ඇහිබැම සකසන වැරැදි ක්‍රම නිසා ඇසට හානි
අයිබ්‍රෝස් ප්ලකිං, එහෙමත් නැත්නම් අයිබ්‍රෝස් හදනවා කියලා කියන්නේ අද ඕනෑම තරුණියක් අනිවාර්යයෙන්ම කරන දෙයක්. අපේ රටේ ඒ තරම් නැති වුණත් සමහර රටවල තරුණියන් පුරුද්දක් විදියට මුළු මුහුණම විතරක් නෙවෙයි මුළු සිරුරම ප්ලකිං කරනවා. හරි විදියට අයිබ්‍රෝස් හදන්නෙ නැති වුණාම කාලයක් යද්දි අයිබ්‍රෝස් වලට පහළින් සම එල්ලා වැටෙන්න පටන් ගන්නවා කියලා ඔබ දන්නෙ නැතිව ඇති.
ස්නායු හානි :
සාමාන්‍යයෙන් අයිබ්‍රෝස් ප්ලකිංවලට නූලක් හෝ ට්විසරයක් තමයි පාවිච්චි කරන්නේ. අයිබ්‍රෝස් කියලා කියන්නෙ ජීවිත කාලය පුරාම සිරුරේ පවතින කොටසක්. ඉතින් ඒ වගේ කොටසක් ක්‍රමානුකූලව සිරුරෙන් ඉවත් කරද්දී ඒ ගැන හොඳ අවධානයෙන් කරන්න ඕනෙ. මුහුණේ අයිබ්‍රෝස් තියෙන ප්‍රදේශයේ ස්නායු සහ නිල ස්ථාන කීපයක්ම තියෙනවා. ඒ නිසා අයිබ්‍රෝ ඉවත් කරද්දි ඒ ස්නායුවලට හානිවන විදිහේ තෙරපුමක් ඇති වෙන එක අවදානම් සහිතයි. අද කාලෙ ට්‍රෙන්ඩ් එකට අයිබ්‍රෝස් හදන අය මේ ගැන පුංචි හෝ අවබෝධයකින් එය කරන්නෙ නැති බව සමහර අයගෙ ඇහිබැම දැක්කම හොඳින්ම පෙනෙනවා.
වැරැදි ක්‍රම :
ඒ වගේම ගොඩක් සැලුන් වල නූල පාවිච්චි කරලා අයිබ්‍රෝස් ප්ලකිං කරන අය නූලේ එක කෙළවරක් කටින් හපාගන්නවා. ඒ වගේම තවත් සමහර අය ක්ලයන්ට් ටම කියනවා ඇස් වටේ සම දෙපැත්තට ඇදලා තද කරලා අල්ලගන්න කියලා. ඒ අවස්ථාවට ඔබ සියලු දෙනාමත් මුහුණදීලා තියෙන්න පුළුවන්. නමුත් ඒ ක්‍රම සියයට සියයක්ම වැරැදියි. ඒ වැඩෙන් සමට, ඇස්වලට විතරක් නෙවෙයි නිල ස්ථානවලට පවා දැඩි හානියක් ඇති වෙන්න පුළුවන්. ඉතින් මේ වගේ දේවල් දීර්ඝ කාලීනව කරද්දි ඇස් වටා තියෙන සම එල්ලා වැටීමේ ප්‍රවණතාවක් ඇති වෙනවා. අයිබ්‍රෝ එකක් හදන්න හරි විදියට නම් පැය භාගයක්වත් ගතවෙනවා. හදිස්සිය නිසා විනාඩියට දෙකට අයිබ්‍රෝස් හදන එකෙන් වෙන්නේ අවුරුදු 35-40 යනකොට ඇස් අවට පෙනුම වියපත් ස්වභාවයක් ගැනීමයි.
නිවැරැදි ක්‍රමය :
හරි විදියට අයිබ්‍රෝස් හදන අය කටින් නූල හපාගෙන අයිබ්‍රෝස් හදන්නෙ නැහැ. ඒ කියන්නෙ ඇඟිලිවලින් නූල පටලවගෙන එක ගහෙන් ගහට ගලවා ඉවත් කරන් එක තමයි නිවැරැදිම ක්‍රමය වෙන්නේ. මේ විදියට අයිබ්‍රෝස් වලට ලොකු තෙරපුමක් ඇති වෙන්නෙ නැහැ. මේ ගැන ක්ලයන්ට්ලා දැනුවත් වෙන්න ඕනෙ. ක්‍රමානුකූලව රූපලාවණ්‍ය උගන්වන ආයතනවල කටින් නූල අල්ලාගෙන අයිබ්‍රෝස් හදන්න උගන්වන්නෙ නැහැ. ඒ විතරක් නෙවෙයි "එන් වී කිව් ලෙවල් ෆෝ" විභාගයෙදි නූල කටින් හපාගෙන අයිබ්‍රෝස් හදන අයව සමත් කරන්නෙ පවා නැහැ. ඉතින් ඔබේ රූපලාවණ්‍ය ශිල්පියා හෝ ශිල්පිනිය හොඳ අවබෝධයක් සහ දැනුමක් ඇති කෙනෙක්ද කියලා අයිබ්‍රෝස් හදන විදියෙන්ම තීරණය කරන්න පුළුවන්.
තේ‍රඩින් සහ වැක්ස් :
අනිත් කාරණය තමයි ඔබ අයිබ්‍රෝස් හදන්න සැලුන් එකේදි ඇහිබැම අවට සම දෙපැත්තට ඇදලා තද කරගන්න කියලා ඔබට කිව්වොත් ඒක වැරැදි ක්‍රමයක් නේද කියලා අහන්න ඔබට අයිතියක් තියෙනවා. මේ ගැන දැනුවත්කමක් ඇතිව සැලුන් එකකට යෑම ඔබට ප්‍රයෝජනවත් වේවි. ඒ වගේම අයිබ්‍රෝස් විතරක් නෙවෙයි මුහුණ ත්‍රෙඩින් හෝ වැක්ස් කරද්දි පවා නියමිත ක්‍රම තියෙනවා. සමහර සැලුන්වල එපොයිමන්ට් වලට වැඩ කරන නිසා ඉක්මනට වැඩ ඉවර කරගන්න ඕනෙ නිසා එහෙන් මෙහෙන් කරලා දාන්න උත්සාහ කරනවා. නමුත් මුහුණ ත්‍රෙඩින් කරන එක ඒ වගේ ඉක්මනට කරන්න පුළුවන් දෙයක් නෙවෙයි. නිවැරැදි විදියට මුහුණ ත්‍රෙඩින් කරන්න විනාඩි 45ක්වත් ගතවෙනවා ගතවෙන කාලය ඒ ඒ පුද්ගලයා මත බලපානවා. සමහර අයට මුහුණ ත්‍රෙඩින් කරද්දි ඇස්වලින් කඳුළු එනවා. කලන්තෙ දාන අවස්ථාත් තියෙනවා. ඒ වගේ අයට ඉක්මනින් ත්‍රෙඩින් කරලා ඉවර කරන්න බැහැ. වේදනාව අඩු කර කර හිමින් හිමින් තමයි කරන්න ඕනෙ. සමහර විට ඒකට පැයක් දෙකක් ගතවෙන්නත් පුළුවන්. ඉතින් මේ නිසා ඔබ ලස්සන වෙන්න කලින් ඔබ ලස්සන වීමට භාවිත කරන සැලුන් එක ගැනත් රූපලාවණ්‍ය ශිල්පියා ගැනත් දැනුවත් වීම ඔබේ අනාගතයට ඉතාම වැදගත් වෙනවා.
උපුටා ගැනීම මව්බිම
