කලට වෙලාවට වෙනස්වෙන Eye Makeup
ඇස සිතුවමක් සේ ලස්සන කළ හැකියි. ඒ නිසාම අයි මේක්අප් ඉතා කල්පනාකාරීව කරන්න ඕනෑ. මුහුණේ හැඩය ඉස්මතු කරගැනීමට, ආකර්ෂණය වැඩිකර ගැනීමට අයි මේක්අප් වැදගත් වෙනවා. රූපලාවන්‍යය දවසින් දවස අලුත් වෙන කලාවකි. කාලෙන් කාලෙට වෙනස්වෙන කලාවකි. ඒ නිසාම රූපලාවන්‍ය කටයුතු කරනවිට දී අලුත්වෙන දේවල් ගැනත් දැනගැනීම වැදගත් ය. එසේ නොවුනොත් ඔබේ හැඩගැන්වීම පිරිසක් ඉදිරියේ අපහසුතාවට පත්වෙන විදියේ අවධානයකට ලක්වෙන්නත් බැරි නැහැ. විශේෂයෙන් මේක්අප් යනු ඒ විදියට ඉක්මනින්ම වෙනස්වෙන අලුත් දේවල් එකතුවෙන කලාවකි. ඒ අතර තොල් ආලේපන, නිය වර්ණ සහ ඇස හැඩගැන්වීම් ප්‍රධාන තැනක් ගනී.
ඇස හැඩගැන්වීම හෙවත් අයි මේක්අප් එකක් නිවැරදිව කරගන්නේ කොහොමද? මේ සටහන ඒ ගැන කතා කිරීමටය. වර්ණ තෝරා ගන්නේ කෙසේද සහ කාලයට සහ අවස්ථාවට ගැළපෙන විදියට අයි මේක්අප් එකක් කරන්නේ කෙසේදැයි සොයා බලමු.
වැදගත් වෙන්නේ ඇයි?
මේක්අප් එකකදී මුහුණේ තිබෙන ලස්සන වඩාත් ඉස්මතු කර පෙන්වන්නේ ඇසයි. ඇස සිතුවමක් වගේ ලස්සන කළ හැකියි. ඒ නිසාම අයි මේක්අප් ඉතා කල්පනාකාරීව කරන්න ඕනෑ. විශේෂයෙන් මුහුණේ හැඩය ඉස්මතු කරගැනීමට, ආකර්ෂණය වැඩිකර ගැනීමට අයි මේක්අප් වැදගත් වෙනවා.
අයි මේක්අප් ලස්සන වෙන්න නම්
ලස්සන වගේම පිළිවෙළක් පෙනෙන විදියට හැඩට අයි මේක්අප් එකක් කරන්න නම් ඇහි බැමෙන් ලැබෙන්නේ ලොකු සහයෝගයක්. ඒ නිසා අයි මේක්අප් එකක් ලස්සන වෙන්න නම් අනිවාර්යයෙන්ම අනවශ්‍ය රෝම කූප ඉවත් කර පිළිවෙළකට සහ හැඩට ඇහිබැම සකස් කරගන්න ඕනෑ.
ගැළපෙන නොගැළපෙන දේවල්
බොහෝ වෙලාවට අයි මේක්අප් එකක් කිරීමේදී ඒ ගැන එතරම් සැලකිල්ලක් දක්වන්නේ නැහැ. වැඩි දෙනෙක් කරන්නේ තමන්ගේ ඇඳුමේ වර්ණයට ගැළපෙන්න පමණක් ඇස වර්ණ කිරීමයි. එහෙත් එය නිවැරදි නැහැ. නිවැරදිව අයි මේක්අප් එකක් කරන විට අවධානය දිය යුතු කරුණු කිහිපයක් තිබෙනවා. තමන් අඳින ඇඳුම වගේම සමේ වර්ණය, උත්සව අවස්ථාවේ ස්වභාවය, රාත්‍රී කාලයේදී දිවා කාලයේද යනවග, තමන්ගේ වයස, ඇස්වල හැඩය සහ ප්‍රමාණය, මේ සියලු කාරණා පිළිබඳව නිවැරදි අවබෝධයක් අවශ්‍යයි.
කැමැත්ත සහ ගැළපීම වෙනස් දෙකක්
තරුණ සමක් සහිත වයසින් අඩු යුවතියකට අයි මේක්අප් එකක් දැමීමේදී ඇයට ගැළපෙන විදියට ඕනෑම වර්ණයක් පාවිච්චි කර අයි මේකප් එක කිරීමේ නිදහස තියනවා. මැදි වයසේ කෙනකුට ඒ විදියේ මේකප් එකක් කිරීමේදී වයස ගැන කල්පනාකාරී වෙන්න ඕනෑ. එහෙත් මැදිවියේ හෝ වයසින් තවත් වැඩි කාන්තාවක් සමහර වෙලාවට තමන් දැක තිබෙන අයි මේඅප් එකක් තමන්ටත් කරගන්න කැමැත්ත පළකරන අවස්ථා තිබෙනවා. එහෙම වෙලාවට රූපලාවන්‍ය ශිල්පීන් එම තැනැත්තා කැමති විදියට එය සිදුකර දෙනවා. එහෙත් එය කැමැත්ත වූවාට තමන්ට නොගැළපෙනවා වෙන්න පු`ඵවනි. ඒ නිසා සෑම වෙලාවකම තමන් කැමති දේ සහ තමන්ට ගැළපෙන දේ අතර වෙනසක් තිබෙන බව දැනගැනීම වැදගත්.
වර්ණ ගළපන හැටි
අලුත්ම විලාසිතාව වන්නේ ළා වර්ණ භාවිතා කිරීමයි. උදාහරණයක් ලෙස සමේ වර්ණයට, තොල් ආලේපනයට ගැළපෙන ලෙස ළා රෝස පැහැය, ළා දුඹුරු පැහැයට සමාන වර්ණ යොදා ගැනෙනවා. මනාලියකගේ වුවත් අයි මේක්අප් එක කරන්නේ ළා වර්ණවලින්.
තද වර්ණ හෝ දිලිසෙන වර්ණ දිවා කාලයට ගැළපෙන්නේ නැහැ. එවැනි වර්ණ වඩාත් ගැළපෙන්නේ රාත්‍රී කාලයටයි. ඒ වගේම අයි මේක්අප් එකක් කරන විටදී ඇස්වල ප්‍රමාණය අනුව කුඩා ඇස් විශාල කර පෙන්වීමට සමහරු අයි ලයිනර් එක තරමක් මහතට අඳිනවා. එය නොකළ යුත්තක්. ඇසේ ප්‍රමාණය කුඩා නම් ඉතාමත් සිහින්ව අයි ලයිනර් භාවිතා කරන්න ඕනෑ. දිගැති ලොකු ඇසක් නම් එහි වාසිය තිබෙන්නේ අයි මේක්අප් එකක් වඩාත් ආකර්ෂණිය ලෙස කළ හැකි වගේම පැහැදිලිව පෙනෙන්නට තිබීමයි.
ඒ වගේම අයි ලෑෂස් වුවත් ඇසට ස්වාභාවික පෙනුමක් ගෙනෙන ප්‍රමාණයේ අයි ලෑෂස් පාවිච්චි කළ යුතුයි වගේම එයද වයස අනුව තෝරාගත යුත්තේ කල්පනාකාරීවයි. එවිට තමන් හිතනවාට වඩා ආකර්ෂණීය පෙනුමක් එකතුවෙන විදියේ අයි මේක්අප් එකක් කරගැනීමට අපහසු නැත.
අදහස් දැක්වීම චාන්දනී බණ්ඩාර
උපුටා ගැනීම සිරිකත
