විසිකරන දෙහි ලෙල්ලෙන් දිදුලන සමක්
පැහැපත් සමක් යනු අප සෑම දෙනාගේම සිහිනයක්. ඒ වෙනුවෙන් අප නොකරන දෙයක් නැති තරම්. විවිධ දේවල් අත්හදා බැලුවත් විටෙක ඒවා අසාර්ථක වීමට පුළුවන්. ජාන මඟින් ලැබෙන අපේ සම පැහැය, සමේ නිරෝගී බව තබා ගැනීමට දෙහි ගෙඩියෙන් කළ හැකි විශ්මිත සත්කාර ගැනයි මේ කතා බහ.
මුළුතැන්ගෙට නැතිවම බැරි රසකාරකයක් වගේම වෙලාවකට ඖෂධයක්, තවත් වෙලාවකට රෑපලාවන්‍ය කටයුතු වලටත් භාවිතයට ගන්නා දෙහි කියන්නේ අපි හැමෝටම වැදගත් වන අමුද්‍රව්‍යක්. විටමින් C බහුලව අන්තර්ගත දෙහි වලින් අපිට ලබා ගන්න පුළුවන් ප්‍රයෝජන රැසක් තියෙනවා. දෙහි යුෂ වල තියෙන ප්‍රයෝජන වගේම විසිකරන දෙහි ලෙල්ලෙන් ගතහැකි ප්‍රයෝජන බොහොමයි. මේක කියෙව්වොත් ආයේ කවදාවත් ඔයා දෙහි ලෙල්ලක් ප්‍රයෝජනයට ගන්නේ නැතිව නම් විසි කරන එකක් නැහැ.
හිස්බඩට දෙහි, මීපැණි මිශ්‍ර වතුර වීදුරුවක් බොන්න
ඔබේ සම අඳුරු පැහැය නම් ඔබ පැහැපත් සමක් බලාපොරොත්තුවෙන් සිටින අයෙක් නම් අනිවාර්යයෙන් දවස පටන්ගත යුත්තේ වතුර වීදුරුවකින්. මෙම වතුර වීදුරුවට දෙහි සහ මී පැණි තේ හැන්දක් එකතු කර පානයට එකතු කර හිස්බඩ පානයට ගන්න. ජලය අපගේ සමට අත්‍යවශ්‍ය දෙයක්. ඒ වගේම දෙහියුෂ වල විටමින් සී අඩංගු වෙනවා. මී පැණි විසබීජවලට එෙරහිව ක්‍රියා කරනවා. එසේම මී පැණි යනු ඇන්ටි බැක්ටීරියාවක් නිසා සම පැහැපත් වීමට මී පැණි යනු හොඳ ඖෂධයක්. බොහෝ දෙනෙකු සම පැහැපත් වීමට මුහුණට පේෂල් කරත් සම අභ්‍යන්තර පෝෂණය ගැන වඩාත් සැලකිය යුතු වෙනවා. දෙහි මීපැණි මිශ්‍ර ජල පානය ශරීරයේ අභ්‍යන්තර පෝෂණයට ඉතාම වැදගත් වනවා.
කුරුලෑ මුහුණට දෙහි වලින් හුමාල සත්කාරය
නිතරම හුමාලය අල්ලන්නට උත්සහ කරන්න එපා. සම වියළීමට ලක්වන්නට පුළුවන්. සතියකට එක් වරක් හුමාලය අල්ලනවිට දෙහි ලෙලි කිහිපයක් එකතු කර හුමාලය ඇල්ලීමෙන් මුහුණේ ඇති කුණු දූවිලි කුරුලෑ බිබිළි අවම කරගත හැකි වගේම සමේ පැහැපත් බවට සහ තරුණ පෙනුම රැක ගැනීමටද හැකියාව ලැබෙනවා. වයස අවුරුදු තිහ පසුවුණ විගස කාන්තාවක් නම් සමෙහි ප්‍රශ්න ඇති අයෙක් නම් මෙම සත්කාර සුදුසු වනු ඇත.
දෙහි ලෙලි විසි කරන්න එපා.
දෙහි ලෙල්ල විසිකිරීමට පෙර එමඟින් කළ හැකි ප්‍රතිකර්ම බෙහොමයක් තිබෙනවා. දෙහි ලෙල්ල විසි කරන්න පෙර ඔයාගේ නියපොතුවල හොඳින් අතුල්ලන්න. නියපොතු වල ඇති කුණු දුහුවිලි දෙහි වල ඇති අම්ල ගතියෙන් හොඳට පිරිසිදු කරනවා. නියපෙළ පිරිසුදුව හා සුදුවට තියා ගන්න මෙය ඉතාම හොද ක්‍රමයක්.
ඒ වගේම දෙහි යුෂ ස්වාභාවික විරංජක කාරකයක් ලෙසත් ක්‍රියා කරන නිසා භාවිතයට ගත් දෙහි ලෙල්ල අඳුරු ලප ඉවත් කිරීමට යොදා ගැනීමේ හැකියාව තිබෙනවා. කළ යුත්තේ එය ඔබේ සමේ අඳුරු කොටස්වල දෙහි ලෙල්ල මෘදුව අැතිල්ලීමයි. පසුව විනාඩි 30 ක් තබා සෝදා හැරිය යුතු වෙනවා. ඔබ දෙහි වලින් සත්කාර කිරීමේදි කල්පනාකාරි විය යුතු කරුණ වන්නේ ඔබ මේ දේවල් කල යුත්තේ නිවස ඇතුළතක සිටය. කිසිම වෙලාවක හිරු එළියට නිරාවරණය නොවිය යුතුය.
දෙහි ලෙල්ල මෘදුව ඇතිල්ලීමෙන් මේ මඟින් කුරුලෑ, කුණු, දූවිලි, තෙල් සහ මැරුණු සම ඉවත් කර ගැනීමේ හැකියාව ලැබෙන අතර ඒ වගේම බැක්ටීරියා වැනි තත්ත්වයන් නිසා සිරුරේ ඇති වන බිබිළි, විවිධ ආසාදන සුව කර ගැනීමටත් සමට දීප්තිමත් පෙනුමක් ලබා ගැනීම සඳහාත් ඔබට මෙය උදවු උපකාර වනු ඇත.
අවපැහැ දෑත්, කළු දෙතොල් දීප්තිමත් කරන දෙහි ස්ක්‍රබ් එක දෙහි ලෙල්ල අරගෙන එයට සීනි ටිකක් ඉස එයින් ඔබේ දෙතොල් හොඳින් සක්‍රබ් කරන්න. මෙමඟින් ඔබේ තොල් වල මැරුණු සම ඉවත් කර තොල් රෝස පැහැ ගන්වනවා. සිනි වෙනුවට ඔයාට පිරිසුදු මි පැණි භාවිතා කල හැකිය.
දෙහි බෑයක යුෂ හෝ බිලිං ඉස්ම වලින් අත් හොඳින් සම්බාහනය කිරීමෙන්ද අවපැහැ ගැන්වී දෑත් පැහැපත් කරගැනීමේ හැකියාව ලැබෙනු ඇත.
වියළි හිසකෙස් සරු කරන පල්ප් එක
දෙහි යුෂ හා පොල් තෙල් හොඳින් මිශ්‍රකර හිසේ ගල්වා විනාඩි 20 ක් තබා සෝදා හැරීමෙන් හිසකෙස් සිනිඳු තත්ත්වයට පත්කර ගත හැකි අතර දෙහි යුෂ , අලිගැට පේර , මීපැණි එකතු කර මිශ්‍රණයක් සේ සාදා හිසේ ගැල්වීමෙන් හිසකෙස්වල වියළිබව නැති කර ගැනීමට ඉතාම හොඳ ප්‍රතිකර්මයක් වේ. එමෙන්ම සතියකට දෙතුන් වරක් දෙහි ලෙල්ලක් හිස් කබලේ සෙමින් අැතිල්ලීමෙන් හිස්හොරි තත්ත්වයන්ට විසඳුමක් ලබාගත හැකිවනු ඇති අතර හිස කෙස් වර්ධනයටත්, හිස කෙස් වල දීප්තිමත් බවටත් එය උදව් වනවා නිසැකය.
දෙහි යුෂ වලින් කුරූලෑ වලට සත්කාර
- දෙහි + මීපැණි + බිත්තර
- දෙහි යුෂ තේ හැඳි 4ක්
- මී පැණි තේ හැඳි 4ක්
- බිත්තර 1ක සුදු මදය
වීදුරු භාජනයක් ගෙන මෙම ද්‍රව්‍ය හොඳින් මිශ්‍ර කරගන්න. ක්‍රීම් ලෙස එනතෙක් මිශ්‍ර කර මුහුණේ උඩු අතට අාලේප කර ගත යුතුය. ආලේපනය විනාඩි 20ක් වගේ තබා ළා උණු වතුරෙන් සෝදා හැරිය යුතු වන අතර මෙය මාසයක් පමණ දවසක් ඇර දවසක් සිදු කිරිමෙන් කුරුලෑ අවම කර ගත හැකියි.
උපුටා ගැනීම සිරිකත
