රූ සපුව ගැන සිතා අමතර විටමින් ගැනීමට පෙර මේ ගැනත් සිතමු
ශාරීරිකව පවතින පෝෂණ ඌනතාවලට පිළියම් ලෙස, හා රූ සිරිය වඩාත් ඔප් නංවා ගත හැකි මාර්ග ලෙස වෙළෙඳ පොළට හඳුන්වා දී තිබෙන විවිධ පෝෂක කොටස්, විටමින් වර්ග අඩංගු වන අමතර පෝෂක සලාක (Cosmoseutical Suppliments) බොහොමයක් අද අපට දැකගත හැකිය. vitamin-E එසේම මේවා විවිධ විටමින් අඩංගු ඖෂධ සංයෝග ලෙස සේම විවිධ ශාක කොටස්, සත්ව කොටස් අනුසාරයෙන් නිපද වූ ඒවාද වෙයි. පිටරටින් ආනයනය කර තිබෙන මෙවැනි සංයෝග ලියාපදිංචි වී තිබෙන්නේ ඖෂධ කාණ්ඩ යටතේ නොව ආහාර කාණ්ඩ වර්ගීකරණය යටතේය. එබැවින්, වෛද්‍ය නිර්දේශයකින් තොරව ඉතා පහසුවෙන් තමන්ට අනුචිත පරිදි මේවා මිලදී ගැනීමේ හැකියාව පවතී. (Over the Counter Drugs) අද සමාජයේ පවතින විවිධ සෞඛ්‍ය ගැටලූවලට පිළියම් ලෙස මේවා භාවිතා කිරීමට පුරුදුව සිටින්නන් බොහෝය. මෙවැනි ඖෂධ සංයෝග භාවිතා කිරීම මගින් කුමන ආකාරයේ ප‍්‍රතිඵල ගෙනදේ ද යන වග විමසා බැලීම කාලීනව වැදගත් වෙයි. එසේම වෛද්‍ය උපදේශවලින් තොරව මේවා ලබාගැනීම නිසා අත්වන වාසි, අවාසි මොනවාදැයි දැන සිටීම කොයිකාටත් ප‍්‍රයෝජනවත් විය හැකිය.
මේවා භාවිතා කිරීමට වැඩිපුර නැඹුරුවී සිටින්නේ තරුණ වයස්වල කාන්තාවන් බව අපි මුලින් සඳහන් කළෙමු. මෙවැනි තරුණ කාන්තාවන් අතර දරු පිළිසිඳ ගැනීම් බලා‍පොරොත්තු වන අය සිටිය හැකිය. මෙම සංයෝගවල අඩංගු සමහර විටමින් වර්ග අධි මාත‍්‍රා පිළිසිඳ ගැනීම්වලට බාධා ඇති කිරීමට පිළිවන. එසේම දරුගැබ තුළ විවිධ ගැටලූ ඇතිකිරීමට ද සමහර විටමින් වර්ග අධිකවීම් හේතුවිය හැකිය. උදාහරණයක් ලෙස දරුවකු පිළිසිඳගත් මුල් අවස්ථාවල විටමින් ඒ අඩංගු සංයෝග අධික ලෙස ශරීරගත වීම හානිදායක වේ. සාමාන්‍යයෙන් ගැබිනි මව්වරුන්ට විටමින් ඒ අඩංගු ඖෂධ වර්ග ලබාදීමක් සිදු නොවේ. එසේම යකඩ, කැල්සියම් වැනි ඛනිජ ලවණ වර්ගද ගැබිනියන්ට ලබා දෙන්නේ දරුගැබට මුල් මාස ගණන ගෙවී ගියායින් අනතුරුවය. එබැවින් දරුවකු අපේක්ෂාවෙන් සිටින කාන්තාවන් හිතුමතේ මෙවැනි ඖෂධ සංයෝග කරා යොමුවීම ගැටලූකාරී තත්ත්වයන් ඇතිකිරීමට හේතුවිය හැකිය. එවැනි අය අමතරව ලබාගත යුත්තේ ෆෝලික් අම්ලය වැනි දේ පමණය.
බොහෝ කාන්තාවන් තමන්ගේ ශරීරයේ මතුවන විවිධ ගැටලූවලට පිළියම් සොයන්නේ මෙවැනි ඖෂධ හරහා බව පෙනී යන කරුණකි. උදාහරණයක් ලෙස වැඩිපුර කොණ්ඩය හැළෙන විට ඒ විටමින ඌනතාවයක් යැයි සිතා ඒ සඳහා සුදුසු යැයි කියැවෙන මෙවැනි ඖෂධ සංයෝග භාවිතා කරනු දැකිය හැකිය. නමුත් කොණ්ඩය ගැලවී යාමට බලපාන හේතු රැුසක් අතර විටමින් ඌනතාවය එක් හේතුවක් පමණි. මෙම තත්ත්වය ඇතිවීමට මූලික හේතුව නිවැරදිව සොයා නොගෙන හිතුමතයට මෙවැනි විටමින් සංයෝග ගෝනි ගණන් ගිල දැමුවද කෙස් හැලීමේ වෙනසක් සිදුනොවන්නට පිළිවන. එබැවින් මුලින්ම කළ යුත්තේ එම ගැටලූවට මූලික වන හේතුව නිවැරදිව හඳුනාගෙන ඉන් අනතුරුව වෛද්‍ය උපදෙස්වලට අනුව මෙවැනි දෙයක් භාවිතා කිරීමය. එසේම මෙම පෝෂක සලාකවල විවිධ ලෝහ වර්ග අඩංගු වෙයි. අපගේ ශරීර පැවැත්මට අවශ්‍ය වන එක් එක් ලෝහ වර්ගවල නියමිත වූ ප‍්‍රතිශතයන් පවතී. එම ප‍්‍රමාණ අතික‍්‍රමණය කරමින් වැඩිපුර එවැනි ලෝහ වර්ග ශරීරගත වීම ඉතා හානිදායක ගැටලූවලට මුල්විය හැකිය. උදාහරණයක් වශයෙන් කිසියම් ලෝහයක් ශරීරයේ අඩංගු විය යුත්තේ ඉතා ස්වල්ප වශයෙන් විය හැකිය. එම ප‍්‍රමාණය මෙන් දෙතුන් ගුණයක් ශරීර ගත වීම හරහා එය විෂවීමක් දක්වා දුරදිග යා හැකිය. එසේම විටමින් වර්ග පවා ශරීරය තුළ අධික ලෙස තැන්පත් වීම එතරම් හොඳ දෙයක් නොවේ. පැහැපත් වීමට යැයි කියමින් අධික ලෙස පැ‍පොල්, වට්ටක්කා, කැරට් වැනි දේ ආහාරයට ගන්නා අයගේ අත්ල කහ පැහැයට හැරෙන්නේ ශරීරය තුළ බිටා කැරොටින් අධික වීම නිසාය. එබැවින් කුඩා දරුවන්ගේ පවා සම පැහැපත් කිරීමට යැයි කියමින් අධික ලෙස මෙවැනි ආහාර වර්ග ලබාදීමෙන් වළකින්න. එසේම මෙවැනි අමතර පෝෂණ කොටස් කිසිසේත්ම දරුවන්ට ලබාදෙන්න එපා. එසේම සමහර කාන්තාවන් සමේ පැහැපත් බවට මුහුණේ පැහැපත් බවට ආදී වශයෙන් ශරීරයේ විවිධ අංග සඳහා වෙන වෙනම මෙවැනි පෝෂණ සංයෝග භාවිතා කරනු දැකිය හැක. එවැනි දේ දිගුකාලීනව ලබා ගැනීම නිසා එම ද‍්‍රව්‍යවල අඩංගු එකම ආකාරයේ සංයෝග ශරීරය තුළ එක් රැුස්වී තැන්පත් වීම නිසා විවිධාකාර අනිසි ප‍්‍රතිවිපාක අත්විය හැකිය. එසේම වෙළෙඳ‍පොළේ තිබෙන මෙවැනි නිෂ්පාදන වර්ග නිපදවන ආකාර ගැන විස්තර දැනගැනීම අපහසුය. ඉතා දියුණු රටවල නිපදවන මෙවැනි සංයෝගවල නම් නිපදවා ඇති ආකාර ගැන සේම ඒවායේ බැර ලෝහ වර්ග අඩංගු වන්නේ ද යන කරුණු පිළිබඳව එම නිෂ්පාදනවල සටහනක් වෙයි. එබැවින් සත්ව හා ශාක කොටස් යොදාගෙන නිපදවනු ලබන මෙවැනි නිපැයුම්වල බැර ලෝහ අඩංගු වන්නේ දැයි සැලකිලිමත්වීමද ඒ ගැන සොයා බැලීම ද ඉතා වැදගත්ය. මේ වන විට මුළු ලෝකය පුරාම විවිධ නිෂ්පාදනවල බැර ලෝහ වර්ග අඩංගුවීම විශාල සෞඛ්‍ය ගැටලූ රැුසක් ඇතිකර තිබෙන බැවිනි. එසේම ශරීරයට අත්‍යවශ්‍යවන විවිධ මේද අම්ල අඩංගු වන මෙවැනි සංයෝග ද වෙළෙඳ‍පොළේ දැකිය හැක. ඒ සෑම දෙයක්ම භාවිතා කළ යුත්තේ පමණ දැනගෙනය. ඒ මන්දයත් සමහර මේද අම්ල වර්ග ශරීරයේ අධික වන විට ඊට සාපේක්ෂව තවත් ශරීරයට අත්‍යවශ්‍ය සංයෝගයක් අඩුවී යා හැකිය. එසේම වෛද්‍ය උපදේශයකින් තොරව හිතුමතේ මෙවැනි විටමින් වර්ග, ඛනිජ ලවණ වර්ග භාවිතය එතරම් සුදුසු නොවන්නේ ශරීරය තුළ සැගව ඇති සමහර රෝග හඳුනා ගැනීමට එමගින් බාධා ඇතිවන නිසාවෙනි. උදාහරණයක් ලෙස රක්තහීනතාවයෙන් පෙළෙන කෙනෙකු ගනිමු. කෙනෙකු තුළ රක්තහීනතාවය, යකඩ ඌනතාවය අත්දැයි පරීක්ෂා කිරීම සඳහා මලපහ පරීක්ෂණයක් කිරීමට සිදුවේ. එවැනි කෙනකු හිතූමතේ යකඩ අඩංගු සංයෝගයක් භාවිතා කර තිබුණහොත් මලපහවල යකඩ අංශු අඩංගු වෙයි. එවිට යකඩ ඌනතාවයට හේතුව සේම අදාළ පරීක්ෂණ ප‍්‍රතිඵලද නිවැරදිව ලබාගත නොහැක. එබැවින් කිසියම් රෝග ලක්ෂණයක් දැනුණු විට අදාළ රෝග ලක්ෂණයට හේතුව නිවැරදි ක‍්‍රමවලින් පරීක්ෂණ හරහා සොයා නොගෙන, උපකල්පනය කරන ලද හේතු මත මෙවැනි පෝෂණ සංයෝග භාවිතයට හුරුවීම කිසිසේත්ම සුදුසු වන්නේ නැත. නියමාකාර වෛද්‍ය පර්යේෂණයකින් පසුව කිසියම් අඩුපාඩුවක් පවතින බව දැනගෙන වෛද්‍ය අනුමැතියකින් පසු මේවා වෙත යොමුවීම වඩාත් නිවැරදි ක‍්‍රමයයි. එසේම ඒවා භාවිතා කරන්නට පෙර එහි ඇතුළත් ඒ හා සම්බන්ධ විස්තර පත‍්‍රිකා හොඳින් කියවා තේරුම් ගැනීමද ඒ අනුව කටයුතු කිරීමද අත්‍යවශ්‍ය වෙයි. ඒවා භාවිතා කළ යුතු නියමිත කාල සීමාව පමණක් ඒවා ලබා ගැනීම ද ඉතාම වැදගත් කරුණකි. ඒ මන්දයත් දිගුකාලීනව මේවා යොමු වීම හරහා මේවායේ ඇති විවිධ සංයෝග අක්මාව, වකුගඩු ආදියට ඉතා අහිතකර ලෙස බලපාන්නට හැකි බැවිනි. එසේම පිළිකා ඇතිවීමට හේතුවන සංයෝග මේවායේ අඩංගු වන්නේදැයි විමසිලිමත් වීමද ඉතා අත්‍යවශ්‍ය කරුණකි.
උපුටා ගැනීම ලක්බිම පුවත් පත
