Fat එකෙන් fit වෙන්න
අධික තරබාරුව නැතිනම් ස්ථුලතාවය ලෙස හදුන්වන්නේ ශරිරයේ උසට සරිලන බරට වඩා බර වැඩිවීමයි. ස්ථුලතාවය ඇති වීමෙන් බෝ නොවන රෝග ඇති වීම, ශරීරය අවලස්සන වීම, දරුපල අහිමි වීම මෙන්ම සමාජයෙන් කොන්වීමක්ද ඇති වන්නට පුළුවන්‍. මේ වනවිට ඔබටත් ගැටලුවක් ව ඇති තරබාරුව නැතිනම් අධික ස්ථුලතාවය ඇතිවන්නේ මේදය හා කාබෝහයිඩ්‍රේට් අධික ලෙස අඩංගු ආහාර ශරීරයට ලබාගන්නා නිසා. වසර ගණනාවක් මෙවැනි ආහාර ගැනීම නිසා තැන්පත් වුනු මේද තට්ටු දහනය කරන්න ඒ තරම් ලේසි නෑ. නමුත් උත්සහය හා කැපවීම මත ඔබට ඔබේ හැඩැති නිරෝගි සිරුර යලිත් ලබා ගන්න පුලුවන්.
සෞඛ්‍ය සම්පන්න ආහාර රටාවකට පුරුදු
වෙන්න :
ඔබ ගන්නා ආහාර පිළිබද සැලකිලිමත් වීම තරබාරුවට වගේම ලෙඩරෝග වලටත් පිලියමක් වෙනවා. පාන්, පේස්ට්‍රි හෝ තිරිඟු පිටි වලින් සැකසූ ආහාර, ටින් කල ආහාර, තෙල් සහිත ආහාර මෙන්ම පැණිරස ගැනීම සම්පූර්ණයෙන්ම අතහැර ඒ වෙනුවට නැවුම් පළතුරු, එළවලු හා ධාන්‍ය ආහාරය ගැනීම සෞඛමත් ජීවිතයට මග කියන්නක්.
ජලය ජලය ජලය :
ජලය පානය ඔබේ තරබාරුකම මට්ටු කරන බව ඔබ දන්නවාද? දිනකට වතුර ලීටර් 2-3 අතර පානය කිරීම තරබාරුව අඩු කිරීමට සමත් වෙනවා වගේම සම පැහැපත් කිරීම‍ටත් ආහාරජීර්ණ ක්‍රියාවලියටත් උපකාර වෙනවා.
ග්‍රීන් ටී :
ප්‍රතිඔක්සිකාරක ගුණයෙන් යුක්ත ග්‍රීන් ටී තුනක්වත් දිනකට පානය කිරීම බර අඩුකරගැනීම පිටිවහලක් වෙනවා.
ආහාර වේල්
පහක් :
ඔව්. ශරීරයේ මහත අඩුකරගන්න තවත් ක්‍රමයක් තමයි කෙටි ආහාර වේල් 5ක් ලබා ගැනීම. මේ ආහාර වේල් සඳහා ලබා ගත යුත්තේ පලතුරු, රතුබත්, එළවලු, ධාන්‍ය හෝ රනිල බෝගයි.
ව්‍යායාම :
ඔබට තරබාරුකම අඩු කරගන්න අවශ්‍ය නම් කලයුතු හොදම පියවර ව්‍යායාම කිරීමයි. දිනකට පැයක්වත් ව්‍යායාම කිරීමෙන් ඉක්මන් ප්‍රතිපල ලබාගන්න පුලුවන්. දිවීම, වේගයෙන් ඇවිදීම, ස්කිපින් රෝප් පැනීම, ඇරොබ්ක් නර්ථනය, බයිසිකල් පැදීම වැනි කාඩියෝ ව්‍යායාම කිරීම ශාරීරික හා මානසික සුවතාවය ලබා දෙනවා. ඒ වගේම ආහාර ගැනීමේදී සෙමින් ආහාර ගන්න. කෑමට පෙර වතුර වීදුරුවක් බොන්න. එමගින් ඔබ ලබා ගන්නා ආහාර පුමාණය සීමාවෙනවා. ආහාර ස්වල්පයක් ලබා ගන්නවා වගේම අමතක කරන්න එපා කිසිම ආහාර වේලක් මඟහරින්න එපා. රාත්‍රී ආහාර හැකිතරමින් වේලාසන, සුලු ආහාරයක් ලබා ගන්න. ශරීරයේ ස්ථුලතාවය අඩු කරගන්න නොහැකි නෑ. නමුත් ඉවසීම හා මහන්සිය මත ඔබ හැමදාමත් ප්‍රාර්ථනා කල හැඩැති සිරුර ලබාගන්න පුලුවන්.
තිළිණි මීගහපල
