කුරුලෑ සුව නොවන ප්‍රධාන හේතු
කුරුලෑ සදහා ප්‍රතිකාර කිරීමේදී සහ එම රෝගීන් සමඟ කතා කිරීමේදී ඔවුන් දරනා සමහර මත වැරැදි බව හැඟී ගිය හෙයින් මෙම ලිපිය ලියන්නට සිතුනි. මක් නිසාද යත් එම වැරැදි ආකල්ප නිසා ඔවුන්ට හානියක් වන නිසාය. එයින් එක් මතයක් නම් කුරුලෑ යනු වයස නිසා ඇතිවන රෝගයක් නිසා ප්‍රතිකාර කළ යුතු නැත යන්නයි. අවුරුදු 10 - 12 වයස්වල දරුවන් හෝ ඔවුන්ගේ ශාරීරික හෝමොන වෙනස්කම්වලට භාජන වීමත් සමඟ කුරුලෑ ඇතිවීමට පටන් ගනී. එය හෝමෝනමය ක්‍රියාවලියක් වුවද ඒ සඳහා ප්‍රතිකාර කළ යුතුය. එසේ නොමැති නම් ඒ නිසා ඇතිවන කැළැල් සහ පැල්ලම් ඉවත් කිරීම ඉතා අපහසුය. ඒ සමඟම කුරුලෑ නිසා දරුවන්ට ඇතිවන මානසික අසහනය ඉමහත්ය. සමාජයට මුහුණදීමට ඇති මැළිකම, ස්ව අභිමානය නැතිවීම සහ මානසික ආතතියට ලක්වීම මෙම දරුවන්ට බහුලව සිදුවෙයි. එම නිසා වයස කුමක් වුවත් ප්‍රතිකාර ගැනීම කළ යුතුයි.
අනෙක් කරුණ වන්නේ වයස 35 - 40 වැනි වයස්වලදී ප්‍රථමවරට ඇතිවන කුරුලෑය. එම වයස් කාණ්ඩවල උදවිය බොහෝවිට සිතන්නේ එම වයසේදී ප්‍රථමයෙන්ම කුරුලෑ ඒම සිදු නොවන බවය. එම නිසා එය වෙනත් රෝගයක් යැයි වරදවා වටහාගෙන වෙනත් ප්‍රතිකාර පසුපස යෑමද සුලභව දක්නට ලැබේ. විශේෂයෙන්ම තරුණ වයසේ දුවා දරුවන් සිතන්නේ කුරුලෑ එන්නේ තමන්ගේ අපිරිසුදුකම නිසා බවය. එම නිසා ඔවුන් නිතර නිතර මුහුණ සේදීමට පෙලඹේ. ඒ සඳහා ඉතා ප්‍රබල විසබීජ නාශක සබන් වර්ගද භාවිත කිරීමට පෙලඹේ. නමුත් මෙය අපිරිසුදුකම නිසා ඇතිවෙන තත්ත්වයක් නොවන අතර නිතර නිතර සේදීමෙන් කුරුලෑ තවත් වැඩිවීමකට වුවද ලක්විය හැකිය. එම නිසා දිනකට දෙවතාවක් සමට ගැළපෙන පිරිසුදු කාරකයකින් සේදීම ප්‍රමාණවත්ය. විශේෂයෙන්ම නේවාසිකාගාරවල සිටින දරුවන්ගේ මතයක් වන්නේ මෙය තමන්ට කාගෙන් හෝ බෝ වූ තත්ත්වයක් කියාය. වෙනත් කෙනකු තමන්ගේ මුහුණ පිස්නාව පාවිච්චි කළ හෙයින් තමන්ටද මෙය වැලඳුණු බවය. නමුත් කුරුලෑ බෝවන රෝගී තත්ත්වයක් නොවේ. එසේම සමහරු වෛද්‍ය උපදෙස් ගැනීමට පසුබට වන හේතුවක් වන්නේ ඔවුන් බෙහෙත් ගතහොත් නැවැත නැවැතත් බෙහෙත් ගැනීමට අනිවාර්යයෙන්ම ඕනෑ වේ යැයි ඔවුන්ගේ සිතේ බියක් ඇති නිසාය. නමුත් ඇත්ත වශයෙන්ම සිදුවන්නේ කුරුලෑ යනු කලින් කලට මතුවන රෝගී තත්ත්වයක් නිසා එය කලින් කලට මතුවීමයි. එය බෙහෙත් පුරුද්දට යෑම නිසා නොවේ. එසේම දීර්ඝකාලීනව අතුරු ආබාධ බෙහෙත් නිසා ඇති වේ යැයි බියක්ද බොහෝ දෙනාගේ තිබේ. බටහිර වෛද්‍ය විද්‍යාවට අනුව සකසා ඇති සෑම බෙහෙතකටම අතුරු ආබාධ ඇත. නමුත් එම ආබාධ ඇතිවන්නේ ඉතා සුළු ප්‍රතිශතයකටය. එම ප්‍රමාණයද නොගැනිය හැකි තරමට අඩු කිරීමට නිවැරැදි ප්‍රතිකාර ගැනීමෙන් කළ හැකියි. බොහෝ අතුරු ආබාධවලට හේතුව වන්නේ අනිසි ලෙස ඖෂධ පරිහරණයයි. එසේම මෙම කුරුලෑ සඳහා භාවිත කරන ඖෂධ මඟින් පසුකාලීනව භයානක අතුරු ආබාධ ඇති වන්නේ නැත. කුරුලෑ සඳහා අප බෙහෙත් නියම කිරීමේදී ඒ සඳහා බෙහෙත් වර්ග කීපයක් ආලේපනයටද, මුඛ මාර්ගයෙන් ගැනීමටද නියම කරයි. ඒ සමඟම අප රෝගීන්ගේ චර්යා රටා වෙනස් කිරීමටද උපදෙස් දෙයි. නමුත් සමහර රෝගීන් මෙයින් එක් වර්ගයක් පමණක් තනියෙන් පාවිච්චි කර කුරුලෑ සුව නොවේ යැයි මැසිවිලි නඟයි. උදාහරණයක් ලෙස රාති්‍ර ආලේප කරන ක්‍රීම් වර්ගය පමණක් ආලේප කර එමඟින් කුරුලෑ සුව වන්නේ නැතැයි නවතා දමයි. නමුත් මෙහිදී සිදුවිය යුත්තේ සියලුම දේ එකවර ක්‍රමානුකූලව ඉවසීමෙන් කිරීමයි. එසේම එක් ප්‍රතිකාර ක්‍රමයක් නවතා දැමීමට පෙර අඩුම තරමේ මාස 2ක් වත් එක දිගට භාවිත කළ යුතුය. එසේ නොමැතිව සති 01 - 02න් එය නවතා දැමීම මුදල් නාස්තියක් පමණි. කුරුලෑ යනු සමේ ඇති තෙල් ස්‍රාවය කරන ග්‍රන්ථීන් අවහිර වීමෙන් ඇතිවන තත්ත්වයකි. නිසි ප්‍රතිකාර මඟින් කුරුලෑ පාලනය, කුරුලෑ නැවැත ඇතිවීම වළක්වා ගැනීම සහ කුරුලෑ ලප කැළැල් ඉවත් කිරීම සිදුකළ හැකියි.
කුරුලෑ ඇතිවන්නේ කෙසේද?
අපගේ සම මතුපිටට විවෘත වන ස්නේහස්‍රාවී ග්‍රන්ථීන් ඇති අතර මෙයින් තෙල් සහිත දියරයක් සම මතුපිටට ස්‍රාවය කරයි. එම ස්‍රාවය සම තෙත්ව සහ මෘදුව තබා ගනී. මෙම ග්‍රන්ථීන් අවහිර වීමෙන් සහ ආසාදන වීමෙන් කුරුලෑ ඇති වෙයි.
රෝගී තත්ත්වයක්ද?
සාමාන්‍යයෙන් තරුණ වයසේදී ඇතිවන හෝර්මෝන වෙනස්කම් නිසා කුරුලෑ ඇතිවෙයි. එය රෝගී තත්ත්වයක් නොවුවත්, එම නිසා මානසික ආතතිය, ඉදිරිපත්වීමේ මැළිකම සහ ස්ව අභිමානය අඩුවීම වැනි මානසික පීඩාකාරී තත්ත්වයන් ඇතිවිය හැකියි. මෙයට අමතරව අසාමාන්‍ය ලෙස ශරීරයේ හෝමෝන වෙනස්වන රෝගී අවස්ථා කීපයකදී කුරුලෑ අධික ලෙස ඇතිවිය හැකි අතර එම කුරුලෑ පාලනය කිරීමද අසීරුය. මෙම රෝගී තත්ත්වයන් වන්නේ ඩිම්බකෝෂ ආශි්‍රතව ඇතිවන අසාමාන්‍ය හෝර්මෝන වෙනස්කම් ඩිම්බ කෝෂයේ සහ අධිවෘක්ක ග්‍රන්ථියේ ඇතිවන ගෙඩි වර්ග ආදියයි.
කුරුලෑ වැඩිවන හේතූ?
• සමහර උපත් පාලන පෙති වර්ග• සමහර ඔෟෂධ වර්ග• ශරීර වර්ධන හෝර්මෝන (ඇන්ඩ්‍රජන්)• ඝන තෙල් සහිත රූපලාවණ්‍ය ආලේපන• මාසික ඔසප් වීම ආසන්නයේදී• කුරුලෑ නිතර ඇල්ලීම සහ කැඩීම නිසා ආසාදන වැඩිවීම සහ කැළැල් ඇතිවීම• අධික සීනි සහිත ආහාර වර්ග (සමහර අවස්ථාවලදී කුරුලෑ වැඩිකිරීමට හේතු වේ)
කුරුලෑ සඳහා ප්‍රතිකාර තිබේද?
කුරුලෑ සඳහා සුදුසු තනි ප්‍රතිකාර ක්‍රමයක් නොමැත. ප්‍රතිකාර සඳහා ඖෂධ වර්ග ගණනාවක් ඇති අතර කුරුලෑ වර්ගය, ප්‍රමාණය සහ සමේ තත්ත්වය අනුව වෛද්‍යවරයා විසින් නියම කරන ප්‍රතිකාර වෙනස් වේ. එක් ප්‍රතිකාර වර්ගයක් ප්‍රතික්ෂේප කිරීමට පෙර අඩුම තරමින් මාස 2ක්වත් එය භාවිත කළ යුතුයි. සුළු කුරුලෑ තත්ත්වයන් සඳහා සම මතුපිට ආලේප කරන ක්‍රීම් පමණක් ප්‍රමාණවත් වෙයි. ඒ හැර මුඛ මාර්ගයෙන් ගතයුතු ප්‍රතිජීවක ඖෂධ හෝර්මෝන ප්‍රතිකාර සහ විටමින් ඒ ප්‍රතිකාර ඇති අතර මෙයින් සමහර ඖෂධ භාවිතයේදී රුධිර පරීක්‍ෂාවක් කිරීමටද සිදුවෙයි.
කුරුලෑ ලප සහ කැළැල් සඳහා ප්‍රතිකාර තිබේද?
කුරුලෑ ලප සහ කැළැල් සඳහා "කෙමිකල් පීලින්" ප්‍රතිකාරය සහ තවත් ප්‍රතිකාර වර්ග කිහිපයක් ඇත. මෙම ක්‍රම මඟින් ක්‍රම ක්‍රමයෙන් සමේ ඇති ලප සහ කැළැල් අඩුකර ගත හැකියි.
ඔබ කළ යුත්තේ කුමක්ද?
• කුරුලෑ ඇල්ලීමෙන් සහ කැඩීමෙන් වැළකීම.• මූලික අවස්ථාවේදීම ප්‍රතිකාර ගැනීම සහ එමඟින් ලප සහ කැළැල් ඇතිවීම අවම කරගත හැකි වීම.• ඖෂධ පාවිච්චිය පිළිබඳ නිවැරැදි ක්‍රමය අනුගමනය කිරීම සහ එක් ඖෂධයක් අඩුම තරමින් මාස 2ක් වත් භාවිත කිරීම.• තෙල් රහිත රූපලාවණ්‍ය ආලේපන ආලේප කිරීම.• මුහුණ සෝදන විට තදින් ඇතිල්ලීම නොකිරීම සහ ඒ සඳහා සුදුසු පිරිසුදු කාරකයක් භාවිත කිරීම.• ආහාරයට අලුත් එළවළු සහ පලතුරු එක් කිරීම.
මව්බිම
