100% ක්ම ස්වාභාවික දේවල් යොදාගෙන ගෙදරදීම ෆේෂල් සත්කාරයක් කර ගනිමු
රුව ලස්සන කර ගැනීම සදහා අප සියලු දෙනා වැඩි සැලකිල්ලක් දක්වනවා. නමුත් කාර්යබහුල බව නිසා බොහෝ විට රුපලාවන්‍යගාරයක් වෙත යෑම ඔබට අපහසු කාර්යයක් විය හැකිය. එම නිසා නිවසේදීම ෆේෂල් එකක් කර ගැනීමට දැන සිටීම විශේෂ කාරණයක්. ස්වාභාවික අමුද්‍රව්‍ය භාවිත කරමින් ෆේෂල් සත්කාරයක් නිවැරදිව කර ගන්නා ආකාරයයි අද අපි ඔබට කියා දෙන්නේ. නිවසේදී ෆේෂල් එකක් කර ගැනීමේදී අනුගමනය කල යුතු පියවරයන් කිහිපයක් තිබේ. එම නිසා පියවරෙන් පියවර ෆේෂල් සත්කාරය කර ගන්නා ආකාරය දැන් අපි බලමු.
පළමුව වතුර ස්වල්පයකට සීනි මේස හැදි 1ක් දමා එයට රෝස මල් පෙති එක්කර දවසක් හෝ දවස් දෙකක් තබා රෝස වතුර සාදා ගන්න. එයින් මුහුණ හොදින් සෝදා ගන්න. එය ඉතා හොද ස්වාභාවික ෆේස් වොෂ් එකකි.
දෙවනුව ක්ලේන්සර් එක සාදා ගැනීම සදහා පිපිඤ්ඤා යුෂ ස්වල්පයකට දෙහි බින්දු කිහිපයක් එක කර ගන්න. ක්ලේන්සර් එක විනාඩි 05 - 10 ක් පමණ කාලයක් කල යුතුය. ඉන්පසුව මුහුණ ස්ටීම් කල යුතු අතර ඒ සදහා මද උණුසුම් තුවායකින් මුහුණ හොදින් සම්භාහනය කරන්න. එමගින් මුහුණේ ඇති white heads, black heads සියල්ල ඉවත් වීමක් සිදු වේ.
ඊළග පියවර ලෙස මුහුණ ස්ක්‍රබ් කල යුතුය. සාමාන්‍ය හා වියලි සමක් සදහා වෙනිවැල් ගැට කුඩු තේ හැදී 1ක්, කැකුළු හාල් පිටි ස්වල්පයක් හා මී පැණි මිශ්‍ර කර සක්‍රබ් එක සාදා ගත හැකිය. අධික තෙල් සහිත සමක් නම් සුදු හඳුන් කුඩු තේ හැදි 1/2ක්, දෙහි බින්දු කිහිපයක් සමග මිශ්‍ර කර ස්ක්‍රබ් එකක් සාදා ගත හැකිය. එය විනාඩි 10 - 15ක් පමණ තබා සාමාන්‍ය ජලයෙන් සෝදා ඉවත් කරන්න.
මුහුණට මසාජ් ජෙල් එකක් ගැල්වීමද වැදගත් අංගයක්. ඒ සඳහා කෝමාරිකා යොදය තේ හැදි 1ක් පමණ මුහුණේ ගල්වා හොදින් මසාජ් කරන්න.
ඉන්පසුව පැක් එක ගැලවිය යුතුය. වියළි සමක් නම් අලිගැට පේර ගෙඩි භාගයකට කිරි යොදය මිශ්‍ර කර සාදා ගන්න. තෙල් සහිත සමක් සදහා සුදුහඳුන් කුඩු, කොකුම් පොතු කුඩු, දෙහි ඇඹුල් තේ හැදි 1ක් එක්කර සාදා ගන්න. එලෙස සාදා ගත් පැක් වර්ගය මුහුණේ ආලේප කිරීමේදී රෝස වතුරෙන් පෙගවූ පුළුන් කැබැල්ලක් ආධාරයෙන් මුහුණේ උඩු අතට ගලවන්න. විනාඩි විස්සකින් පමණ පසුව සම මත ඝන වී ඇති පැක් එක සාමාන්‍ය වතුර හෝ සීතල වතුරෙන් තෙත මාත්තු කරමින් මුහුණේ උඩු අතට පිරිමදිමින් ඉවත් කර ගන්න.
යම් අසාත්මිකතාවයක් ඇති විය හැකි බැවින් මෙලෙස ෆේෂල් සත්කාරය කර පැය 24ක් පමණ කාලයක් ගතවන තුරු කිසිම ආලේපන වර්ගයක් ගැල්වීමෙන් වළකින්න. මසකට දෙවරක් පමණ මෙවැනි ෆේෂල් සත්කාරයක් නිවසේදීම සිදු කර සැබෑ වෙනස ඔබත් අත් විදින්න.
උපුටා ගැනීම මවුබිම
