නාන වෙලාවට මේ දේවල් වැරැදිලාවත් කරන්න එපා

ස්නානය කිරීම උපන් මොහොතේ සිට මේ වන තෙක් අපි දිනපතාම සිදුකරන දෙයක්. දෛනික ජීවිතය තුළ අත්‍යවශ්‍ය කාරණයක් වන ස්නානය කිරීම බහුතරයක් දෙනා පුරුද්දක් විධියට කරන දෙයක්, එසේ නොමැතිව සැලකිල්ලෙන්, අවධානයෙන් ස්නානය කරන අය ඉතාමත් අල්පයි.  නමුත් අපි බොහෝ දෙනා නොදන්නා කාරණයක් තමයි අපි පුරුද්දක් විධියට  දෛනිකව කරන ස්නානය අතරේදී කරන ඇතැම්  දේවල් අපේ සමේ, ශරීරයේ වගේම සමස්තය සෞඛ්‍ය තත්ත්වයටම අහිතකර ලෙස බලපාන්න පුළුවන් බව. එහෙම නම් අපි අද බලමු අපිට නරක විධියට බලපාන, අපි ස්නානය කරද්දි කරන වැරදි කිහිපයක් පිළිබඳව.

ඔබත් තද උණුසුම් ජලයෙන් ස්නානය කරනවාද?

තරමක් තද උණුසුම් ජලයෙන් ස්නානය කිරීම සනීපවත් හැඟීමක් සිතට ගෙනදීමට සමත් වුවද එය සමට හිතකර නොවේ.  තද උණුසුම් ජලය හේතුවෙන් සමේ සිදුරු වැඩි වශයෙන් විවෘත වේ. එය සමේ ඇති  ස්වාභාවික තෙල් සමෙන්  ඉවත්වන හේතුවක් වන අතර ඊට අමතරව ඒ හේතුවෙන්  සම ඉතා ඉක්මනින් වියළීමට ලක්වේ. මේ පිළිබඳව දක්වමින් සම පිළිබඳව විශේෂඥ වෛද්‍යවරු දක්වන්නේ තද උණුසුම් ජලයෙන් ස්නානය කරනවාට වඩා තරමක් ඇල්මැරුණු ළා උණුසුමක් සහිත ජලයෙන් ස්නානය කිරීම වඩාත් හොඳ බවයි.

දිනකට කිහිපවරක් ස්නානය කරනවද ?

විශේෂයෙන්ම ශ්‍රී ලංකාව වැනි ඝර්ම කලාපීය රටවල පුද්ගලයන් අධික උණුසුම නිසාම දිනකට දෙවතාවක් පමණ ස්නානය කිරීමට පුරුදු වී සිටියි. නමුත් දිනකට කිහිප වරක් ස්නානය කිරීම තුළින්ද සම වියළීමට ලක්වීමේ හැකියාවක් තිබේ. එමෙන්ම ඒ හේතුවෙන් සමේ ස්වාභාවික තෙල්ද ඉවත්වීම සිදුවේ. මෙහිදී චර්මය සම්බන්ධ විශේෂඥයන් කියා සිටින්නේ නිරන්තරයෙන් දහඩිය නොදමන දුහුවිලිවලට නිරාවරණය වන කෙනකු නොවේ නම් සතියකට දින කිහිපයක් පමණක් ස්නානය කිරීම වඩාත් සුදුසු බවයි. එමෙන්ම යම් හෙයකින් දිනපතා ස්නානය කිරීමට පුරුදු වී සිටින අයෙක්  සිටී නම් එහිදී ස්නානය සඳහා ගත කරන කාලය ක්‍රමයෙන් අඩු කිරීම හරහා ජලයට නිරාවරණය වන කාලය අඩු කළ හැකි බවද ඔවුන් කියා සිටියි.

අතට අහුවන ඕනෑම දෙයක් ඇඟේ ගානවද?

බොහෝ පුද්ගලයන් පුරුදු වී සිටින්නේ ස්නානයේදී අතට හසුවන ඕනෑම සබන් වර්ගයක් හෝ ෆැම්පු වර්ගයක් භාවිත කිරීමටයි. නමුත් මෙය ඇතැම්විට ඔබේ සමට ගැටලුකාරී තත්ත්වයන් ඇති කිරීමට හේතුවක් විය හැකිය. එහිදී තම සම පිළිබඳව, සමේ මෙන්ම හිසකෙස්වල ස්වභාවය පිළිබඳව හොඳින් අවබෝධ කොට ගෙන තම සමට හා ශරී‍රයට ගැළපෙන සංඝටක අඩංගු නිෂ්පාදන භාවිත කිරීමට සැලකිලිමත් විය යුතු වේ.

ෆිල්ටර් නොකරපු වතුරද නාන්නේ ?

නාන වතුර ෆිල්ටර් කිරීම පිළිබඳව සාකච්ඡා කිරීමේදී ඇතැම් විට එය අනවශ්‍ය සුඛෝපභෝගී දෙයක් ලෙස හැඟුණත් අප ජීවත්වන පරිසරයේ වතුරවල ස්වභාවය අනුව වතුර ෆිල්ටර් කර ස්නානය සඳහා භාවිත කළ යුතු අවස්ථාද තිබේ. සමට අහිතකර ප්‍රමාණයකින් මැග්නීසියම්, කැල්සියම් වැනි සංඝටක අඩංගු ජලයෙන් දිනපතා ස්නානය කළහොත් එය සමේ මෙන්ම හිසකෙස්වල නිරෝගී භාවයටද බාධා පමුණුවයි. එබැවින් ජලයේ අඩංගු සංඝටක හා එහි ඵ් අගය පිළිබඳව සැලකිලිමත් වී වැදගත් වේ.

නාන කමරයේ තැනින් තැන බඩු තබනවාද?

බොහෝ දෙනා ස්නානය කරන විට සම පිරිසුදු කර ගැනීම සඳහා භාවිත කරන ලූෆා වැනි දේ නාන කාමරය තුළම කරාමය අසල එල්ලා තැබීමට කටයුතු කරයි. නමුත් මෙය එතරම් නුවණැති ක්‍රියාවක් නොවේ. නාන කාමරය යනු විවිධාකාර බැක්ටීරියා හා විසබීජවලට උල්පතක් වන බැවින් එහිදී වඩාත් සුදුසු වන්නේ ඒවා පිරිසුදු වියළි ස්ථානයක  නිසි පරිදි ගබඩා කර තැබීමයි.

උපුටා ගැනීම මව්බිම