මුහුණ සුදු කරගන්නා කෙල්ලන්ගේ මො‍ළෙත් අඩුවෙනවා
හම සුදු කරන බොහෝ ආලේපනවල රසදිය :
නෙතූ, උපතින්ම තළෙලු සමක් ඇති විසිපස් හැවිරිදි යුවතියක්. සම තළෙලු වුණත් ඇය හරිම සුන්දරයි. නෙතූ තමන්ගේ විවාහ මංගල උත්සවයට සූදානම් වුණේ අවුරුද්දකටත් වැඩි කාලයක ඉඳලා. අපේ රටේ බහුතරයක් යුවතියන් වගේ ම නෙතුත් විවාහ මංගල උත්සවයට මාස හයකට පමණ කලින් ඉඳල දින කීපයක්ම රූපලාවණ්‍යාගාරයකට ගියා. සති කීපයක් තුළ එහිදී ලැබුණු ප්‍රතිකාරවලින් නෙතූගේ මුහුණ සුදු වුණා. විවාහ මංගල දිනයේ නෙතූගේ මුහුණ හරිම ලස්සනයි. කවුරුත් කතා වුණේ ඇගේ සුන්දරත්වය ගැන. ඒ වගේම ඇතැම් දෙනෙකුට පුංචි ගැටලුවක් වුණා තළෙලු නෙතූ සුදු වුණේ කොහොම ද කියන එක ගැන. මේ අපේ සමාජයේ බහුලව දකින්න ලැබෙන සිදුවීමක්. අපේ සමාජයේ බොහෝ යුවතියන් කැමැතියි තමන්ගේ මුහුණ සුදුපාට වෙනවට. ඒ සඳහා වන ප්‍රතිකාර ක්‍රම රූපලාවණ්‍යාගාරවල තිබෙනවා. ඒ වගේම ඒ සඳහා සුදුසු යැයි කියන ආලේපන වර්ගත් අපේ රටේ ඕනෑම වෙළෙඳ සලකින් ලබා ගැනීමේ හැකියාවත් තිබෙනවා. එවැනි ආලේපන වලින් සම සුදු වුණත් ඇතැම් ආලේපනවල තිබෙන ඇතැම් රසායනික ද්‍රව්‍ය අපේ සෞඛ්‍යයට බොහෝ අහිතකරයි. එවැනි අහිතකර ද්‍රව්‍ය අඩංගු ආලේපන අපේ රටේ වෙළෙඳපොළේ බොහෝ තිබෙන බවත් මෑත දී කරනු ලැබූ පර්යේෂණයකින් හෙළි වී තිබෙනවා. මේ හේතුව නිසා සම සුදු කරගැනීම පිළිබඳත් ඒ සඳහා භාවිත වන ආලේපන පිළිබඳවත් අපේ රටේ විශේෂ කතාබහක් ඇතිවී තිබෙනවා.
ලෝකයේ විවිධ රටවල මිනිසුන්ගේ සමේ පැහැය තීරණය වී තිබෙන්නේ එම රටවලට ලැබෙන හිරු එළියේ ප්‍රමාණය දේශගුණය වැනි සාධක මත. බොහෝ විට ශීත දේශගුණයක් ඇති අඩුවෙන් හිරු එළිය ලැබෙන බටහිර යුරෝපීය රටවල ජනයාගේ සම උපතින්ම සුදු පාටයි. හොඳ හිරු එළියක් ලැබෙන සමකය ආසන්න රටවල ජනතාවගේ සම බොහෝ විට උපතින්ම තළෙලු හෝ කළුපාටයි. මේ සඳහා ජානමය බලපෑම තිබෙනවා. බටහිර ටවල වෙසෙන සුදු සමක් ඇති පුද්ගලයන් අද උත්සාහ කරන්නේ තමන්ට කළු සමක් ලබාගැනීමට. ඝර්ම කලාපයට අයත් කළු පැහැති සමක් ඇති බොහෝ දෙනෙක් උත්සාහ කරන්නේ තමන්ගේ සම සුදුකර ගැනීමට. මේ සඳහා සමාජීය අවශ්‍යතා මෙන්ම වෙළෙඳ අවශ්‍යතා ද බහුලව බලපා තිබෙනවා. ශ්‍රී ලංකාව වැනි ආසියාතික රටවල ජීවත්වන අය විශේෂයෙන්ම තරුණ තරුණියන්, තමාට සාර්ථකත්වයක් ළඟාකර ගැනීමට සුදු සමක් තිබීම උපකාර වන බව විශ්වාස කරනවා. ඔවුන් බලාපොරොත්තු වන සාර්ථකත්වය හොඳ විවාහයක් වෙන්න පුළුවනි. එසේ නැතිනම් හොඳ රැකියාවක්, ඉහළ තනතුරක් ලබාගැනීම වෙන්න පුළුවනි. අපේ රටේ තරුණ තරුණියන් ඒ අරමුණු ළඟාකර ගැනීමට සම සුදු කරගැනීම සඳහා විවිධ ආලේපන වර්ගවලට විවිධ ප්‍රතිකාරවලට විශාල වශයෙන් මුදල් වැය කරනවා. එවැනි ආලේපනවලට අද විශාල ඉල්ලුමක් තිබෙනවා. එම රූපලාවණ්‍ය ද්‍රව්‍ය අපේ රටේ විශාල වශයෙන් අලෙවි වෙනවා. ඒ රූපලාවණ්‍ය ද්‍රව්‍ය පිළිබඳව සැකසුණු රූපවාහිනී වැඩසටහන් බොහෝ රූපවාහිනී නාළිකාවල විකාශයද වෙනවා. එම වැඩසටහන් විකාශය වී පැය කීපයක් යන්නට ප්‍රථම ඖෂධ ශාලාවලට වෙළෙඳ සල්වලට එම ආලේපන මිලදී ගැනීමට එන, තරුණ තරුණියන් වැඩි බව හෙළි වී තිබෙනවා. මෙයින් පැහැදිලි වෙනවා සම සුදු කරන ආලේපනවලට අපේ රටේ තිබෙන ඉල්ලුම.
හොඳින් හිරු එළිය වැටෙන ආසියාතික රටක ජීවත්වන අපට ලැබී තිබෙන කළු පැහැති සම අපට ලැබී තිබෙන දායාදයක්. ඒ අධික හිරු රැස් සමඟ එන අහිතකර ආලෝක කිරණවලින් අපේ සම ආරක්ෂා වීමට. සමේ ඇතිවන පිළිකා වැනි විවිධ රෝගවලින් ආරක්ෂාවීමට කළුපැහැ සම අපට උපකාරවෙනවා. අපේ සම කළු පැහැ වී තිබෙන්නේ සම මතුපිට ඇති මෙලනින් නම් වර්ණකය නිසා. මෙලනින් වර්ණකය නිපදවෙන්නේ සමේ අපිචර්මයේ තිබෙන සෛලවලයි. සම මතුපිට නිපදවෙන මෙලනින් වර්ණකයේ ප්‍රමාණය තීරණ වීමට ජානවල බලපෑම දේශගුණික බලපෑමත් හේතු වෙනවා. සම මතුපිට මෙලනින් වර්ණය සෑදීම අඩු කිරීමට හෝ තාවකාලිකව නවතාලීමට හැකිනම්, උපතින්ම ලැබු කළු පැහැ සමක් වුණත් සුදු කළ හැකියි. මෙන්න මේ පදනමේ පිහිටායි කළු සම සුදු කිරීමට ආලේපන වර්ග නිපදවන්නේ. එවැනි ආලේපනවල සම සුදු කිරීම සඳහා විවිධ රසායනික ද්‍රව්‍ය යොදා ගන්නවා. එම ද්‍රව්‍ය සෑම එකක්ම විෂ සහිත නොවුණත් බහුලව භාවිත වන “රසදිය” අපට ඉතා විෂ සහිතයි. රසදිය යනු ලෝහයක්. මෙය පහසුවෙන් ලබාගත හැකිවා සේම හොඳ ප්‍රතිඵල ද (හොඳින් සම සුදු වීම) ලබාගත හැකියි. ඒ නිසා අපේ රටේ නිපදවන මෙන්ම විදෙස් රටවලින් ආනයනය කරන සම සුදු කරන ආලේපන බොහොමයක රසදිය ආකාර දෙකකින් අඩංගු වීමේ හැකියාව තිබෙනවා. ඉන් පළමුවැන්න තමයි ආලේපන නිෂ්පාදනය කරන විට හිතාමතාම රසදිය එක්කිරීම. ඒ වගේම මෙම ආලේපන නිෂ්පාදන ක්‍රියාවලියේ දී අහඹු ලෙසින් රසදිය එක්විය හැකියි.
මීට මාස කීපයකට පෙර ලංකාවේ සිදුකරන ලද විද්‍යාත්මක පර්යේෂණයකින් ඉතාම වැදගත් කරුණක් හෙළිවී තිබෙනවා. ඒ තමයි ලංකාවේ නිෂ්පාදනය කරන සහ විදෙස් රටවලින් ගෙන්වා ලංකාවේ අලෙවි කරන සම සුදු කරන ආලේපනවල තිබෙන රසදිය ප්‍රමාණය එම ආලේපනවල තිබිය යුතු රසදිය සම්මත ප්‍රමාණයට වඩා බොහෝ සෙයින් වැඩි බව. විශේෂයෙන්ම චීනයෙන් සහ තායිලන්තයෙන් ගෙන්වන සම සුදු කරන ආලේපනවල ඉතා අධිකව රසදිය අඩංගු වෙන බවත් මෙහිදී හෙළි වී තිබෙනවා. ලංකාවේ බලපැවැත්වෙන ආහාර, ඖෂධ රූපලාවණ්‍ය නිෂ්පාදනවලට අදාළ රෙගුලාසිවලත් මෙතරම් අධික රසදිය ප්‍රමාණයක් අඩංගු නොවිය යුතු බව දැක්වෙනවා. එම රෙගුලාසිවලට අනුව මෙම ආලේපන පිළිබඳව සොයා බැලීමක් නොකෙරෙන නිසා මිනිස් ශරීරයට අහිතකර රසදිය අඩංගු මෙවැනි ආලේපන බොහෝසෙයින් ලංකාව තුළ අලෙවි වෙනවා. සම සුදු කරගැනීමට ආලේපන වර්ග වැඩි වශයෙන් භාවිතා කරන්නේ නාගරික යුවතියන් බව ඔබ සිතන්න පුළුවන්. එය වැරදි මතයක් බව ඉහත සමීක්ෂණයෙන් හෙළිවූ තවත් කරුණක්. නාගරිකව ජීවත්වන යුවතියන් සේම ඉතා දුෂ්කර ගම්බද ප්‍රදේශවල ජීවත්වන යුවතියන් ද එවැනි ආලේපන මිලදී ගැනීමට විශාල මුදලක් වැය කරන බවත් හෙළිවී තිබෙනවා. මෙහිදී හෙළිවූ තවත් වැදගත් කරුණක් වූයේ අප රටේ තරුණියන් පමණක් නොව තරුණයන් ද සම සුදු කරගැනීම සඳහා බහුලව මෙම ආලේපන භාවිතා කරන බවයි. රසදිය මෙතරම්ම අපේ ශරීරයට අහිතකර වන්නේ කෙසේද කියා යමෙකුට ගැටලුවක් මතුවෙන්න පුළුවනි. රසදිය අපගේ විවිධ වැඩවලට අවශ්‍ය වන ඉතා අගනා ලෝහයක්. ඒ වුණත් රසදිය ශරීරගතවීම ඉතා අහිතකරයි. රසදිය ශරීරගත වුණොත් කෙටිකාලීනව වගේම දිගුකාලීනව ද සංකූලතා මතුවෙනවා. කෙටි කාලීනව වන බලපෑම් ලෙස සම කැසීම, සම මතුපිට දද මතුවීම, පලු දැමීම, මෙන්ම සම මතුපිට ඉතා පහසුවෙන් අසාත්මිකතාවයන්ට ගොදුරු වීම දක්වන්න පුළුවනි. එවැනි සංකූලතා අපට දැක ගත හැකියි. නමුත් රසදිය ශරීරගතවීම නිසා සිදුවන දීර්ඝකාලීන බලපෑම් අපට කෙටි කාලයක් තුළ දැකගත හැකිවන්නේ නෑ. රසදිය ශරීරගතවීම නිසා සෘජු ලෙසම බලපෑම් ඇතිවන්නේ අපගේ මධ්‍ය ස්නායු පද්ධතියට. එහි ප්‍රතිඵලයක් ලෙස මතකය අඩුවීම, වෙව්ලීම, චින්තන හැකියාව අඩුවීම, තර්ක කිරීමේ සිතීමේ හැකියාව අඩුවීම ආදිය සිදු‍වෙන්න පුළුවන්. එසේම රසදියවල බලපෑම සෘජුවම මොළය, අක්මාව, වකුගඩු වැනි අපගේ ශරීරයේ ප්‍රධාන ඉන්ද්‍රියයන්වලට බලපාන බවත් එයින් ඉතා අහිතකර ප්‍රතිඵල අත්විය හැකි බවත් හෙළිවී තිබෙනවා. මේ නිසයි රසදිය අඩංගු ආලේපන අප සම්පූර්ණයෙන් ම ප්‍රතික්ෂේප කළ යුත්තේ.
රසදිය සම මත ආලේප කළ විට මෙලනින් වර්ණකය නිපදවීම තාවකාලිකව නවතිනවා. සම සුදුවන්නේ ඒ නිසයි. අපගේ සම මොහොතින් මොහොත වෙනස් වෙනවා. ඒ නිසා අඛණ්ඩව සම සුදුපැහැයෙන් තබාගැනීමට නම් අඛණ්ඩව මේ ආලේපන සම මත ආලේප කළ යුතු වෙනවා. අපේ සමට පැහැය ලැබෙන්නේ ජානවල බලපෑමෙන් බව ඔබ දන්නවා. මෙම සම සුදු කරන ආලේපනවලට එම ජානවල සංයුතිය වෙනස් කිරීමේ හැකියාවක් ඇත්තේ නෑ. ඒ නිසා මෙම ආලේපන වලින් ලැබෙන සුදුවීම තාවකාලිකයි. රසදිය හැඳින්වීම සඳහා විවිධ නම් භාවිත වෙනවා. කිසියම් ආලේපනයක Calomel, Mercuric, Mercurous, Chloride, Mercurio, Mercuric Oxid අඩංගු බව එම ආලේපනයේ ලේබලයේ සඳහන් වන්නේ නම්, එයින් අදහස් වන්නේ එම ආලේපනයේ රසදිය අඩංගු වන බවයි. එමනිසා කිසියම් ආලේපනයක ඉහත නම්වලින් එකක් හෝ සඳහන් වන්නේ නම්, එම ද්‍රව්‍ය භාවිතා නොකිරීමට වගබලාගත යුතුයි.
ඔබ භාවිතා කරන ආලේපනයේ රසදිය ඇතිදැයි මෙතැනින් දැනගන්න :
ඔබ දැනටමත් සම සුදු පැහැ ගැන්වීමට කිසියම් ආලේපනයක් භාවිතා කරනවා නම්, ජාතික රෝහලේ පිහිටුවා ඇති ජාතික විෂ තොරතුරු මධ්‍යස්ථානයට සතියේ දිනවල පෙ.ව. 8.00 - ප.ව. 4.00 දක්වාත් සෙනසුරාදා දිනවල පෙ.ව. 8.00 සිට ප.ව. 12.00 දක්වාත් 011-2686143 අංකයට දුරකථන ඇමැතුමක් ලබාදීමෙන් සහ infotoxlanka@gmail.com විද්‍යුත් ලිපිනයට ඔබගේ ආලේපනයේ තොරතුරු එවීමෙන් ඔබ භාවිතා කරන ආලේපනයේ රසදිය ලෝහය අඩංගු ද නැද්ද යන බව තහවුරු කරගත හැකියි. වඩාත්ම භයානක වන්නේ ලේබලයේ අඩංගු ද්‍රව්‍ය පිළිබඳව කිසිවක් සඳහන් නොවන ආලේපනයි. තායිලන්තයෙන් ආනයනය කෙරෙන රූපලාවණ්‍ය නිෂ්පාදනවල එම ආලේපනයේ අඩංගු ද්‍රව්‍ය පිළිබඳව කිසිදු සඳහනක් නෑ. ඒවා ලංකාවට පැමිණෙන්නේ කුඩා භාජනවල අඩංගු ආලේපන ලෙසින් පමණයි. ඒ නිෂ්පාදන පාරිභෝගිකයින්ට අලෙවි කරන ආකාර කීපයක් තිබෙනවා. ඉන් එකක් රූපලාවණ්‍යාගාරවල සේවය ලබාගැනීමට එන පාරිභෝගිකයින්ට සෘජුවම අලෙවි කිරිමයි. එසේම ඇතැම් තරුණියන් ෆේෂල් එකක් වැනි දෙයක් සඳහා රූපලාවණ්‍යාගාරයකට ගිය විට විශේෂ වට්ටමක් යටතේ එම තරුණියන්ට එම ආලේපන හඳුන්වා දීමයි. එම ආලේපනය මඟින් ඉතාම ඉක්මනින් සම සුදු පැහැ වන බවට එම තරුණියන් දැනුවත් කෙරෙනවා. තායිලන්තය, ඉන්දියාව වැනි රටවලට නිතර යන එන උදවිය එවැනි නිෂ්පාදන තොග වශයෙන් ලංකාවට ගේනවා. ඒවා සෘජුවම පාරිභෝගිකයින්ට අලෙවි කරනවා. ඒවා පිළිබඳ පාලනයක් අපේ රටේ ඇත්තේ නෑ. ඒ ආලේපන භාවිතා කරන රූපලාවණ්‍යාගාර හිමියන් පවා ඇතැම්විට දන්නේ නෑ මෙම ආලේපනවල අඩංගු ද්‍රව්‍ය පිළිබඳව. ලංකාවේ සිටින බොහෝ රූපලාවණ්‍යාගාර පවත්වාගෙන යන්නන්ට වෛද්‍ය විද්‍යාව පිළිබඳව හෝ භෞතවේදය පිළිබඳව දැනුවත් කමක් නෑ.
ඒ නිසා ඒ ආලේපන භාවිතා කිරීමට පෙර පාරිභෝගිකයින් අවබෝධයෙන් සිටිය යුතුයි. රූපලාවණ්‍යාගාරවලින් සේවය ලබාගැනීමට ගිය විට එහිදී භාවිතා වන ආලේපනවල අඩංගු ද්‍රව්‍ය පිළිබඳව විමසා සිටිය යුතුයි. මීට වසර කීපයක සිට ලංකාව තුළ අමුතු වැඩපිළිවෙළක් ක්‍රියාත්මක වෙනවා. ඒ විවාහ වීමට බලාපොරොත්තු වන යුවතියන් විවාහ දිනයට මාස කීපයකට පෙර සිට සතියකට දින කීපයක් රූපලාවණ්‍යාගාරයකට ගොස් සම සුදු කරගැනීමයි. මෙම රූපලාවණ්‍යාගාරවල සම සුදු කරගැනීමේ දින 7, දින 14 වැනි වැඩසටහන් තිබෙනවා. එහිදී භාවිතා වන ඇතැම් ආලේපනවල රසදිය බහුලව අඩංගු වන බව හෙළිවී තිබෙනවා. ඒ නිසා එවැනි රූපලාවණ්‍යාගාරවල සේවය ලබාගැනීමට බලාපොරොත්තු වන අය එහිදී භාවිතා වන ආලේපන ද්‍රව්‍ය පිළිබඳව දැනුවත් වීම වැදගත්. එසේ නොවුණහොත් සිදුවන්නේ ටික දිනකට සම සුදුකර ගැනීමට ගොස් සදාකාලිකව ජීවිතයට බලපාන ආබාධයක් ශරීරයට ඇතුළත් කර ගැනීමයි කළු හෝ තළෙලු සමත් ඇති අය සිතිය යුත්තේ විවිධ ලෙඩ රෝගවලින් ආක්ෂා වීමට උපතින්ම අපට ලැබී ඇති මේ සම කෙතරම් අගනේද යන්නයි.
ජාතික ධූලකවේදය සහ විෂ තොරතුරු මධ්‍යස්ථානයේ ප්‍රධානී
කායික රෝග සහ දියවැඩියාව පිළිබඳ
ශේෂඥ වෛද්‍ය වරුණ ගුණතිලක
උපුටා ගැනීම සිළුමිණ පුවත්පත
