බඩට පටි බැන්ද පළියට බඩේ තෙල් දහනය කරන්න පුළුවන්ද?
මෙවර අප නවලිය තුළින් කතා කරන්න බලාපොරොත්තු වන්නේ ඔබට ඉතාම වැදගත් මාතෘකාවක් පිළිබදවයි. එනම් මේ දිනවල අන්තර්ජාලය හරහා බහුතරයක් හදුනාගත් උදර ප්‍රදේශයේ මේදය අඩු කරගැනීමට භාවිත කරන පටියක් පිළිබදවයි. ඇත්ත වශයෙන්ම මෙම පටිය වසර ගණනාවක් පුරා ශ්‍රී ලාංකික වෙළෙදපොළ තුළ මිලදී ගැනීමට තිබුණු බව නොරහසකි. විශේෂයෙන්ම අද වන විට මහත් ගැටලූුවක්ව පවතින උදර ප්‍රදේශයෙ මේදය අඩු කර ගැනීම පිණිස යම්කිසි ආකාරයක විසදුමක් ලෙස මෙය මීට කලකට ඉහතදී වෙළෙදපොළට පැමිණි ඇත. එසේම මෙම උපකරණය අලෙවි වන්නේ ඉතා අධික මුදලකටය.
අප මුලින්ම සලකා බලමු කෙනෙකුගේ උදරය ඉදිරියට නෙරා ඒමට ප්‍රධාන වශයෙන් බලපාන්නේ මොන හේතු සාධකද කියා. ප්‍රධාන වශයෙන් පුද්ගලයෙකු මහත් වීමට බලපාන ප්‍රධාන කාරණය වන්නේ අප ශරීරය තුළට ඇතුල් කරගන්නා ශක්තියට වඩා අඩුවෙන් අප ශක්තිය වැය කළහොත්ය. එවිට අප ශරීරය තුළ අමතර ශක්ති ප්‍රමාණයක් ඉතිරි වේ. මෙසේ අප සිරුරට ශක්තිය ලබාගන්නේ අප ගන්න අහාර වලිනි. අප ශක්තිය වැය කරනු ලබන්නේ අපගේ එදිනෙදා සිදු කරන ක්‍රියාකාරකම් හරහාය. එසේත් නැතිනම් ව්‍යායාම තුළිනි. කෙනෙක් වැඩිපුර ආහාර ගෙන අඩුවෙන් ශක්තිය වැය කරොත් එම පුද්ගලයාගේ සිරුර මහත් වීමට බොහෝවිට ඉඩ ඇත. මෙම අමතර ශක්තිය තැන්පත් වන්නේ මේදය වශයෙනි. මෙම මේදය අපගේ සිරුරේ විවිධ ස්ථානවල තැන පත් වේ. ප්‍රධාන වශයෙන් සමට යටින් හෙවත් මේදය ලෙසත් අධිකව මේදය තැන්පත්වීම නිසා මෙම සමට යටින් පවතින මේදයට අමතරව අපගේ අභ්‍යන්තර අවයව වටා (Visceral fat) ලෙසද තැන්පත් වනු ඇත. මේ ආකාරයට කෙනෙකුගෙ විශේෂයෙන් උදරය අවට, තට්ටම් ප්‍රදේශය අවට, කලව ආශ්‍රිතව, පපුව හා මුහුණ වැනි ප්‍රදේශ වල මෙම අමතර මේදය තැන්පත් වීමේ වැඩි ප්‍රවනතාවයක් පවතී.
අපගේ ශරීරයේ මේ ආකාරයට තැන්පත් මේදය කිසියම් ඉලක්කගත ප්‍රදේශයකින් ඉවත් කිරීමට අප කියන්නේ Sport reduction කියාය. උදාහරණ වශයෙන් උදර ප්‍රදේශය ඉලක්ක කර එම ප්‍රදේශයේ මේදය අඩු කිරීම. නමුත් ව්‍යායාමයකින් හෝ කිසියම් ඛෙහෙතකින් හෝ මෙ ආකාරයට සිරුරේ එක තැනක් ඉලක්ක කර මේදය අඩු කිරීමේ හැකියාවක් නොමැත.
අප දැන් මෙම උදරය වටා පළදින පටිය පිළිබදව සැලකුවොත් එම පටිය අලෙවි කරන ආයතන විසින් පවසන පරිදි මෙම පටිය මගින් උදර ප්‍රදේශයේ උණුසුම වැඩි කර වැඩිපුර දහදිය දැමීමට සැලැස්වීම මගින් එම ප්‍රදේශයේ මේදය අඩු කරනු ලබන බවය. නමුත් අප විද්‍යාත්මකව සැලකුවහොත් අපගේ ශරීර උෂ්ණත්වය වැඩි වූ පමණින්, අප කිසියම් කාර්ය ප්‍රමාණයක් නොකර සිටිමින් අපගේ සිරුරේ මේදය අඩු වීමක් සිදු විය නොහැක. එසේ වනවානම් අප අව්වේ ටික වෙලාවක් සිටියහොත් අපගේ ශරීරය උණුසුම් වීම නිසා සහ දහදිය දැමීම නිසා මේදය දහනය විය යුතුය. එසේම උණුසුම් රට වල ජීවත් වන මිනිසුන් ශීත රටවල ජීවත්වන මිනිසුන්ට වඩා සරීරයෙන් සිහින් විය යුතුය. මෙය සිදුවිය නොහැක්කකි.
ඇත්ත වශයෙන්ම අපගේ සිරුරේ මේදය දහනය වීමට නම් අප යම් කිසි ආකාරයකට මුලින් සදහන් කරාක් මෙන් ශක්ති වෙනසක් පවත්වාගෙන යායුතුය. එය එක්කෝ අප ශරීරයට ඇතුල් කරගන්න ශක්තිය හෙවත් ආහාර ප්‍රමාණය අවම කළ යුතු අතර එසේත් නොමැති නම් අප වැය කරන ශක්ති ප්‍රමාණය වැඩි කල යුතුය. මේ දෙකම එක විට කළහොත් ඉතා ඉක්මනින්ම මේදය අඩු කරගැනීමට හැකියාවක් පවතී.
එබැවින් ඔබ කරන අහර පාලනය හා ව්‍යයාම වැනි කිසිදු ආකාරයකින් නැවත්වීමට පියවර නොගන්න. අප බොහෝ විට මෙම උපකරණ වැනි කෙටි සහ ලෙහෙසි දේට පෙළඹෙන්නේ අපගෙ ඇති උදාසීන කම්මැලි ගතිය නිසාවෙනි. ඇත්ත වශයෙන්ම ඔබ ව්‍යායාම කරනවානම් සහ නිසි පරිදි අහර පාලනය කරනවානම් ඔබගේ සිරුරේ බර සහ උදර ප්‍රදේශය අඩු වනවා පමණක් නොව, ඊටත් එහා ගිය සෞඛ්‍යමය ප්‍රතිලාබ ගණනාවක්ම ඔබට හිමි කර ගැනීමට අවකාශය ඇති බව කිව යුතුය.
වෛද්‍ය කාවින්ද විෙජ්සිංහඅංශ භාර - ක්‍රීඩා වෛද්‍ය ඒකකයදිස්ත්‍රික් මහ රෝහල, ගම්පහ
උපුටා ගැනීම නවලිය
