සිදුරේ අනවශ්‍ය ලෝම ඔබට හිසරදයක්ද ?

කෙස්, ලෝම, රෝම කූප ශරීරයේ නොතිබිය යුතු ස්ථානවල අතිරික්ත සේ වැඩී තිබීම බොහෝ කාන්තාවන්ට නම් දැඩි ලෙස හිත කම්පා කරවන ගැටලුවකි. පිරිමි පාර්ශ්වයේ නම් මුහුණ, ගෙල, පපුව, උදරය ආශි‍්‍රතව මෙසේ රෝම කූප මතුවීම සාමාන්‍ය දෙයක් වුවද, කාන්තා පාර්ශ්වය තුළ ද එසේ සිදුවනවා නම් එය කරදරකාරී වාතාවරණයකි. පිරිමි අයගේ ලෙස, කාන්තාවන්ගේ ද ශරීරයේ රෝම කූප [body and facial hair] අතිරික්ත ලෙස මතුවනවා නම්, එම තත්ත්වය වෛද්‍ය විද්‍යාවේ හඳුන්වන්නේ Hirsutism ලෙසයි.

Hirsutism තත්වයේ දී ද ඇතිවන ලෝම, හිසකෙස් ලෙසම, මෙලනින් [melanin] නම් වර්ණකය මගින් පැහැ ගැන් වී තිබේ. හිසකෙස්වල රළු හා ඝනකම් ස්වභාවය සහිත ලෝම වේ. ගැහැනු අය තුළ විශේෂයෙන් ඇතිවන මේ තත්ත්වයේ දී, රෝම කූප බහුලව දැකිය හැකි වන්නේ මුහුණේ, පපුව ආශ්‍රිතව, උදරය හා කලවා ප්‍රදේශයේත්, පසුපස ආශ්‍රිතවත් ය.

මේ අසහනකාරී තත්ත්වයත් සමඟ ම කාන්තාවන් තුළ කුරුලෑ [acne], තෙල් සහිත සම [Oily skin] හා තට්ටය පෑදීම [Scalp baldness], ශ්වරාලය ඉදිරියට නෙරා ඒම, පියයුරු ප්‍රමාණාත්මක ව අඩු වීම, ඔසප් වීම අක්‍රමවත් වීම වැනි දේ මතුවනවා නම්, එය Virllism නම් දරුණු තත්ත්වය යි.

Hirsutism නමැති තත්ත්වය ලොව පුරා කාන්තාවන් අතිමහත් සංඛ්‍යාවකට පීඩා ගෙන දෙන්නකි. සංඛ්‍යාලේඛන මගින් දක්වන පරිදි මෙය, ලොව පුරා 10% පමණ කාන්තාවන්ට දැඩි ලෙස පීඩා ගෙන දෙනු ඇත.

මේ තත්ත්වයට ප්‍රධානතම හේතුව ලෙස සැලකෙන්නේ ගැහැනුන් තුළ androgens නම් ස්ටෙරොයිඩමය හෝමෝන නිෂ්පාදනය වීමයි. සාමාන්‍යයෙන් ටෙස්ටොස්ටෙරෝන් වැනි androgenic hormones නිෂ්පාදනය වන්නේ පිරිමින් තුළයි. ඒත් යම් යම් හේතු නිසා ගැහැනුන් තුළ මේ ද්‍රව්‍ය නිෂ්පාදනය වීමට පටන් ගැනීම Hirsutism තත්ත්වයට මුල පිරිය හැකියි.

ඇන්ඩ්‍රොජෙනික් ද්‍රව්‍ය නිෂ්පාදනය වීම කාන්තාවන් තුළ සිදුවන්නේ ඩිම්බකෝෂ හා අධිවෘක්ක ග්‍රන්ථි ආශ්‍රිතවයි. සුළු ප්‍රමාණයෙන් බොහෝ කාන්තාවන් තුළ එම ඇන්ඩ්‍රොජෙනික් ද්‍රව්‍ය නිෂ්පාදනය වීම සිදුවේ. ඒත් විවිධ බෙහෙත් වර්ග පරිහරණය කිරීම නිසාත්, අධි වෘක්ක ග්‍රන්ථි ආශ්‍රිතව ඇතිවන පිළිකාමය තත්ත්ව නිසාත්, සාමාන්‍ය ප්‍රමාණයන්ට වඩා වැඩි ප්‍රමාණවලින් මේ ද්‍රව්‍ය නිෂ්පාදනය වීමට පටන් ගනියි.

එම නිසා ශරීරයේ යම් යම් ස්ථාන වලින් රෝප කූම ඇතිවීම ආරම්භ වීම සිදුවනවාත් සමඟ ම, ඇතැමුන් තුළ කාන්තා ලක්ෂණ හීන වී, පිරිමි ගති ලක්ෂණ [masculine features] ඇතිවේ.

ඒ වගේම ඩිම්බකෝෂ ආශ්‍රිතව ඇතිවන විවිධ ගැටලුමය තත්ත්වවලදී (උදා - Polycystic ovary syndrome) ටෙස්්ටොස්ටෙරෝන් වැනි හෝමෝනවල ඉහළ යෑමක් සිදුවීම නිසා Hirsutism තත්ත්වය මතු විය හැකිය.

ඔබටත් Hirsutism වැනි දෙයක් උද්ගත වී ඇතැයි කියා දැනෙනවා නම්, ඔබ කළ යුත්තේ වෛද්‍යවරයකුගේ සහය පැතීමයි. රුධිර පරීක්ෂණයක් මගින් රුධිර හෝමෝන සාන්ද්‍රණයන් පරීක්ෂා කර ගැනීමත්, එලෙසම අල්ට්‍රා සවුන්ඩ් [Ultra sound] පරීක්ෂා කර ගැනීමත් සමඟම  Polycystic ovary Syndrome  වැනි තත්ත්ව හා අධි වෘක්ක පිළිකා වැනි දේ හඳුනාගත හැකියි. ඒත් සමඟම කිසිදු හේතුවකින් තොරව මේ තත්ත්ව මතු විය හැකියි. එම නිසා ඔබට මෙවැනි දේ ඇතිවී තිබේ නම්, වාතාවරණය දරුණු වන්නට ප්‍රථම වෛද්‍ය උපදෙස් ලබා ගන්න.

උපුටා ගැනීම දිනමිණ