හිසකෙස්‌ සුදු වෙන්නට පෙර ඒ ගැන සැලකිලිමත් වෙන්න
ස්‌වභාවිකව ලැබුණු කෙස්‌ කළඹ ආරක්‍ෂා කරගැනීමට අප සැවොම උනන්දු විය යුතුයි. බොහෝ දෙනෙකුට ඇති ප්‍රශ්නයක්‌ වන්නේ කෙස්‌ කළඹ අකලට සුදුවීමයි. බොහෝ විට කාන්තාවන් තම කෙස්‌ කළඹට සාත්තුවක්‌ කරගැනීම කෙරෙහි අවධානය යොමු කරන්නේ කෙස්‌ ගස්‌ යම් තරමකට සුදු වූවාට පසුවයි.
කෙස්‌ ගස සුදුවූවාට පසු නැවත තිබූ තත්aත්වයට පත්කර ගැනීමට කොපමණ සත්කාර කළත් හැකිවන්නේ නෑ. කෙස්‌ කළඹ කොතරම් නිරෝගී වුවත් මසකට දෙවරක්‌ කොණ්‌ඩයට තෙල් සාත්තුවක්‌ හා කන්ඩිෂනර් සත්කාරයක්‌ කරන්නේ නම් අකලට කෙස්‌ පැසීම බොහෝ දුරට වළක්‌වාගන්නට පුළුවන්. වයසට යාමත් සමඟ කොණ්‌ඩය සුදුවීම ස්‌වභාවික තත්ත්වයක්‌. නමුත් කොණ්‌ඩයට යම් සාත්තුවක්‌ කරන්නට සෑම කාන්තාවක්‌ම පුරුදුවී ඇතිනම් හිසකෙස්‌ අකලට සුදුවීම වලක්‌වා ගත හැකියි. කෙස්‌ සුදුවූ පසු නැවත කළු කරගැනීමට කළ හැකි එකම පිළියම කොණ්‌ඩය වර්ණ ගැන්වීම පමණයි. එහිදී සිදුවන්නේ හිසකෙස්‌ මත ආලේප කරන වර්ණය කෙස්‌ගස තුළට ඇතුළුවීමයි. මෙය කොටස්‌ තුනකින් හැඳින්විය හැකිය.
- තාවකාලික වර්ණ ගැන්වීම
- කාලීන වර්ණ ගැන්වීම
- ස්‌ථිර වර්ණ ගැන්වීම
මෙහිදී තාවකාලික වර්ණ ගැන්වීම ලෙස හඳුන්වන්නේ හෙනා මගින් හිසකෙස්‌ කළු කිරීමයි. ඒ සඳහා අවශ්‍ය වන්නේ ස්‌වභාවික හෙනා ශාකය වේලා කුඩුකරගත් කුඩුයි. මෙය කිසිවිටකත් හෙනා ඩයි නොවිය යුතුයි. ඖෂධීය ද්‍රව්‍ය අලෙවි කරන වෙළෙඳ සැලකින් ස්‌වභාවික හෙනා ලබාගත හැකිය.
හෙනා සත්කාරයට අවශ්‍ය වන්නේ ස්‌වභාවික හෙනා කුඩු, තේ කොළ, කෝපි කුඩු, බීට්‌රූට්‌. ස්‌වභාවික හෙනා කුඩුවලට තේ කොළවලින් තදට සාදාගත් තේ කහට, තදට සාදාගත් කෝපි කහට එකතු කරන්න. බීට්‌රූට්‌ තම්බා හොඳින් පොඩිකර එම යුෂය ද ඉහත මිශ්‍රණයට එකතු කරගන්න. ස්‌වභාවික හෙනා දුඹුරු පාටයි. ඒ නිසා එය තද පැහැයකට හරවා ගැනීමට තේ, කෝපි කහට හා බීට්‌රූට්‌ එකතු කළ යුතුයි. සතියකට වරක්‌ ඉහත මිශ්‍රණය හිසකෙස්‌වල ආලේප කර පැය දෙක තුනක්‌ තිබෙන්නට හැර සෝදා ඉවත් කරන්න. මේ සඳහා බ්ලැක්‌ හෙනා පාවිච්චි කිරීම මඟින් ස්‌වභාවික වර්ණ ගන්වා ගැනීමක්‌ සිදුනොවේ. හෙනා කළු පැහැති වීමට රසායන ද්‍රව්‍ය එකතු කර ඇත. හෙනා පළමු වරට ආලේපයේදී එකවර වෙනසක්‌ බලාපොරොත්තු විය නොහැක. නමුත් දෙවන තුන්වන වාරවලදී ප්‍රතිඵල ලැබිය හැකියි.
උපුටා ගැනීම නවලිය
