මේ අපූරු නෑමෙන් ලෙඩ බොහොමයක්ම සුවවේවි
අප හැමවිටම ප්‍රාර්ථනා කරන්නේ ජිවිතයේ නීරෝගිමත් බවයි. නීරෝගීමත් බව උදෙසා කළ හැකි සෑම දෙයක්ම කිරීමට අප පසුබට නොවන්නේ එම නිසාමයි. නිරෝගිමත් බව රැකගත හැකි ක්‍රම බොහෝමයක් ආයුර්වේදයේ දක්වා තිබෙනවා. ඒ අතරින් සිරුරට ඉතාමත් හිතකර ප්‍රතිකර්මයක් පිළිබඳයි අද අප ඔබ දැනුවත් කරන්නට සූදානම් වෙන්නේ. ජල ස්නානය අපේ දෛනික ජීවිතයේ එක් අංගයක්. ආයුර්වේදයේ මෙය දක්වා තිබෙන්නේ ප්‍රතිකර්මයක් සහ දිනචර්යාවක් ලෙසින්. ස්නානය තුළින් පවිත්‍ර වීම පමණක් නොව මාංසපේශී ලිහිල් වීම ඛනිජ ලවණ සමට ලැබීම, සම ආශ්‍රීත සිදුරු විවෘත වී විෂ පදාර්ථ බැහැර වීම, පටකවලට තෙතමනය ලබාදීම, තුවාල සුවවීම වේගවත් වීම සිදු වේ.
ඖෂධීය ජල ස්නානය යනු කුමක්ද?
මෙය අවුරුදු දස දහසකට පෙර යුගයේ සිට ආයුර්වේද වෛද්‍ය ක්‍රම තුළින් විටෙක ආගමික හා සංස්කෘතික අංගයක් ලෙසින් සිදුවූවක්. ලෝකය පුරාම සැහැල්ලු වීමේ ප්‍රතිකර්මයක් ලෙසින් රෝග සුව කිරීමේ ප්‍රතිකාරයක් ලෙසින් මෙය සිදු කරයි. මෙහිදී පුද්ගල ප්‍රකෘතිය සෞඛ්‍ය තත්ත්වය රෝගියකු නම් රෝගයේ ස්වභාවය සලකා බලා ඊට අදාළ වන ලෙස ඖෂධ පිරවූ ඔරුවක් තුළ බහාලනු ලැබේ. මෙහිදී මඳ උණුසුම් ජලය මෙන්ම ශීත ජලයත් යොදාගන්නා අවස්ථා තිබෙයි. ඖෂධීය ජල ස්නානයට පෙර උණුසුම් තෙල් සම්බාහනයක් හෝ උද්වර්තන ප්‍රතිකාර සිදු කරනු ලැබේ.
මෙම ප්‍රතිකාරවලින් ලැබෙන ප්‍රයෝජන මොනවාද?
යොදනු ලබන ඖෂධවල ඖෂධීය ගුණය නොඅඩුව ශරීරයට ලැබෙයි. මෙහිදී රුධිර සංසරණය උත්තේජනය වී සෛල තුළ විෂ පදාර්ථ බැහැර වීම ද සිදුවේ. සන්ධි රෝග, මස්පිඬු වේදනා. වෙහෙස ආදී අවස්ථාවලදී ශරීරය සුදුසු තෙලකින් සම්බාහනයකර ඉන්පසු වේදනා සමන ඔසු යෙදූ උණුසුම් ජලයේ ගිල්වීමෙන් ශරීර වේදනා සමනය වී සැහැල්ලුවක් ලබා දෙයි. එසේම මානසික ආතතිය වැනි තත්ත්වවල ඇරෝමා සම්බාහනවලින් පසු ඇරෝමා සහිත ජල ප්‍රතිකාරය ලබා ගැනීමෙන් මනස සැහැල්ලු කරගත හැකියි. මෙම උණුසුම් ජල ප්‍රතිකාර මඟින් ශරීරයේ මාංස පේශී ළිහිල්කර විඩාබව දුරු කරයි. සිරුරේ තෙල් ස්ථරය අඩු කිරීමට ඉතා සුදුසු ප්‍රතිකාරයකි. මෙහිදී ගැඹුරු තෙල් සම්බාහන ප්‍රතිකර්මයකින් පසුව හෝ උද්වර්තන (ස්ක්‍රබ්) ප්‍රතිකාරයකින් පසුව ජල ප්‍රතිකාරය ලබාදෙයි. මෙහිදී ජල තරංග සිරුරේ වැදීමට සලස්වා ජලය තුළ දී ද සම්බාහනය ලබාදෙයි. එයින් ශරීර බර අඩුවේ. ශරීර දාහය, චර්ම රෝග පවතින අවස්ථාවල දී සිසිල් ජල ප්‍රතිකාර සුදුසුයි. ශීත ගුණ යුක්ත ද්‍රව්‍ය යෙදූ සිසිල් ජලයේ ගිල්වා හිඳීමෙන් දාහය උණුසුම අඩු කරගත හැකියි. එසේම චර්ම රෝගවල දී ඖෂධ කුඩු හෝ තෙල් මඟින් සම්බාහනයකර ඖෂධ මඩ වර්ග, ලුණු වර්ග යොදා කරන ඇඟ ගැල්වුම් ප්‍රතිකාර සිදුකර ඉන්පසු ලුණු වර්ග මිශ්‍රිත ජලයේ හෝ ඖෂධ යෙදූ ජලයේ හොවා තැබීමෙන් දද, කුෂ්ඨ, පොතුකබර පිළිස්සුම් වැනි තත්ත්ව සුවකරගත හැකි වෙයි. එසේම ශරීරයේ වර්ණය වැඩිකර ගැනීමට ද මෙම ප්‍රතිකාරය ගුණදායකයි. එහිදී තෙල් සම්බාහන ස්ක්‍රබ් වැනි ප්‍රතිකාරවලින් පසුව කිරි, හරිත තේ, පලතුරු මිශ්‍රිත ඖෂධීය ජලයේ ගිල්වා තබයි. එයින් සමේ වර්ණය වැඩිකර ගැනීමේ හැකියාව පවතියි.
උපුටා ගැනීම තරුණි
