Acid) හා සිමෙන්ති වතුරද වේ (Cement Water) රෙදි සුදු කිරීමට විරංජන (බ්ලීචිං) කුඩු හෝ දියර යොදා ගන්නාක් මෙන් මෙහිදීද කෙරෙන්නේ ඉහත කී ද්‍රව්‍ය මගින් සම බ්ලීචිං (bleaching) කිරීමකි. එසේ කරන්නේ සමෙහි ඇති මෙලනින් නම් වර්ණකය (Melanin Pigments) ඉවත් කිරීමෙනි. අප සමෙහි ඇති මෙලනින් නම් වර්ණකය මගින් කෙරෙන්නේ හිරු එළියෙහි ඇති අප සමට අහිතකර පාරජම්බුල කිරණ උරාගෙන සම ආරක්ෂා කිරීමයි. රසායනික ද්‍රව්‍ය යොදා ගනිමින් මෙම මෙලනින් වර්ණකය ඉවත් කිරීම වනාහි, දැනට ලෝකයේ ඇති, සිරුරට හානිදායක ලෙස පෙනුම වෙනස්කරන ක්‍රමවේදයන්ගෙන් එකකි.දීර්ඝ කාලයක් තිස්සේ සම පැහැපත් කරන ආ‍ලේපන භාවිතා කිරීම මගින් මෙසේ සමෙහි මෙලනින් වර්ණකයේ ප්‍රමාණය අඩුවීමෙන් සමෙහි පිළිකා ඇතිවීමට ඇති ඉඩකඩ බොහෝ සෙයින් වැඩිවෙයි. එසේම ඉතා ඉක්මනින් සමේ රැලි වැටුනු ස්වභාවයක් ඇතිවීමද දද වැනි දෑ ඇතිවීමද සිදුවිය හැක. මෙබඳු සමහර ආ‍ලේපනවල දැකිය හැකි හයිඩේ‍රාක්විනොන් වැරදි ලෙස භාවිතා කිරීම මගින් තද නිල් පැහැයට හුරු සමක් ඇතිවෙයි. එසේ වන්නේ සමෙහි වර්ණකය වැඩි වීමෙනි. මේ තත්ත්වය හැඳින්වෙන්නේ ඔක්රොනෝසිස් නමිනි. මේ හේතුව නිසා ඇමරිකාවේත් අනෙකුත් යුරෝපීය රටවලත් වෛද්‍ය නිර්දේශයක් නොමැතිව මෙම රසායනිකය අඩංගු ආ‍ලේපන විකිණීම තහනම් කෙරිනි. සාමාන්‍යයෙන් සම පැහැපත් කරන ආ‍ලේපනවල හයිඩේ‍රාක්විනෝන් අඩංගු වන්නේ 1.9ක ප්‍රතිශතයකි. එහෙත් වෙළෙඳපළෙහි නීත්‍යනුකූල නොවන ලෙස නිෂ්පාදිත එබඳු ආ‍ලේපනවල හයිඩේ‍රාක්විනෝන් අඩංගු ප්‍රතිශතය සියයට 4 සිට 5 දක්වා වේ.
සම පැහැපත් කරන ආ‍ලේපනවල අඩංගු ස්ටීරොයිඩ් යනු කෘත්‍රිම හෝමෝන විශේෂයකි. සමහර අවස්ථාවලදී සමේ රෝග සුවකිරීමට වෛද්‍යවරුන් මේවා නිර්දේශ කළද, වෛද්‍ය නිර්දේශයකින් හෝ පාලනයකින් තොරව දීර්ඝ කාලයක් මේවා පාවිච්චි කිරීමෙන් දිලීර ආසාදන හොරි වැනි සමේ රෝග තත්ත්වයන්ද අධික රුධිර පීඩනය, දියවැඩියාව, සම තුනී වී යාම, තුවාල සුවවීම පමාවීම හා කුරුළෑ හා සමේ ඇඳුනු සලකුණු ඇතිවිය හැක. රසදිය වනාහි මෙම ආ‍ලේපනවල දැකිය හැකි අනතුරුදායකම රසායනිකයයි. රසදිය අඩංගු ආ‍ලේපන දිගු කලක් පාවිච්චි කිරීමෙන් රසදිය විෂවීමට ඇති ඉඩකඩ බොහෝය. එබඳු තත්ත්වයක රෝග ලක්ෂණ වන්නේ සිහිකල්පනාව අඩු වීම, මතක ශක්තිය දුර්වල වීම, හිසරදය, ආවේග දරා ගැනීමට නොහැකියාව, අධික වෙහෙස හා මුඛයේ හා විදුරුමස්වල ඉදිමුණු ස්වභාවයයි. මෙබඳු රෝග ලක්ෂණ තිබියදීත් රසදිය අඩංගු ආ‍ලේප, නොකඩවා පාවිච්චි කළහොත් බොහෝ විට වකුගඩුවලට හානි සිදුවීම හා මානසික රෝගී තත්ත්වයන්ද ඇතිවෙයි. ඒ කෙසේ වුවද සම පැහැපත් කරන ආ‍ලේපන සඳහා හොඳ වෙළෙඳ‍පොළක් පවතින්නේ ඉන්දියාවේ පමණක් නොවේ. කොරියාව, ජපානය, චීනය හා අනෙකුත් ආසියානු රටවලද, අප්‍රිකානු ඇමරිකානු කාන්තාවන් ඉලක්ක කරගනිමින් ඇමෙරිකා එක්සත් ජනපදයේද මෙම ආ‍ලේපන සඳහා පුළුල් වෙළෙඳ ප්‍රචාරක කටයුතු සිදු කෙරුනු බැවින් ඒවායේද මේ ආ‍ලේපන සඳහා හොඳ ඉල්ලුමක් වේ.ඉන්දියාවේ මෙම ආ‍ලේපන සම්බන්ධ වෙළෙඳ දැන්වීම්වලට බොහෝවිට පෙනී සිටින්නේ ක්‍රිකට් ක්‍රීඩකයින් හා බොලිවුඩ් නිළියන්ය. එහෙත් මෑතකදී බොලිවුඩ් නිළි නන්දිතා දාස් මේ “සුදු හමක් සඳහා වන උන්මාදය”ට පිළියම් සෙවීමේ අරමුණික් “කළු හමක් ඇති අය සුරූපීය” යන ව්‍යාපාරයට ජනප්‍රිය නිළියක ලෙස ඇයට ඇති බලය යොදමින් ඇගේ සහයෝගය ලබාදීමට ඉදිරිපත්වී සිටින්නීය.කළු හම අවප්‍රමාණ කොට සැලකීමට විරුද්ධව සටන්වදින ඉහත කී ව්‍යාපාරය ආරම්භ කළේ 2009 දී චෙන්නායි මධ්‍යස්ථානය කරගෙන විමෙන් ඔෆ් වර්ත් සංවිධානය මගිනි. “මිනිසාගේ වටිනාකම හා මනා පෙනුම රැඳී පවතින්නේ සමේ සුදු පැහැය මතය” යන විශ්වාසයට මෙම ව්‍යාපාරය අභියෝග කරයි. ඔවුන් පවසන්නේ මේ විශ්වාසය තරුණ- මහළු බොහෝ දෙනෙකුගේ ස්වයං වටිනාකම පිළිබඳ විශ්වාසය ආත්මාභිමානය විනාශ කර දමන බවය. මේ ව්‍යාපාරයට සහයෝගය දෙන නන්දිතා දාස් මෙසේ පවසන්නීය. ව්‍යාපාරයට මා දක්වන සහයෝගය ගැන වරක් පුවත්පතක් ලිපියක් පළ කළා. ඒත් ඒ ලිපියේ පවා ඔවුන් මගේ ඡායාරූපය පළ කර තිබුණේ සමේ පැහැය බොහෝ පැහැපත් කොටයි. ඉන්දියාවේ සමේ පැහැපත් බවට වැඩි සැලකිලි දැක්වීම ඈත අතීතයේ පටන් මුල් බැසගෙන තිබෙන දෙයක්. ඒත් ඒ හැඟීම් තව තවත් තීව්‍ර වෙලා තියෙන්නේ බොහෝ මාධ්‍ය හරහා කෙරෙන වෙළෙඳ ප්‍රචාරක කටයුතු නිසා. ඒවායින් මිනිසුනට දෙන පණිවුඩය “උත්සාහයෙන් ධෛර්යයෙන් වැඩකිරීම අමතක කර දමන්න. ඔබ උනන්දුවිය යුත්තේ ඔබේ සමේ පැහැය ගැනයි” යන්නයි. මට උවමනා, මිනිසුන් තමන්ට උපතින් උරුම වුණු සම රැකගෙන සුව පහසුවෙන් ජීවත්වෙනවා දකින්නයි.
උපුටා ගැනීම ලක්බිම
