හුස්ම ගන්න කොණ්ඩෙට ආදරෙන් සලකන්න
ඈත අතීතේ ඉඳන්ම පොදුවේ කාන්තාවන්ගේ හිසකෙස් වලට උපමා කළේ කිතුල් රැහැන්. අතීතේ ස්වභාවික වට්ටෝරු පමණක් භාවිත කළ කාන්තාවන්ගේ හිසකෙස් කිතුල් රැහැන් වලට උපමා කිරීම අතාත්වික නොවූවක්. නමුත් වර්තමානයේ එවැනි කෙස් කළඹක් අප දකින්නේ බොහොම කලාතුරකින්. මොන විදියේ කොණ්ඩයක් තිබුණත් තියෙන කොණ්ඩෙ රැකගන්න කාන්තා පිරිමි දෙපාර්ශ්වයම වැදගත් කරුණු ටිකක් තියෙනවා.
● පෝෂ්‍යදායී ආහාර වේලක් පවත්වා ගන්න
ඔබ විශ්වාස කළත් නොකළත් ඔබේ හිසකෙස්වල පෙනුමට, වර්ධනයට මූලික වශයෙන් ඔබ ආහාරයට ගන්නා දේවල් බලපානවා. ශක්තිමත් සහ සෞඛ්‍ය සම්පන්න හිසකෙස් නිර්මාණය සඳහා හිසකෙස් මුල් වලට නිසි පෝෂණය අවශ්‍යයි. විවිධ ආලේපන, පෙති මගින් හිසකෙස් වර්ධනය කරගත හැකි වුවත් පෝෂණයේ ප්‍රධාන ප්‍රභවය පැමිණෙන්නේ හිස්කබල ඇතුළතින්. ඒ නිසා හිසකෙස් නිරෝගීව තබා ගැනීමට ප්‍රෝටීන්, විටමින්, ඛනිජ ලවණ සහ සෞඛ්‍ය සම්පන්න මේද සහිත ආහාර වේලක් අනුභව කිරීම වැදගත්.
● සෑමවිටම කන්ඩිෂනර් එකක් භාවිත කරන්න
මෙය හිසකෙස් සඳහා ඇති වඩාත් වැදගත් රූපලාවන්‍ය ඉඟියක්. හිස කෙස් ෂැම්පු කිරීමෙන් පසු සෑමවිටම කන්ඩිෂනර් ගල්වා පනාවකින් හොඳින් පීරීමට සැලකිලිමත් වෙන්න. එමගින් හිසකෙස් දිලිසෙන ස්වභාවයක් ගන්නව විතරක් නෙවේ හිසකෙස් වඩාත් නම්‍යශීලී කරයි. එමෙන්ම හිසකෙස් කැඩී යාමේ අවදානම අඩු වන අතර හිසකෙස්වල සමස්ත පෙනුම වැඩිදියුණු වේ.
● Hair Dye එක්ක පරිස්සමෙන්
නිතිපතා ඔබ හිසකෙස් ඩයි කරන්නේ නම් කිසිසේත්ම හිසකෙස් මුල් වල ආලේප නොකළ යුතුයි. Hair Dye ඔබට දර්ශනීය පෙනුමක් ලබා දුන්නත් හිසකෙස් වලට ඉතා හානිකර විය හැකියි. හිසකෙස් ඩයි කිරීමට අවශ්‍යනම් මුල් ස්පර්ශ නොකර හිසකෙස්වල ඉතිරි කොටසෙහි වර්ණ ගැන්වීම කළ යුතුයි.
● හිසකේ සත්කාරයට තෙල් ඇතුළත් කරගන්න
හිසකෙස්වල පවතින ගැටලු රාශියකට පිළිතුරු සපයන්න හොඳ තෙල් වර්ගයකට පුළුවන්. හිසකෙස් වල තෙතමනය රැකගන්න, පහසුවෙන් කැඩී නොයන ලෙස හිසකෙස් ශක්තිමත් කරන්න, ඝන කෙස් කළඹක් ලබාගන්න ඔබට ඕනෑම තෙල් වර්ගයක් භාවිත කළ හැකියි. පොල්තෙල්, ඔලිව් තෙල්, තල තෙල්, හණ තෙල්, මිදි තෙල්, ආමන්ඩ් තෙල් සුදුසුයි.
● හිස පීරීමත් පරිස්සමෙන්
ඔයාගෙ ආච්චි අම්මගෙන් ඔයා ඇහුවොත් ලස්සන කොණ්ඩෙකට මොනවද කරන්න ඕන කියල ආච්චි අනිවාර්යයෙන් කියයි නිදාගන්න කලින් සිය වතාවක් කොණ්ඩෙ පීරන්න කියල. අතීතයේ මේක ඉතා ජනප්‍රිය සත්කාරයක් වුණා වගේම බොහෝ කාන්තාවන් එය විශ්වාස කළා. නමුත් ඔබේ හිසකෙස් වියළි හෝ රැලි සහිත නම් නිතර නිතර පීරීම සහ ඇදීම හිසකෙස් දුර්වල කිරීමට සහ ඒවා කැඩී යාමට හේතු විය හැකියි. ඒ නිසා හිස පීරිය යුත්තේ දිනකට 3 වතාවක් පමණයි.
● සෑමවිටම හිසකෙස් ස්වභාවිකව වියළෙන්නට හරින්න
මෙය කාලයත් සමඟ හිසකෙස් වලට ඇදහිය නොහැකි ප්‍රතිඵල ලබා දෙන ක්‍රමයක්. නෑමෙන් පසුව සෑම අවස්ථාවකම හිසකෙස් ස්වභාවිකව වාතයේ වියළීමට ඉඩ දෙන්න. ස්වයංක්‍රීය වියලනයක් මගින් හිසකෙස් වියලුණොත් හිස් කබල වියළෙනවා වගේම හිසකෙස් ගැට ගැහෙනවා.
● හොඳම සහ වැදගත්ම උපදෙස
මේකඔබට කොපමණ ප්‍රමාණයක කුමනාකාරයේ කොණ්ඩයක් තිබුණත් මෘදු මොළොක් ආදරයෙන් වගේම සැලකිල්ලෙන් ඔබේ හිසකෙස් හසුරුවන්න. කොයි මොහොතකවත් කෙස් අදින්න එපා. ඒවට නිදහසේ හුස්ම ගන්න ඉඩ දෙන්න. ස්වභාවික නිෂ්පාදන වලින් හිසකෙස් පෝෂණය කරන්න. කොණ්ඩෙට ආදරේ කරන එක අමුතු දෙයක් වෙන් පුළුවන්. ඒත් ඔබ ඔබේ කොණ්ඩයට යම් ආදරයක් දක්වනවනම් හිසකෙස් ඔබට අවශ්‍ය ආකාරයටම කීකරු වෙයි.
උපුටා ගැනීම නවලිය
