යුවතියන්ගේ අනවශ්‍ය රෝම ඇතිවීමට හේතු මොනවාද?
වැඩිවියට පත් වූ ගැහැනු ළමයි වැඩිවියට පත්වීමෙන් අවුරුදු දෙක තුනක්‌ විතර ගතවීමෙන් පසු මුහුණ දෙන එක්‌ ප‍්‍රශ්නයක්‌ ලෙස ඔසප් විෂමතා සමග ඇති වන ශරීරයේ පිරිමි හෝමෝන හෙවත් ටෙස්‌ටෙස්‌ටරෝන් වැඩිවශයෙන් නිෂ්පාදනය වීමට පටන් ගැනීම හදුන්වාදිය හැකියි. මෙය පොලිසිස්‌ටික්‌ ඕවරිස්‌ ලෙස හඳුන්වන රෝග තත්ත්වයේ උත්සන්නවීමක්‌ වෙන්නත් පුළුවනි. සමහර අවස්‌ථාවල පොලිසිස්‌ටික්‌ ඔවරිස්‌ තියෙන කාන්තාවන්ට පිරිමි හෝමෝන ස‍්‍රාවයකුත් පොලිසිස්‌ටික්‌ ඔවරිස්‌ නිසා සිදු වෙනවා. මෙතනදී ටෙස්‌ටෙස්‌ටරෝන් හෝමෝනය තමයි ස‍්‍රාවය වෙන්නේ. මෙම තත්ත්වයට අමතරව ශරීරයේ ස්‌ථුලතාවය එන්න එන්නම වැඩි වෙන්න පුළුවනි. ඒ වගේම සිරුරේ තැන්පත්වෙලා තියෙන මේද තට්‌ටුවෙනුත් පුරුෂ හෝමෝන සහ එයට සමාන කරන ස‍්‍රාවයන් නිකුත් වෙන්න ගන්නවා. ටෙස්‌ටෙස්‌ටරෝන් නිෂ්පාදනය නිසා මෙම ගැහැනු ළමයි හෝ තරුණ කාන්තාවන්ගේ අධික ලෙස රෝම වර්ධනයක්‌ මෙන්ම ඝනකම ඇති රෝම වර්ධනයකුත්, තවත් පිරිමි කෙනෙකුගේ රෝම වර්ධනය වන ස්‌ථානවලට සමාන තැන්වල රෝම වර්ධනය වීමකුත් දක්‌නට ලැබෙනවා.
මේ තත්ත්වයට හොඳම උදාහරණය තමයි පිරිමියෙකුගේ මෙන් උඩු තොලේ, රැවුල ප‍්‍රදේශයේ, පපුවේ, බඬේ රෝම ඇතිවීමක්‌ වෙන්න ට පටන් ගැනීම. මෙම තත්ත්වය අපි හර්සුටිසම් ලෙස හඳුන්වනවා. එමෙන්ම සමේ වර්ණය තද පැහැවීම, විශේෂයෙන්ම බෙල්ලේ, උරහිස්‌වල, පැහැය තද වර්ණවීම. ඒ වගේම මුහුණේ කුරුලෑ ඇතිවීම, මුහුණ විරූපිවෙන්නට හේතුවීම, ශරීරයේ ස්‌ථුලතාවය ඇතිවීම වැනි දේ බලා ගන්න පුළුවනි. මෙවන් වෙලාවට වෛද්‍ය විශේෂඥවරයෙක්‌ හමුවෙලා වෛද්‍ය ප‍්‍රතිකාරවලට යොමුවීම කළ යුතුයි. විශේෂයෙන්ම මූලික අවස්‌ථාවේම රෝගය හඳුනාගැනීම ඉතා වැදගත් වෙනවා. මෙය මූලික අවස්‌ථාවේ නවතා ගන්න පුළුවනි නම් මෙම කාන්තාව අවලක්‌ෂණවීම හෝ පුරුෂ ලක්‌ෂණ ඒම යම් තරමක්‌ දුරට අපට වලකා ගන්න පුළුවනි. මෙම අවස්‌ථාවේ විවිධ හෝමෝන පරීක්‌ෂණ වලට මෙම දරුවන් හෝ කාන්තාවන් යොමු කරලා මෙම හෝමෝන අතරින් කාන්තා හෝමෝන විශේෂයෙන්ම පිටියුටරි ග‍්‍රන්ථියෙන් එන හෝමෝන හෙවත් LH සහ FSH හෝමෝන, පුරුෂයන්ගේ හැදෙන TESTISTERON කියන පුරුෂ හෝමෝනය සහ පිටයුටරි ග‍්‍රන්ථියෙන් එන ප්‍රෝලැටික්‌ටින් හෝමෝනය සහ තයිරොයිඩ හෝමෝන වන T4,TSH, හි සාන්ද‍්‍රණ පිළිබඳ පරීක්‌ෂාකර බලනවා. මෙතනදි තිබෙන හෝමෝන ප‍්‍රශ්න අනුව අපි විවිධ වර්ගයේ හෝමෝන ප‍්‍රතිකාර කරලා සරල හෝමෝන ප‍්‍රශ්නයක්‌ නම් සරල උපත් පාලන පෙත්ත වගේ ප‍්‍රතිකාරයකුත්, මෙහි පුරුෂ හෝමෝනවල සංයුතිය ඉහළ නම් පුරුෂ හෝමෝනවල ශක්‌තිය අඩුකරන උපත් පාලන පෙත්තකුත්, තයිරොයිඩ ග‍්‍රන්ථියේ ප‍්‍රශ්න සහ ප්‍රොලැක්‌ටින් කියන හෝමෝන ප‍්‍රශ්නය නම් උචිත ප‍්‍රතිකාරවලට යොමුවීමෙන් මෙම අවස්‌ථාවෙන් ගොඩක්‌ කාන්තාවන්ට මිදෙන්න අවස්‌ථාව ලැබෙනවා. මෙවන් අවස්‌ථාවල කුරුළෑවලට පමණක්‌ බෙහෙත් ගන්නේ නැතිව, එහෙමත් නැත්නම් සමේ වර්ණය තදවීමට පමණක්‌ බෙහෙත් ගන්නේ නැතිව හෝමෝන පිළිබඳ විශේෂඥ වෛද්‍යවරයෙක්‌ හෝ නාරිවේදය පිළිබඳ විශේෂඥ වෙද්‍යවරයෙක්‌ වෙත යොමුවීම ඉතා වැදගත්වෙනවා.
ප‍්‍රසව සහ නාරි රෝග විශේෂඥ වෛද්‍ය නලින්ද රොද‍්‍රිගු
උපුටා ගැනීම නවලිය
