පොල් තෙල් ගාලා එක රැයෙන් ලස්සන වෙමු

පොල් තෙල් කියන්නේ ආහාර පිසීම සඳහා මෙන්ම රූපලාවණ්‍ය කටයුතු සඳහාත් බහුලම භාවිත කරන ඉතාම ජනප්‍රිය රසවත් තෙල් වර්ගයක්. ආහාර රස ගන්වන අතරම සිරුරේ ඇති විවිධ රූපලාවන්‍ය ගැටලු සඳහාත් ඉතා හොඳ විසඳුමක් වන පොල් තෙල්වල විටමින් E, A, D, K මේදය වැනි පෝෂණ සංඝටක රාශියක්ම අඩංගු වේ.

සම, හිසකෙස්, නිය, දත් ඇතුළු සියලුම අංශවල ඇති වන ගැටලුවලට ඉක්මන් විසඳුම් ලබා දෙන පිරිසුදු නැවුම් පොල් තෙල්වලින් රාත්‍රියේදී කරගත හැකි සත්කාර කිහිපයක් පහතින් කියවා බලමු.

වියළි හිසකෙස් සඳහා :

උණුසුම් පොල් තෙල් (මඳ වේලාවක් ළිප තබා රත්කරගත්) ස්වල්පයක් ඔබගේ හිසෙහි ගල්වා ඇඟිලි තුඩුවලින් හොඳින් සම්බාහනය කරන්න. එමෙන්ම රාත්‍රි නින්දට යෑමට පෙර නැවුම් පොල් තෙල් හිස ගල්වා පසුදා උදෑසනට සුදුසු ෂැම්පු වර්ගයක් යොදා සෝදා හරින්න.

හිසේ කැක්කුමට :

කලින් රත් කරගත් තේ ගසින් ලබාගත් තෙල්වලින් (Tea Tree Oil) බින්දු කිහිපයක් පොල් තෙල් සමඟ මිශ්‍ර කොට හිස් කබලේ ආලේප කොට හොඳින් සම්බාහනය කරන්න.

හිස කෙස් වැවීමට :

මහදුරු තැම්බූ ජලය ස්වල්පයක් සමඟ නැවුම් පොල් තෙල් මිශ්‍ර කොට හිස් කබලේ සහ හිසකෙස්වල ආලේප කොට හොඳින් සම්බාහනය කරන්න.

කුරුලෑ ආසාදනයන්ට :

පොල් තෙල්වලට තේ ගසෙන් ලබාගත් තෙල් බින්දු කිහිපයක් එකතු කොට හොඳින් මිශ්‍ර කරන්න. එය මුහුණේ ආලේප කරන්න. රාත්‍රි කාලයට භාවිත කොට උදෑසනට සෝදා ඉවත් කරන්න.

යටි පතුල් පැලීම ඇතුළුව ගැටලු සඳහා :

රාත්‍රි කාලයට පාදවල ඉහළ සිට පහළට (යටිපතුල් දක්වාම) සම්පූර්ණයෙන්ම පිරිසුදු නැවුම් පොල්තෙල් ආලේප කරන්න. උදෑසනට සෝදා ඉවත් කරන්න.

මුඛයේ හට ගන්නා තුවාලවලට :

මුඛයේ ඇතිවන තුවාල ආදිය සඳහා තුවාල මතුපිට රාත්‍රි නින්දට යෑමට පෙර පිරිසුදු නැවුම් පොල් තෙල් මුඛයේ ආලේප කරන්න.

සෞඛ්‍ය සම්පන්න නිරෝගී දත් දෙපළකට :

දත් මැදීමෙන් පසු රාත්‍රියේදී ඔබගේ විදුරුමස් මත කාබනික පොල් තෙල් ස්වල්පයක් ආලේප කරන්න. මෙයින් දන්ත සෞඛ්‍ය ආරක්ෂා කරගත හැකිය.

උපුටා ගැනීම මව්බිම