පිත කෝපවන අයගේ දහදිය දුර්ගන්ධය වැඩියි
දහදිය දැමීම ස්වභාවිකය. එහෙත් අසාමාන්‍ය ලෙස දහදිය දැමීම හා එම දහදියෙන් දුර්ගන්ධයක් හමයි නම් ඔබ සැබැවින්ම මානසිකව ඇද වැටෙනු ඇත. මෙවැන්නක් හැඩට වැඩට පිරිසුදුවට, පිළිවෙළට සිටින්නට කැමැති යුවතියකට, කාන්තාවට නම් තදබල ගැටලුවකි. දුර්ගන්ධයෙන් යුතු දහදිය දමන්නියක සැමියාගේ ප්‍රසාදයට නම් ලක් නොවනු ඇත. ලංකාවේ ජීවත්වන අපට හිරුගේ බලපෑම දැඩිව දැනෙන නිසා අධිකව දහදිය දමයි. දහදිය දැමීමට උපකාරවෙන ග්‍රන්ථි මුළු සිරුර පුරාම පවතින අතර ඉකිලි, කිහිලි හා අල්ල, යටි පතුල් යන ප්‍රදේශවලට වැඩිපුර පිහිටා ඇත. එබැවින් එම ප්‍රදේශවලට අධිකව දහදිය දමයි. දහදිය සමඟ පිටවෙන්නේ ශරීරයේ ඇති අපද්‍රව්‍යයි. ඔබත් දහදිය දැමීම නිසා අසහනකාරී අත්දැකීම් විඳින්නේ නම් දේශීය වෛද්‍ය ප්‍රතිකාර සෙවණැල්ලක් මෙන් ඔබ පසුපසම රැදෙනු ඇත.
ආයුර්වේද වෛද්‍ය විද්‍යාවට අනුව පිත කෝපවීමෙන් හටගන්නා රෝග අතරින් රෝග තුනක් දහදිය හා සම්බන්ධ වේ. ඒ අතුරින් උෂ්ණාධික යන රෝගය නිසා ශාරීරික උෂ්ණත්වය වැඩි වී නිතර දහදිය පිටවේ. අති ශ්වේදා තවත් රෝගී තත්ත්වයකි. මෙහිදී දහදිය අධික ප්‍රමාණයක් ස්වභාවික ලෙස පිටවේ. ශ්වේත ගන්දතා රෝග තත්ත්වය නිසා දහදිය දුගඳින් යුක්ත වේ. පිත් රෝගයන්ට අමතරව අධික තරබාරුබව ද දහදිය දුගඳට හේතු වේ. ඊටත් අමතරව මලබද්ධය, ඔසප්වීම ද දහදිය දුඟඳට හේතුවේ. එබැවින් ඔසප් පවතින දිනවලදී යුවතියක්, කාන්තාවක් අන් දිනවලට වඩා පවිත්‍රව සිටීම පිළිබඳ සැලකිලිමත් විය යුතුය. දහදිය දුගඳින් බේරී සිටීමට වර්තමානයේ තරුණ තරුණියන් ඩියෝඩ්රන්ට් නමැති දුගඳ නසන ආලේපය වෙත හුරු වී සිටියි. නැතිවම බැරි ආලේපයක් බවට පත්ව තිඛෙන ඩියෝඩ්රන්ට් මඟින් තාවකාලිකව දහදිය දුගඳ දුරුකර සිරුර සුවඳවත් කරයි. ඉන් නික්මෙන සුවඳට වහ වැටෙන ඔබ හොර රහසේම අහිතකර රසායනික ද්‍රව්‍ය රාශියක් සිරුරට ඇතුළු කරගනියි. එහෙත් ආයුර්වේද රූපලාවණ්‍ය ප්‍රතිකාර ඔස්සේ දහදිය දුගඳින් මිදෙන්නට ඔබ උනන්දු විය යුත්තේ එය සිරුරට අහිතකර නොවන නිසායි. මුළු සිරුර පුරාම දහදිය දුගඳ නසන ආලේපන ගැල්වීම ඩියෝඩ්රන්ට් පැක් නම් වේ. දහදිය දුගඳ නැසීමට උපකාරීවන ඖෂධ ඊට යොදනු ලැබේ. මේ එවන් ආලේපන වර්ග කිහිපයකි.
- අරළු කුඩු, ලොත් සුඹුල් කුඩු, කොහොඹ කොළ කුඩු, සුදු හඳුන් කුඩු, දෙළුම් පොතු කුඩු යන සියල්ල සමව ගෙන ජලය සමඟ මිශ්‍රකර නෑමට පැයකට පෙර ආලේපය.
- අරළු කුඩු, ඛෙලි කොළ කුඩු, සැවැන්දරා මුල් කුඩු, නෙල්ලි කුඩු, සාදික්කා කුඩු, නාමල් රේණු සමව ගෙන ජලය සමඟ මිශ්‍රකර නෑමට පැයකට පෙර ආලේපය.
- ලොත් සුඹුල් කුඩු, වැල්මී කුඩු සියල්ල සමව ගෙන ජලය සමඟ මිශ්‍රකර නෑමට පැයකට පෙර ආලේපය.
- සුදු හඳුන් කුඩු, සැවැන්දරා මුල් කුඩු, අගිල් කුඩු, නාමල් රේණු, සියල්ල සමව ගෙන ජලය සමඟ මිශ්‍රකර නෑමට පැයකට පෙර ආලේපය.
- දෙළුම් පොතු කුඩු, වැල්මී කුඩු, ලොත්සුඹුල් කුඩු, නාමල් රේණු සමානව ගෙන ඒ බරට කොහොඹ කොළ කුඩු රැගෙන ජලය සමඟ මිශ්‍රකර නෑමට පැයකට පෙර ආලේපය.
- කහකුඩු, වෙනිවැල්ගැට කුඩු, ඊතණ කුඩු, සුවඳ කොට්ටං කුඩු, ගොරෝචන කුඩු සියල්ල සමව ගෙන ජලය සමඟ මිශ්‍රකර නෑමට පැයකට පෙර ආලේපය.
- එනසාල් කුඩු, ඉඟුරු පියලි කුඩු, කුරුඳු පොතු කුඩු, සුදු හඳුන් කුඩු සියල්ල සමව ගෙන ජලය සමඟ මිශ්‍රකර නෑමට පැයකට පෙර ආලේපය.
ආයුර්වේද සල්වලින් හා නිවෙසේදීම සොයා ගත හැකි අමුද්‍රව්‍යවලින් කළ හැකි මෙම සරල ප්‍රතිකාර දහදිය දුගඳ නිසා පීඩා විඳින ඔබට දිව ඔසුවක් වනු ඇත.
උපදෙස් - ආචාර්ය, වෛද්‍ය භූෂන් මහේෂ් අතුරලිය ගෙනිඋපුටා ගැනීම රැජිණ පුවත්පත
