Glass Skin පෙනුමට බොඩි ස්ක්‍රබ්

ස්ක්‍රබ් එකක් කියන්නෙ සමේ ඇති මැරුණු සෛල ඉවත් කර සම පිරිසිදු කරගන්න භාවිත කරන රූපලාවන්‍ය සත්කාර අතර තිබෙන වැදගත්ම ක්‍රමයක්. Body Scrub වගේම Face Scrub තියෙනව. සාමාන්‍යයෙන් වර්තමාන වෙළෙඳපොළේ ස්ක්‍රබ් වර්ග මිළ අධිකයි. ඒ වගේම බොහෝ නිෂ්පාදන වල රසායනික ද්‍රව්‍ය අඩංගුයි. ඒ නිසා අද බියුටි පිටුවෙන් කියල දෙන්නෙ ප්‍රංශයේ ප්‍රධාන සඟරාවක් වන Marie Claire මගින් ලොව ප්‍රධාන පෙළේ රූපලාවන්‍ය හා චර්ම රෝග විශේෂඥයින් කිහිපදෙනෙකුගේ දැනුමින් ලබාගත් ස්ක්‍රබ් වට්ටෝරු කිහිපයක් ගැනයි.

■ කෝපි සහ මී පැණි ෆේස් ස්ක්‍රබ් 

හොඳම බොඩි ස්ක්‍රබ්ස් කෝපි සහ මී පැණි වලින් සාදා ඇති බව අප පිළිගත යුතුයි. කෝපි වල අඩංගු කැෆේන් මගින් මුහුණේ සම මත රුධිර සංසරණය වේගවත් කර සමට දීප්තියක් ලබාදෙනවා.

සාදාගන්නා ආකාරය :

කෝපි කුඩු තේ හැඳි 4 ක්, මී පැණි තේ හැඳි 5 ක් සහ ඔලිව් ඔයිල් තේ හැඳි 5 ක් භාජනයකට දමා හොඳින් මිශ්‍ර කර තෙත සම මත ආලේප කරන්න. මිනිත්තුවක් පමණ මෘදුව සම්භාහනය කර උණුසුම් ජලයෙන් සෝදා හැර වියලි තුවායකින් පිසදාගන්න.

■ රෝස පෙති බොඩි ස්ක්‍රබ් 

රෝස මල් වලින් සමට ප්‍රතිලාභ සිය ගණනක් ලබාදෙනව. ඒ වගේම ස්ක්‍රබ් එකට හොඳ සුවඳකුත් ලැබෙනව. සෝරියාසිස් සහ දද වැනි සමේ රෝග සඳහා රෝස කියන්නෙ හොඳ ප්‍රතිකාරයක්.

සාදාගන්නා ආකාරය :

රෝස තෙල් මේස හැන්දක් සමග නැවුම් රෝස පෙති කුඩා භාජනයකට දමා පොඩි කරගන්න. පසුව ඊට කුඩු කරගත් සීනි කෝප්පයක් සහ ජොජෝබා තෙල් කෝප්ප ¼ ක් ද මිශ්‍ර කර සිරුරේ ගල්වා මිනිත්තු කිහිපයක් තිබෙන්නට හැර සාමාන්‍ය ජලයෙන් සෝදාහරින්න.

■ කහ මිශ්‍ර විටමින් E ස්ක්‍රබ් 

කහ කියන්නෙ ඕනෑම ස්ක්‍රබ් එකකට හෝ ෆේස් මාස්ක් එකකට බය නැතිව භාවිත කරන්න පුළුවන් විශ්මයජනක අමුද්‍රව්‍යයක්. කහ වලින් නිෂ්පාදනය කරගත හැකි මේ ස්ක්‍රබ් එක භාවිත කළොත් සමට ස්වභාවික දීප්තියක් ලබාදෙන අතර අවසානයේ සමට ඉතා මෘදු බවක් ලැබෙනවා.

සාදාගන්නා ආකාරය :

කහ තේ හැඳි 2 ක්, සීනි කෝප්පයක්, පොල් තෙල් කෝප්ප ¼ ක් හා විටමින් E කරල් දෙකක තෙල් භාජනයකට දමා හොඳින් මිශ්‍ර කර තෙත සම මත ආලේප කර වක්‍රාකාරව සම්භාහනය කරන්න. විනාඩි කිහිපයක් තිබෙන්නට හැර මද උණුසුම් ජලයෙන් සෝදා හැර වියලි තුවායකින් පිසදාගන්න.

උපුටා ගැනීම නවලිය